سنیل گواسکر نے سوریہ کمار کی شاندار اننگز کی تعریف کی

ہندوستان کے سابق کپتان اور جیو اسٹار ایکسپرٹ سنیل گواسکر نے نیوزی لینڈ کے خلاف دوسرے ٹی20 میچ میں ہندوستان کی جیت میں کپتان سوریہ کمار یادو کی شاندار اننگز کی خوب تعریف کی۔ انہوں نے ایشان کشن کے ساتھ اہم شراکت کے دوران سوریہ کمار کی میچ فہم، حالات کے مطابق کھیلنے کی صلاحیت اور پختگی کو اجاگر کیا۔ کرکٹ لائیو پر گفتگو کرتے ہوئے گواسکر نے بتایا کہ کس طرح سوریہ کمار نے اپنی اننگز کے ابتدائی حصے کو اپنی ردھم میں آنے کے لیے استعمال کیا جبکہ دوسرے اینڈ سے ایشان کشن جارحانہ انداز میں بیٹنگ کر رہے تھے۔ گواسکر نے کہا، ’’سوریہ کی اننگز سے صاف ظاہر ہوتا ہے کہ انہیں حالات کا پورا اندازہ تھا۔ وہ 11 گیندوں پر 11 رن بنا کر کھیل رہے تھے۔ 97 رنز کی شراکت میں سے 76 رنز ایشان کشن نے بنائے تھے۔ یہ ایک کپتان کی پختگی کو بھی ظاہر کرتا ہے۔انہوں نے کہا کہ جب ایشان کشن مکمل ردھم میں تھے تو سوریہ کمار نے اسٹرائیک روٹیٹ کرنے اور خود کو سیٹل کرنے پر توجہ دی۔ گواسکر کے مطابق،’’جب دوسرا بلے باز اتنی شاندار بیٹنگ کر رہا ہو تو آپ اسے زیادہ اسٹرائیک دیتے ہیں، خود سنگل اور ڈبل لے کر اپنی ٹائمنگ بہتر کرتے ہیں، پیروں میں حرکت لاتے ہیں اور خود کو بڑے شاٹس کے لیے تیار کرتے ہیں۔
گواسکر نے مزید بتایا کہ ایشان کشن کے آؤٹ ہونے کے بعد سوریہ کمار نے اننگز کی باگ ڈور سنبھالی، جو ان کے شاٹ سلیکشن کی اہمیت کو ظاہر کرتا ہے۔ انہوں نے کہا، ’’ایشان کشن کے آؤٹ ہونے کے بعد سوریہ ہی تھے جنہوں نے پہل کی اور شاٹس کھیلنا شروع کیے۔ آف سائیڈ کی جانب ڈرائیوز ایک بڑا پلس پوائنٹ تھا کیونکہ اس سے ظاہر ہوتا ہے کہ وہ زیادہ سے زیادہ سیدھا کھیلنے کی کوشش کر رہے تھے۔‘‘
سابق اوپنر نے سوریہ کمار کی ناٹ آؤٹ اسی سے زائد رنز کی اننگز کو 'ایک شاندار اننگز قرار دیا اور اسے ٹی20 ورلڈ کپ سے پہلے ہندوستانی ٹیم کے لیے ایک بہت بڑا بوسٹ بتایا۔ گواسکر نے ایشان کشن اور سوریہ کمار کے درمیان باہمی سمجھ بوجھ پر بھی زور دیا جو آئی پی ایل میں ممبئی انڈینز کے لیے ایک ساتھ کھیلنے کے دوران بنی۔
انہوں نے کہا، جب آپ کسی فرنچائز کے لیے کھیلتے ہوئے پورے ہندوستان میں دو ماہ سے زیادہ سفر کرتے ہیں تو آپ ایک دوسرے کے ساتھ ایک خاص رشتہ قائم کر لیتے ہیں۔ ٹیم کے ماحول کی تعریف کرتے ہوئے گواسکر نے کہا، ’’ٹیم میں اجتماعی جذبہ دیکھ کر بہت اچھا لگا کیونکہ مشکل حالات میں آپ کو اسی ٹیم اسپرٹ کی ضرورت ہوتی ہے۔