سمراٹ چودھری نے سیلاب سے متاثرہ خاندانوں کے بینک کھاتوں میں امدادی رقم منتقل کی

پٹنہ، 12 اکتوبر (اے بی این) وزیر اعلیٰ سمراٹ چودھری نے پیر کو دوسرے مرحلے میں 1,60,201 سیلاب متاثرہ خاندانوں کو امدادی گرانٹ کی تقسیم کے تحت فی خاندان سات ہزار روپے کے حساب سے مجموعی طور پر 112.14 کروڑ روپے کی رقم براہ راست فائدہ منتقلی (ڈی بی ٹی) کے ذریعے ان کے بینک کھاتوں میں منتقل کی۔ پہلے مرحلے میں 15 ستمبر 2026 کو 8,77,190 خاندانوں کے بینک کھاتوں میں فی خاندان 7,000 روپے کے حساب سے 614.03 کروڑ روپے کی رقم منتقل کی گئی تھی۔ اب تک مجموعی طور پر 10,37,391 سیلاب متاثرہ خاندانوں کے کھاتوں میں 726.17 کروڑ روپے کی رقم منتقل کی جا چکی ہے۔
وزیر اعلیٰ مسٹر چودھری نے کہا کہ آج 1,60,201 سیلاب متاثرہ خاندانوں کے بینک کھاتوں میں امدادی گرانٹ کی تقسیم کے تحت فی خاندان 7,000 روپے کے حساب سے 112.14 کروڑ روپے کی رقم براہ راست فائدہ منتقلی کے ذریعے منتقل کی گئی ہے۔ انہوں نے کہا کہ پہلے مرحلے میں سیلاب سے متاثرہ 8,77,190 خاندانوں کو فی خاندان 7,000 روپے کے حساب سے امدادی گرانٹ فراہم کی گئی تھی۔ انہوں نے کہا کہ سیلاب کے دوران متعلقہ محکمے کے اہلکاروں اور انتظامیہ نے راحت اور بچاؤ کے کام بہتر طریقے سے انجام دیے۔ تمام ضلع مجسٹریٹ اس بات کو یقینی بنائیں کہ امدادی رقم سے محروم رہ جانے والے اہل خاندانوں کی بھی نشاندہی کرکے انہیں اس عمل میں شامل کیا جائے، تاکہ کوئی بھی اہل خاندان سرکاری امداد سے محروم نہ رہے۔
وزیر اعلیٰ مسٹر چودھری نے کہا کہ سیلاب سے متاثرہ کسانوں کو فصلوں کے نقصان کے معاوضے کے لیے زرعی امدادی گرانٹ کی رقم 14 اکتوبر کو دسہرہ سے پہلے فراہم کر دی جائے گی۔ انہوں نے افسران کو ہدایت دی کہ سیلاب سے تباہ ہونے والی سڑکوں اور دیگر بنیادی ڈھانچے کی مرمت اور بحالی کا کام ترجیحی بنیاد پر کیا جائے اور اسے دیوالی سے پہلے مکمل کرنا یقینی بنایا جائے، تاکہ عام لوگوں کو آمدورفت اور روزمرہ کی سرگرمیوں میں پریشانی نہ ہو۔