بنگال کے دو روزہ دورے پر کولکاتہ پہنچے امت شاہ، آدھی رات ہوائی اڈے پر شاندار استقبال

مرکزی وزیر داخلہ امت شاہ جمعہ کی دیر رات اپنے دو روزہ مغربی بنگال کے دورے پر کولکاتہ پہنچ گئے۔ جمعہ کی رات تقریباً 12.30 بجے وہ نیتا جی سبھاش چندر بوس بین الاقوامی ہوائی اڈے پر اترے، جہاں بی جے پی لیڈروں نے ان کا گرم جوشی سے استقبال کیا۔ ہوائی اڈے پر بی جے پی کے ریاستی صدر شمک بھٹاچاریہ، مرکزی وزیر سکانت مجومدار، لیڈر حزب اختلاف شبھیندو ادھیکاری، مرکزی وزیر شانتنو ٹھاکر، مرکزی وزیر مملکت نشیت پرمانک سمیت کئی سینئر پارٹی لیڈر موجود رہے۔
دو روزہ دورے کے دوران مرکزی وزیر داخلہ امت شاہ تنظیمی میٹنگوں کے ساتھ ساتھ بڑے پیمانے پر عوامی رابطہ پروگراموں پر خاص زور دیں گے۔ اس بار ان کی توجہ داخلی تنظیمی سرگرمیوں کے مقابلے میں عوامی پروگراموں اور پارٹی کارکنوں سے براہ راست رابطے پر رہے گی۔ بی جے پی کی ریاستی کمیٹی کے ایک رکن کے مطابق، کولکاتا پہنچنے کے بعد امت شاہ آج ریاستی بی جے پی کی کور کمیٹی کے ساتھ ایک اہم میٹنگ کریں گے، جس میں آئندہ انتخابات کی تیاریوں اور تنظیمی حکمت عملی پر تبادلہ خیال ہوگا۔
وزیر داخلہ دو اہم عوامی ریلیوں بشمول پارٹی کارکن کانفرنسوں سے خطاب کریں گے۔ پہلا جلسہ شمالی 24 پرگنہ ضلع کے بیرک پور علاقے میں منعقد ہوگا، جبکہ دوسرا جلسہ شمالی بنگال کے دارجلنگ ضلع کے سلی گوڑی میں ہوگا۔ سلی گوڑی میں پروگرام کے بعد وہ باگڈوگرہ ہوائی اڈے سے نئی دہلی کے لیے روانہ ہوں گے۔ پارٹی ذرائع کے مطابق، بیرک پور پروگرام میں بنگاوں، باراسات، بشیر ہاٹ اور بیرک پور لوک سبھا حلقوں کے کارکن شامل ہوں گے۔ وہیں، سلی گوڑی پروگرام میں سلی گوڑی، دارجلنگ، جلپائی گوڑی، علی پور دوار اور کوچ بہار تنظیمی اضلاع کے پارٹی کارکن موجود رہیں گے۔
سیاسی تجزیہ نگاروں کا ماننا ہے کہ انتخابی تاریخوں کے اعلان سے پہلے ایک ہی مہینے میں وزیر اعظم نریندر مودی، بی جے پی کے نو منتخب قومی صدر نتن نوین اور اب مرکزی وزیر داخلہ امت شاہ کا مغربی بنگال دورہ اس بات کا اشارہ ہے کہ بی جے پی ریاستی اسمبلی انتخابات کو لے کر پوری طرح سرگرم اور سنجیدہ نظر آ رہی ہے۔ اس سے پہلے بھی دسمبر مہینے کے آخر میں امت شاہ کولکاتہ آئے تھے، جب انہوں نے اہم تنظیمی میٹنگ کی تھی۔ انہوں نے ایک پریس کانفرنس سے بھی خطاب کیا تھا، جس میں وزیر اعلیٰ ممتا بنرجی کی حکومت پر سخت حملہ بولا تھا۔ ایک مہینے کے اندر ان کا دوسرا دورہ، بے حد اہم مانا جا رہا ہے۔