زمین کے تنازع میں بزرگ خاتون کی جان گئی، علاقے میں کشیدگی

بیتیا، 04 جنوری (اے بی این) مغربی چمپارن ضلع کے سیریسیا تھانہ حلقہ کے تحت سینواریا وارڈ نمبر-10 میں زمین کے تنازع کے دوران ہونے والی مارپیٹ میں 60 سالہ خاتون کی موت ہو گئی۔ متوفیہ کی شناخت رام کلی دیوی کے طور پر کی گئی ہے۔ بتایا جا رہا ہے کہ یہ واقعہ اتوار کی صبح تقریباً 7:30 بجے پیش آیا۔ پولیس ذرائع کے مطابق سینواریا گاؤں کے رہنے والے منامہتو اور مہاتم یادو کے درمیان محض 10 انچ زمین کو لے کر تنازع شروع ہوا۔ دیکھتے ہی دیکھتے تنازع نے شدت اختیار کر لی اور دونوں فریق کے درمیان مارپیٹ ہونے لگی۔ اسی دوران ایک فریق کی خاتون رام کلی دیوی اپنے بیٹے کو بچانے کے لیے بیچ بچاوکرنے پہنچیں۔ الزام ہے کہ دوسرے فریق کے لوگوں نے خاتون پر لوہے کی کھنتی سے حملہ کر دیا، جس کے باعث وہ زمین پر گر پڑیں۔ اس کے بعد ملزمان نے انہیں لات گھونسوں سے پیٹنا شروع کر دیا۔ مارپیٹ میں شدید طور پر زخمی رام کلی دیوی کی موقع پر ہی موت ہو گئی۔ واقعے کے بعد تمام ملزمان گھر چھوڑ کر فرار ہو گئے۔گاؤں والوں کی اطلاع پر سیریسیا تھانہ کی پولیس موقع پر پہنچی اور لاش کو تحویل میں لے کر پوسٹ مارٹم کے لیے گورنمنٹ میڈیکل کالج اسپتال (جی ایم سی ایچ)، بیتیا بھیج دیا۔ واقعے کی سنگینی کو دیکھتے ہوئے موقع پر ٹریفک ڈی ایس پی سمیت آدھا درجن تھانوں کی پولیس کیمپ کر رہی ہے۔ سیریسیا تھانہ انچارج اننت کمار نے اس سلسلے میں بتایا کہ واقعے کے بعد سے تمام ملزمان فرار ہیں۔
اور ان کی گرفتاری کے لیے چھاپے ماری جاری ہے۔