ہندوستان نے جنوبی افریقہ کو دھول چٹا دی: 30 رنز سے کامیاب، سیریز 1-3 سے جیت لی

ہندوستانی کرکٹ ٹیم نے احمد آباد کے نریندر مودی اسٹیڈیم میں کھیلے گئے پانچویں اور فیصلہ کن ٹی-20 مقابلے میں جنوبی افریقہ کو 30 رنز سے شکست دے کر پانچ میچوں کی سیریز 1-3 سے جیت لی ہے۔ ہندوستان کے 232 رنز کے پہاڑ جیسے ہدف کے تعاقب میں جنوبی افریقی ٹیم مقررہ 20 اوورز میں 8 وکٹوں پر 201 رنز ہی بنا سکی۔
232 رنز کے بڑے ہدف کا تعاقب کرتے ہوئے جنوبی افریقہ کے اوپنرز کوئنٹن ڈی کاک اور ریجا ہینڈرکس نے 69 رنز کا جارحانہ آغاز فراہم کیا، لیکن ساتویں اوور میں ورون چکرورتی نے ہینڈرکس (13) کو آؤٹ کر کے پہلی کامیابی دلائی۔جسپریت بمراہ نے خطرناک ڈی کاک کو اپنی ہی گیند پر کیچ آؤٹ کر کے میچ کا پانسہ پلٹ دیا۔ڈی کاک نے 35 گیندوں پر 65 رن بنائے جس میں 9 چوکے اور 3 چھکے شامل تھے۔ ڈی کاک کے آؤٹ ہوتے ہی جنوبی افریقہ میچ ہار گیا۔ورون چکرورتی نے اپنی جادوئی اسپن سے جنوبی افریقہ کے مڈل آرڈر کو تہس نہس کر دیا، انہوں نے کپتان ایڈن مارکرم (6) اور ڈونووان فیررا (0) کو لگاتار گیندوں پر آؤٹ کیا۔جنوبی افریقہ کی جانب سے ڈیوالڈ بریوس نے 31 رنز بنائے، لیکن وقفے وقفے سے گرتی وکٹوں نے پروٹیز کو ہدف سے دور کر دیا۔ ورون چکرورتی (4 وکٹیں)، جسپریت بمراہ (2 وکٹیں)، ارشدیپ سنگھ اور ہاردک پانڈیا (1، 1 وکٹ)۔
اس سے قبل، ہندوستان نے ٹاس ہار کر پہلے بیٹنگ کرتے ہوئے 5 وکٹوں پر 231 رنز کا مجموعہ ترتیب دیا۔ ابھیشیک شرما (34) اور سنجو سیمسن (37) نے پہلی وکٹ کے لیے 63 رنز جوڑے۔ مڈل آرڈر میں ہاردک پانڈیا اور تلک ورما کے درمیان چوتھی وکٹ کے لیے 105 رنز کی برق رفتار شراکت ہوئی۔ پانڈیا نے محض 25 گیندوں پر 63 رنز (5 چوکے، 5 چھکے) بنائے، جبکہ تلک ورما نے 42 گیندوں پر 73 رنز (10 چوکے، 1 چھکا) کی شاندار اننگز کھیلی۔جنوبی افریقہ کی جانب سے کاربن بوش نے 2 وکٹیں حاصل کیں، لیکن وہ ہندوستانی بلے بازوں کو بڑا اسکور بنانے سے نہ روک سکے۔ ہندوستان کی اس جیت نے ایک بار پھر ثابت کر دیا ہے کہ ٹی-20 فارمیٹ میں ٹیم انڈیا کی حکمرانی برقرار ہے۔