سپریم کورٹ نے سوشل میڈیا پوسٹس سے متعلق ایف آئی آر پر ہائی کورٹ کے رہنما اصولوں کو برقرار رکھا

سپریم کورٹ نے سوشل میڈیا پوسٹ سے وابستہ معاملے میں ایف آئی آر درج کرنے کو منظم کرنے سے متعلق تلنگانہ ہائی کورٹ کے جاری کردہ رہنما اصولوں کو درست قرار دیا ہے۔
جسٹس جے بی پاردی والا اور جسٹس وجے بشنوئی کی بنچ نے جمعرات کو سماعت کے دوران تلنگانہ ریاست کی جانب سے دائر خصوصی اجازت عرضیوں کے ایک بیچ کو خارج کر دیا، جن میں ہائی کورٹ کے فیصلے کو چیلنج کیا گیا تھا۔ اس فیصلے میں تین ایف آئی آرز کو منسوخ کرتے ہوئے سوشل میڈیا مواد پر مبنی فوجداری کارروائیوں سے نمٹنے کے لیے پولیس اور جوڈیشل مجسٹریٹس کے لیے تفصیلی آپریشنل رہنما اصول مقرر کیے گئے تھے۔
درخواست میں مداخلت سے انکار کرتے ہوئے عدالت نے کہا کہ اس نے رہنما اصولوں کا باریک بینی سے جائزہ لیا ہے اور انہیں تبدیل کرنے کی کوئی وجہ نہیں پائی۔ بنچ نے کہا، ''ہم نے پیرا 29 کا مکمل جائزہ لیا ہے۔ ہمارا ماننا ہے کہ ہمیں ہائی کورٹ کے فیصلے اور حکم میں مداخلت نہیں کرنی چاہیے، جس میں ہائی کورٹ کے جاری کردہ رہنما اصول بھی شامل ہیں۔''
اپنے حکم میں تلنگانہ ہائی کورٹ نے نلّا بالو کے خلاف کانگریس پارٹی پر تنقید سے متعلق ان کی ایکس پوسٹ کے حوالے سے درج تین ایف آئی آرز کو منسوخ کر دیا تھا۔ ہائی کورٹ نے قرار دیا تھا کہ پوسٹس اگرچہ تنقیدی تھی لیکن وہ جائز سیاسی اظہار کے دائرے میں آتی تھی۔ مزید یہ کہ شکایات میں مخصوص تفصیلات کی کمی تھی اور شکایت کنندگان کے پاس اس معاملے میں مداخلت یا شکایت درج کرنے کا قانونی حق موجود نہیں تھا۔ عدالت نے پایا کہ فوجداری کارروائی جاری رکھنا قانونی عمل کا غلط استعمال ہوگا۔ عدالت نے واضح کیا کہ دشمنی کو فروغ دینے، عوامی نظم کو خطرہ پہنچانے یا بغاوت جیسے جرائم میں ایف آئی آر صرف اسی صورت درج کی جا سکتی ہے جب پہلی نظر میں ایسا معاملہ بنتا ہو جس سے تشدد، نفرت یا عوامی بے نظمی پھیلانے کے لیے اکسانے کے شواہد ملتے ہوں۔
ہائی کورٹ کے جاری کردہ آپریشنل رہنما اصولوں میں ہتکِ عزت یا اس نوعیت کے جرائم میں ایف آئی آر درج کرنے سے پہلے حقِ سماعت کی توثیق، قابلِ دست اندازی پولیس (سنجیدہ) معاملات میں قانونی عناصر کی تصدیق کے لیے ابتدائی جانچ اور سیاسی تقریر سے متعلق معاملات میں ایک بلند معیار کا اطلاق شامل ہے، جو کیدار ناتھ سنگھ بنام ریاستِ بہار اور شریا سنگھل بنام یونین آف انڈیا میں طے شدہ اصولوں کے مطابق ہے۔
رہنما اصولوں میں ارنیش کمار بنام ریاستِ بہار میں طے شدہ گرفتاری سے متعلق حفاظتی اقدامات کی سختی سے پابندی، حساس معاملات میں سرکاری وکیل سے پیشگی قانونی رائے اور ہندوستانی شہری تحفظ ضابطہ کی دفعہ 176(1) کے تحت بے بنیاد یا سیاسی محرکات پر مبنی شکایات کو بند کرنا لازمی قرار دیا گیا ہے۔ سپریم کورٹ میں تلنگانہ ریاست کی جانب سے پیش سینئر ایڈوکیٹ سدھارتھ لوتھرا نے ایف آئی آر کی منسوخی کو چیلنج نہیں کیا، تاہم رہنما اصولوں کے دائرہ کار پر اعتراض کرتے ہوئے کہا کہ وہ یکساں نہیں ہیں اور ان میں بہتری کی ضرورت ہے۔ سپریم کورٹ نے اس دلیل کو مسترد کرتے ہوئے کہا کہ وہ ہائی کورٹ کے فیصلے یا تیار کردہ رہنما اصولوں میں مداخلت کرنے کا خواہش مند نہیں ہے۔