پیِرپینتی کوئلہ بلاک میں کسانوں کی زمین محفوظ رکھنے پر زور، زیرِ زمین کانکنی کے امکانات پر سنجیدہ غور

بہار میں معدنی وسائل کے شفاف اور سائنسی استعمال کے ساتھ کسانوں اور زمین مالکان کے مفادات کے تحفظ کو یقینی بنانے کے لیے مرکز اور ریاست کے درمیان اعلیٰ سطحی مشاورت ہوئی۔ نئی دہلی میں منعقدہ اہم اجلاس میں بہار کے کانکنی شعبے سے متعلق معدنی بلاکس کی ای نیلامی، معدنیات کی تلاش، جدید تکنیک اور پیِرپینتی کوئلہ بلاک میں کسانوں کے مفادات کے تحفظ سمیت متعدد امور پر تفصیلی تبادلۂ خیال کیا گیا۔اجلاس میں مرکزی کوئلہ و کان کنی کے وزیر جی کشن ریڈی، مرکزی وزیر مملکت برائے کوئلہ و کان کنی ستیش چندر دوبے، بہار کے وزیرِ کان کنی و ارضیات ڈاکٹر پرمود کمار، وزارتِ کان کنی کے سکریٹری کیشو چندرا اور بہار کے کان کنی و ارضیات محکمہ کے سکریٹری اویناش کمار سنگھ سمیت متعلقہ افسران موجود تھے۔اجلاس میں بہار میں معدنی وسائل کے سائنسی اور شفاف طریقے سے استعمال، معدنی بلاکس کی ای نیلامی، معدنیاتی سروے اور تلاش کے عمل میں تیزی لانے کے ساتھ کانکنی کے ذریعے ریاست کی آمدنی، روزگار اور معاشی سرگرمیوں کو فروغ دینے کی حکمت عملی پر غور کیا گیا۔مرکزی وزیر جی کشن ریڈی نے بہار میں پتھر کے بلاکس کی جاری ای نیلامی پر اطمینان کا اظہار کرتے ہوئے کانکنی شعبے کی ترقی کے لیے مرکز کی جانب سے ہر ممکن تعاون کا یقین دلایا۔پیِرپینتی کوئلہ بلاک کے حوالے سے ڈاکٹر پرمود کمار نے واضح کیا کہ کسانوں اور زمین مالکان کے مفادات کا مکمل تحفظ کیا جائے گا۔ انہوں نے کہا کہ اس مقصد کے لیے زیرِ زمین کانکنی کے امکانات پر سنجیدگی سے غور کیا جا رہا ہے، تاکہ کانکنی کے سبب کسانوں کو اپنی زمین سے محروم ہونے کی صورت حال پیدا نہ ہو۔انہوں نے بتایا کہ بھاگلپور ضلع میں موجود زیرِ تحقیق کوئلہ بلاک میں زیرِ زمین کوئلہ گیسفیکیشن (Underground Coal Gasification) کے ذریعے کانکنی کے امکانات پر بھی مرکزی وزیر کے ساتھ تفصیلی گفتگو ہوئی۔ اس جدید ٹیکنالوجی کی جانب ممکنہ بولی دہندگان کو راغب کرنے اور انہیں اس کے تکنیکی پہلوؤں اور امکانات سے آگاہ کرنے کے لیے بہار میں روڈ شو منعقد کرنے کا فیصلہ کیا گیا ہے۔ڈاکٹر پرمود کمار نے کہا کہ بہار کے معدنی وسائل ریاست کی معاشی ترقی کی مضبوط بنیاد بن سکتے ہیں۔
حکومت کی ترجیح ہے کہ معدنی دولت کا سائنسی، ماحول دوست اور شفاف طریقے سے استعمال ہو، تاکہ ریاستی آمدنی میں اضافے کے ساتھ مقامی سطح پر روزگار کے مواقع اور معاشی سرگرمیوں کو بھی فروغ ملے۔انہوں نے کہا کہ مرکزی حکومت کے تعاون سے جدید ٹیکنالوجی، بہتر معدنیاتی تلاش اور شفاف نیلامی نظام کو فروغ دے کر بہار کے کانکنی شعبے میں ترقی کے نئے امکانات کو حقیقت میں بدلا جائے گا۔اجلاس میں معدنیاتی تلاش کے کام کو مزید تیز کرنے کے لیے جیولوجیکل سروے آف انڈیا (GSI) کے افسران کے ساتھ خصوصی اجلاس منعقد کرنے کا بھی فیصلہ کیا گیا۔ اس کا مقصد ریاست میں موجود معدنی وسائل کے امکانات کا سائنسی جائزہ لے کر تلاش کی سرگرمیوں کو رفتار دینا ہے۔اس کے علاوہ بہار میں بڑے معدنیات کے معدنی بلاکس کی ای نیلامی Unified Mining Portal کے ذریعے کرائے جانے کے سلسلے میں بھی تفصیلی تبادلۂ خیال کیا گیا۔ڈاکٹر پرمود کمار نے کہا کہ شفاف نیلامی، جدید ٹیکنالوجی اور سائنسی معدنیاتی تلاش کے ذریعے بہار کے کانکنی شعبے کو نئی سمت دینا حکومت کا عزم ہے۔ مرکز اور ریاست کے باہمی تعاون سے کانکنی کو ریاست کی ترقی، روزگار کے مواقع پیدا کرنے اور معاشی استحکام کا مضبوط ذریعہ بنایا جائے گا۔