اجنکیا رہانے نے بین الاقوامی کرکٹ سے ریٹائرمنٹ کا اعلان کر دیا

ہندوستان اور ممبئی کے تجربہ کار بلے باز اجنکیا رہانے نے بین الاقوامی کرکٹ کے تمام فارمیٹس سے ریٹائرمنٹ کا اعلان کر دیا ہے۔رہانے نے جمعرات کو سوشل میڈیا پلیٹ فارم انسٹاگرام پر ایک ویڈیو جاری کرتے ہوئے اپنے فیصلے کا اعلان کیا۔ انہوں نے کہا، "میں نے ہمیشہ اپنی بیٹنگ میں درست ٹائمنگ پر یقین رکھا ہے اور آج مجھے محسوس ہوتا ہے کہ بین الاقوامی کرکٹ اور اس کے تمام فارمیٹس کو خیرباد کہنے کا یہی مناسب وقت ہے۔ ڈومبیولی کے ایک چھوٹے سے لڑکے سے ہندوستانی ٹیم تک کے سفر میں، میں نے اس کھیل کو اپنا سب کچھ دیا۔ میری ہر اننگز اور ہر موقع کا صرف ایک ہی خواب تھا، ہندوستانی کیپ پہننا۔ میں نے ہمیشہ ملک اور ٹیم کو اپنی ذات پر فوقیت دی اور پوری ایمانداری کے ساتھ یہ کھیل کھیلا۔"انہوں نے مزید کہا کہ جب انہوں نے فرسٹ کلاس کرکٹ کا آغاز کیا تھا، اس وقت سے ہندوستانی کرکٹ نے غیر معمولی ترقی کی ہے اور گزشتہ 20 برس اس سفر کا حصہ بننا ان کے لیے باعثِ فخر رہا۔ انہوں نے کہا کہ اگرچہ ہندوستانی کرکٹر کے طور پر ان کا باب ختم ہو گیا ہے، لیکن کرکٹ سے ان کا رشتہ برقرار رہے گا اور وہ نئی نسل کی رہنمائی کرتے ہوئے اپنے تجربات اور اقدار انہیں منتقل کرنا چاہتے ہیں۔
رہانے نے ہندوستان کی جانب سے 85 ٹیسٹ، 90 ایک روزہ بین الاقوامی اور 20 ٹی-20 بین الاقوامی میچ کھیلے۔ ان کا آخری بین الاقوامی میچ جولائی 2023 میں ویسٹ انڈیز کے خلاف ٹیسٹ تھا۔ان کے کیریئر کی نمایاں کامیابیوں میں 2020-21 کے آسٹریلیا دورے پر ہندوستان کو 2-1 سے تاریخی ٹیسٹ سیریز جتوانا شامل ہے۔ ایڈیلیڈ ٹیسٹ میں ہندوستان کے صرف 36 رنز پر آل آؤٹ ہونے کے بعد رہانے کی قیادت میں ٹیم نے شاندار واپسی کرتے ہوئے سیریز اپنے نام کی تھی۔رہانے نے 2011 سے 2023 تک پھیلے اپنے 12 سالہ بین الاقوامی کیریئر میں 85 ٹیسٹ میچوں میں 38.46 کی اوسط سے 5077 رنز بنائے، جن میں 12 سنچریاں شامل ہیں۔ 90 ون ڈے میچوں میں انہوں نے 35.26 کی اوسط سے 2962 رنز اسکور کیے، جن میں تین سنچریاں شامل رہیں، جبکہ 20 ٹی-20 بین الاقوامی میچوں میں 20.83 کی اوسط اور 113.29 کے اسٹرائیک ریٹ سے 375 رنز بنائے۔انہوں نے ہندوستان کی قیادت چھ ٹیسٹ میچوں میں کی، جن میں سے ٹیم نے چار میں کامیابی حاصل کی جبکہ دو میچ ڈرا رہے۔