الخلود نے الاتحاد کو ہرا کر سب کو حیران کر دیا

سعودی فٹ بال میں غیر ملکی ملکیت کے سفر کا آغاز انتہائی یادگار انداز میں ہوا ہے۔ جب بین ہاربرگ نے سیزن کے آغاز سے قبل الخلود کو خریدا تھا، تو شاید انہوں نے خود بھی یہ نہیں سوچا ہوگا کہ وہ اپنے پہلے ہی سیزن میں سعودی کنگز کپ کے فائنل میں پہنچ جائیں گے۔
الخلود نے الاتحاد کے خلاف دو بار خسارے میں جانے کے بعد شاندار واپسی کی اور اضافی وقت کے بعد مقابلہ 2-2 سے برابر کر دیا۔ اس کے بعد پنالٹی شوٹ آؤٹ میں الخلود نے 5-4 سے کامیابی حاصل کر کے پہلی بار فائنل میں جگہ بنا لی۔ دوسری جانب الہلال اور الاہلی کے درمیان مقابلہ مقررہ وقت تک 1-1 سے برابر رہا، جہاں گول کیپر یاسین بونو کی شاندار کارکردگی کی بدولت الہلال نے پنالٹی شوٹ آؤٹ میں 4-2 سے جیت اپنے نام کی۔
قصیم میں کھیلے گئے میچ میں الخلود نے دفاعی حکمت عملی اپنائی، لیکن الاتحاد نے 40 ویں منٹ میں موسیٰ دیابی کے گول کے ذریعے برتری حاصل کر لی۔ الخلود نے ہمت نہ ہاری اور 73 ویں منٹ میں عبدالعزیز العلیوہ نے گول کر کے مقابلہ برابر کر دیا۔ اضافی وقت میں اسٹیون برگ وین نے الاتحاد کو دوبارہ برتری دلائی، لیکن 111 ویں منٹ میں 20 سالہ متبادل کھلاڑی ایڈم بیری نے اپنے کیریئر کا پہلا اور یادگار گول کر کے اسکور پھر برابر کر دیا۔ پنالٹی شوٹ آؤٹ میں الخلود کے گول کیپر کوزانی نے موسیٰ دیابی کی اہم پینلٹی روک کر اپنی ٹیم کو تاریخی فتح دلائی۔جدہ میں ہونے والے دوسرے سیمی فائنل میں الہلال نے 39 ویں منٹ میں تھیو ہرنینڈز کے طاقتور شاٹ کے ذریعے برتری حاصل کی۔ الاہلی نے دوسرے ہاف میں بھرپور دباؤ ڈالا اور 78 ویں منٹ میں آئیون ٹونی نے پنالٹی پر گول کر کے مقابلہ برابر کر دیا۔ پنالٹی شوٹ آؤٹ میں ایک بار پھر یاسین بونو الہلال کے ہیرو ثابت ہوئے جنہوں نے آئیون ٹونی اور گیلینو کی پینلٹیز روک کر اپنی ٹیم کی فائنل میں رسائی یقینی بنائی۔ تھیو ہرنینڈز نے آخری پینلٹی اسکور کر کے الہلال کی جیت پر مہر ثبت کی۔اب کنگز کپ کے فائنل میں روایتی حریف الہلال کا سامنا اس سیزن کی سب سے بڑی سرپرائز پیکیج الخلود سے ہوگا۔