بہار میں حکومت کا خوف ختم، مجرموں کا حوصلہ بڑھ رہا ہے: اعجاز

پٹنہ، (اے بی این) راشٹریہ جنتا دل (آر جے ڈی) کے ترجمان اعجاز احمد نے مشرقی چمپارن میں میلہ دیکھنے گئے ایک جوڑے کے ساتھ پیش آئے مبینہ اجتماعی زیادتی کے واقعے کو انسانیت کو شرمسار کرنے والا قرار دیتے ہوئے الزام لگایا کہ بہار میں حکومت اور انتظامیہ کا خوف ختم ہو چکا ہے، جس کی وجہ سے مجرموں کے حوصلے لگاتار بلند ہو رہے ہیں۔
مسٹر احمد نے کہا کہ مشرقی چمپارن میں میلہ دیکھنے گئے جوڑے کے ساتھ پیش آنے والا واقعہ انتہائی شرمناک اور تشویشناک ہے۔ انہوں نے الزام لگایا کہ شوہر کو باندھ کر اس کے سامنے ہی بیوی کے ساتھ اجتماعی زیادتی کی گئی۔ اس طرح کے واقعات ریاست میں قانون اور امن کی صورتحال پر سنگین سوالات کھڑے کرتے ہیں۔
آر جے ڈی کے ترجمان نے کہا کہ بہار میں خواتین اور بچیوں کے خلاف لگاتار اس طرح کے واقعات سامنے آ رہے ہیں، لیکن حکومت کی طرف سے موثر کارروائی کرنے کے بجائے معاملے کو دوسری سمت موڑنے کی کوشش کی جاتی ہے۔ انہوں نے الزام لگایا کہ حکومت میں بیٹھے لوگ موجودہ واقعات پر جواب دہی طے کرنے کے بجائے سابقہ حکومت اور اس کی مدت کار کا تذکرہ کر کے معاملے سے توجہ ہٹاتے ہیں۔ اس طرح کی سیاست سے مجرموں کو بچانے کا راستہ ملتا ہے۔
مسٹر احمد نے وزیر اعلیٰ کے اس مبینہ وعدے کا ذکر کیا، جس میں خواتین اور بچیوں کے ساتھ ایسے واقعات ہونے پر 24 گھنٹے کے اندر کارروائی کرنے کی بات کہی گئی تھی۔ انہوں نے سوال اٹھایا کہ جب وزیر اعلیٰ نے فوری کارروائی کا بھروسہ دیا تھا، تو پھر ایسے واقعات پر موثر قدم کیوں نظر نہیں آ رہے ہیں۔ انہوں نے الزام لگایا کہ کارروائی میں کمی کی وجہ سے مجرموں کے حوصلے بڑھ رہے ہیں اور اس طرح کے گھناؤنے واقعات سامنے آ رہے ہیں۔
آر جے ڈی ترجمان نے کہا کہ خواتین کی حفاظت کو یقینی بنانا حکومت کی ذمہ داری ہے۔ ایسے واقعات میں فوری کارروائی، قصورواروں کی گرفتاری اور متاثرہ کو انصاف دلانا ترجیح ہونی چاہیے۔ انہوں نے ریاستی حکومت سے امن و امان کو درست کرنے اور خواتین کے خلاف جرم کرنے والوں کے خلاف سخت کارروائی یقینی بنانے کا مطالبہ کیا۔