کامن ویلتھ گیمز: مرلی سری شنکر نے لانگ جمپ میں چاندی کا تمغہ جیت لیا

کامن ویلتھ گیمز 2026 میں بدھ کو ہندوستانی ایتھلیٹ مرلی سری شنکر نے مردوں کے لانگ جمپ مقابلے میں چاندی کا تمغہ جیت لیا۔ یہ مسلسل دوسرے کامن ویلتھ گیمز میں ان کا دوسرا تمغہ ہے۔ستائیس سالہ مرلی سری شنکر نے اپنی بہترین کوشش میں 8.09 میٹر کی چھلانگ لگائی۔ انہوں نے برمنگھم 2022 میں بھی چاندی کا تمغہ جیتا تھا۔ وہ جمیکا کے سابق عالمی چیمپئن تاجے گیل سے پیچھے رہے، جنہوں نے 8.15 میٹر کی چھلانگ لگا کر طلائی تمغہ اپنے نام کیا۔ اسکاٹ لینڈ کے اسٹیفن میکینزی نے 8.08 میٹر کے ساتھ کانسی کا تمغہ حاصل کیا۔
مقابلے کے نصف مرحلے تک سری شنکر سرفہرست تھے، لیکن چوتھے راؤنڈ میں تاجے گیل نے فیصلہ کن چھلانگ لگا کر سبقت حاصل کر لی۔ سری شنکر کی چھ کوششوں میں 8.03 میٹر، 8.09 میٹر، دو فاؤل، 7.94 میٹر اور 7.97 میٹر شامل تھے۔
اس مقابلے میں شریک دوسرے ہندوستانی ایتھلیٹ لوکیش ستیہ ناتھن نے اپنے پہلے ہی کامن ویلتھ گیمز میں 7.97 میٹر کی بہترین چھلانگ کے ساتھ پانچواں مقام حاصل کیا۔
یہ تمغہ سری شنکر کی واپسی کے سفر کا ایک اور اہم سنگ میل ثابت ہوا۔ گھٹنے کی چوٹ کے باعث وہ پیرس اولمپکس 2024 کے لیے کوالیفائی کرنے کے باوجود ان کھیلوں میں حصہ نہیں لے سکے تھے۔گلاسگو روانہ ہونے سے قبل وہ عمدہ فارم میں تھے اور سیزن کی اپنی بہترین 8.38 میٹر کی چھلانگ لگا چکے تھے۔
کامن ویلتھ گیمز کی لانگ جمپ میں یہ ہندوستان کا پانچواں تمغہ ہے، جبکہ مرلی سری شنکر واحد ہندوستانی ایتھلیٹ ہیں جنہوں نے اس مقابلے میں دو مرتبہ پوڈیم پر جگہ بنائی ہے۔ اس سے قبل سریش بابو (مردوں کا کانسی، 1978)، انجو بوبی جارج (خواتین کا کانسی، 2002) اور پرجوشا ملیاکل (خواتین کا چاندی، 2010) اس ایونٹ میں ہندوستان کے لیے تمغے جیت چکے ہیں۔گلاسگو 2026 میں ایتھلیٹکس میں ہندوستان کا یہ تیسرا تمغہ ہے۔ اس سے قبل سرویش کشارے نے ہائی جمپ اور گل ویر سنگھ نے 10000 میٹر دوڑ میں چاندی کے تمغے جیتے تھے۔
دوسری جانب قومی ریکارڈ ہولڈر پارل چودھری خواتین کی 3000 میٹر اسٹیپل چیس میں 9:26.75 منٹ کے وقت کے ساتھ پانچویں نمبر پر رہیں۔ کینیا کی فیتھ چیروٹچ نے 9:01.76 منٹ کے گیمز ریکارڈ کے ساتھ طلائی تمغہ حاصل کیا، جبکہ انگلینڈ کی ایلس تھورنر (9:05.45) اور یوگنڈا کی پیروتھ چیموتائی (9:09.96) بالترتیب چاندی اور کانسی کے تمغوں کی حقدار رہیں۔
پارل چودھری کو پوڈیم پر جگہ بنانے کا ایک اور موقع جمعرات کو 5000 میٹر دوڑ میں ملے گا۔
ادھر ہندوستان کی من پریت کور خواتین کے شاٹ پٹ مقابلے میں تمغہ جیتنے سے معمولی فرق سے محروم رہیں۔ انہوں نے 17.49 میٹر کی بہترین کوشش کے ساتھ چوتھا مقام حاصل کیا۔ کینیڈا کی سارا مٹن نے 19.88 میٹر کی تھرو کے ساتھ طلائی تمغہ جیتا، جبکہ نائیجیریا کی جیسیکا اوجی نے 17.87 میٹر کے ساتھ چاندی کا تمغہ حاصل کیا۔ جمائیکا کی لوئیڈریشیا کیمرون نے بھی اتنی ہی دوری تک گولا پھینکا، لیکن کاؤنٹ بیک اصول کی بنیاد پر انہیں کانسی کا تمغہ ملا۔
من پریت نے مقابلے کے دوران اپنی کارکردگی میں مسلسل بہتری دکھائی۔ انہوں نے 15.92، 16.66، 17.00، 16.89 اور 17.49 میٹر کی تھرو کیں، تاہم ان کی آخری کوشش فاؤل قرار پائی۔ وہ طویل عرصے تک تمغے کی دوڑ میں شامل رہیں، لیکن آخری راؤنڈ میں کیمرون نے بہتر تھرو کر کے انہیں پوڈیم سے باہر کر دیا۔
دریں اثنا، ہندوستان کے سنتوش کمار تملراسن اور یشس پلکش نے مردوں کی 400 میٹر ہرڈلز کے فائنل کے لیے تیز ترین نان آٹومیٹک کوالیفائر کے طور پر جگہ بنائی۔ سنتوش نے 49.51 سیکنڈ کے وقت کے ساتھ مجموعی طور پر ساتواں مقام حاصل کیا، جبکہ یشس نے 49.65 سیکنڈ میں ریس مکمل کی۔