وزیر اعلیٰ نے ساسارام میں 122.39 کروڑ روپے کی لاگت سے تعمیر شدہ 2 لین ساسارام بائی پاس روڈ کا افتتاح کیا
Awaz E Bihar
••4 ویوز•3 منٹ پڑھیں
وزیر اعلیٰ جناب سمراٹ چودھری نے آج روہتاس ضلع کے ساسارام میںبیدا سے موکر تک آب پاشی نہر کے پشتے پر آر او بی/پل سمیت تعمیر کی گئی دو لین ساسارام بائی پاس سڑک کی تختی کی نقاب کشائی کرکے افتتاح کیا۔ اس سڑک کی تعمیر پر 122.39 کروڑ روپے کی لاگت آئی ہے۔بائی پاس سڑک کی تعمیر سے ساسارام شہر میں ٹریفک نظام کو آسان بنانے اور لوگوں کو آمدورفت کی بہتر سہولت فراہم کرنے میں مدد ملے گی۔ اس کے علاوہ علاقے کی معاشی اور سماجی ترقی کو بھی رفتار ملے گی۔ افتتاح کے بعد وزیر اعلیٰ نے کایاکلپ مہم کے تحت ساسارام بائی پاس کے قریب واقع مرمت و بحالی کیے گئے تالاب کا معائنہ کیا۔ انہوں نے تالاب کی بحالی، صفائی اور آبی تحفظ سے متعلق کاموں کی معلومات حاصل کیں اور افسران کو آبی وسائل کی بہتر دیکھ بھال کے سلسلے میں ضروری ہدایات دیں۔ اس موقع پر وزیر اعلیٰ نے کایاکلپ مہم کے تحت ’روہتاس جل سنجیونی‘ کا آغاز کیا۔ اس مہم کا بنیادی مقصد روہتاس ضلع کے تالابوں، پوکھروں، آبی ذخائر اور دیگر آبی وسائل کی بحالی، صفائی اور باقاعدہ دیکھ بھال کو یقینی بنانا ہے، تاکہ بارش کے پانی کو زیادہ سے زیادہ جمع اور محفوظ کیا جاسکے۔ ’روہتاس جل سنجیونی‘ کے ذریعے ضلع کے روایتی اور اہم آبی وسائل کو دوبارہ زندہ کرنے پر خصوصی توجہ دی جائے گی۔ وزیر اعلیٰ نے افسران کو ہدایت دی کہ ضلع کے تمام آبی وسائل کی باقاعدگی سے صفائی اور دیکھ بھال یقینی بنائی جائے۔ تالابوں، پوکھروں اور آبی ذخائر کو تجاوزات اور آلودگی سے پاک رکھنے کے ساتھ ساتھ ان کے تحفظ کے لیے مقامی سطح پر بھی عوام کی شمولیت یقینی بنائی جائے۔ انہوں نے کہا کہ آبی وسائل کا تحفظ اور احیائے نو کرکے ہم نہ صرف موجودہ نسل بلکہ آنے والی نسلوں کے لیے بھی پانی کی دستیابی یقینی بنا سکتے ہیں۔ پروگرام میں وزیر خوراک و صارف تحفظ اور روہتاس ضلع کے انچارج وزیر جناب اشوک چودھری، صنعت و کھیل کی وزیرمحترمہ شریسی سنگھ، رکن اسمبلی وششٹھ سنگھ، رکن اسمبلی جناب مراری پرساد گوتم، دیگر عوامی نمائندگان، چیف سکریٹری مسٹر پرتیَے امرت، ڈی جی پی پریتا ورما، محکمہ تعمیراتِ سڑک کے سکریٹری مسٹرپنکج کمار پال، وزیر اعلیٰ کے سکریٹری مسٹر لوکیش کمار سنگھ، شاہ آباد زون کے ڈپٹی انسپکٹر جنرل پولیس مسٹرڈاکٹر ستیہ پرکاش، ضلع مجسٹریٹ مسٹر دیپک کمار مشرا، ایس پی راج سمیت دیگر اعلیٰ افسران موجود تھے۔
