ندیوں سے گاد نکالنے کا معاہدہ سیلاب کی شدت کم کرنے میں سنگِ میل ثابت ہوگا: وجے کمار چودھری

پٹنہ: (اے بی این ) نائب وزیر اعلیٰ اور وزیر آبی وسائل وجے کمار چودھری نے نئی دہلی میں بہار حکومت اور مرکزی وزارتِ سڑک ٹرانسپورٹ و شاہراہ کے درمیان گاد کے انتظام اور نکاسی سے متعلق مفاہمت نامے پر دستخط کے لیے وزیر اعلیٰ سمراٹ چودھری کو مبارک باد دی ہے۔ انہوں نے اسے ایک اہم اور دور رس نتائج کا حامل فیصلہ قرار دیتے ہوئے کہا کہ دریاؤں میں گاد کا جمع ہونا ان کی بدحالی اور سیلاب کی شدت میں اضافے کی بڑی وجوہات میں شامل ہے۔وجے کمار چودھری نے کہا کہ بہار حکومت گزشتہ ڈیڑھ دہائی سے قومی سطح پر گاد کے انتظام کی پالیسی بنانے کا مطالبہ کرتی رہی ہے۔ اس مسئلے کی سنگینی پہلی مرتبہ 2011-12 میں اس وقت نمایاں ہوئی، جب سابق وزیر اعلیٰ نتیش کمار نے نئی دہلی میں قومی گنگا ریور بیسن اتھارٹی کی میٹنگ میں اسے اٹھایا تھا۔ ان کی دعوت پر اس وقت کے مرکزی وزیر پون بنسل نے بخسر سے فرکا تک فضائی دورہ کرکے گاد جمع ہونے کے باعث گنگا کی خراب ہوتی حالت کا جائزہ بھی لیا تھا۔انہوں نے بتایا کہ 2014 میں اس وقت کی مرکزی وزیر برائے آبی وسائل اوما بھارتی سے ملاقات کرکے گاد کے انتظام کے لیے قومی پالیسی بنانے اور فرکا بیراج کی تعمیر کے بعد بہار کے حصے میں گاد جمع ہونے کی تیز رفتار پر توجہ دلائی گئی تھی۔ اس کے بعد پہلی مرتبہ ’ایکسپرٹ کمیٹی آن سیڈیمنٹ مینجمنٹ‘ تشکیل دی گئی۔ کمیٹی کی رپورٹ کی بنیاد پر 2022 میں قومی سطح پر گاد کے انتظام کا فریم ورک پیش کیا گیا، جس پر ریاستی حکومتوں سے رائے طلب کی گئی، تاہم اسے ابھی حتمی شکل نہیں دی جا سکی ہے۔نائب وزیر اعلیٰ نے کہا کہ وزیر اعلیٰ سمراٹ چودھری کی قیادت میں محکمہ آبی وسائل نے حال ہی میں ’بہار آبی وسائل کی بحالی اور گاد انتظام پالیسی 2026‘ تیار کی ہے، جس میں گاد کی نکاسی کے طریقہ کار اور عملی اقدامات کو شامل کیا گیا ہے۔ اسی پالیسی کی بنیاد پر 3 نومبر 2026 کو نئی دہلی میں وزیر اعلیٰ نے مفاہمت نامے پر دستخط کیے۔انہوں نے کہا کہ اس معاہدے سے دریاؤں سے گاد نکالنے اور انہیں دوبارہ زندہ کرنے میں مدد ملے گی، جس سے سیلاب کی شدت میں کمی آنے کی امید ہے۔ اس کے علاوہ سڑکوں کی تعمیر اور دیگر ترقیاتی کاموں میں مٹی کی بھرائی کے لیے نکالی گئی گاد استعمال کی جا سکے گی، جس سے کسانوں کی زرخیز زمین کی مٹی کاٹنے کی ضرورت بھی کم ہوگی۔وجے کمار چودھری نے اس معاہدے کو بہار کے لیے دور رس اثرات کا حامل فیصلہ قرار دیتے ہوئے ریاستی حکومت اور وزیر اعلیٰ سمراٹ چودھری کو مبارک باد اور نیک خواہشات پیش کیں۔