پستہ ہاؤس اور پائریٹس آف گرل میں چھاپہ، ایکسپائر مصالحے تلف، ہزاروں کی غذائی اشیا ضبط

پٹنہ، 10 اکتوبر: بہار میں عوام کو محفوظ غذا فراہم کرنے کے دعووں کے درمیان پٹنہ کے معروف فوڈ اداروں میں غذائی تحفظ کے ضابطوں کی خلاف ورزیوں کا انکشاف ہوا ہے۔ محکمہ غذائی تحفظ کی ٹیم نے ایس پی ورما روڈ پر واقع پستہ ہاؤس، پائریٹس آف گرل اور دیگر اداروں کا اچانک معائنہ کیا۔ کارروائی کے دوران ایکسپائر مصالحے تلف کیے گئے، غذائی اشیا ضبط کی گئیں اور کئی نمونے جانچ کے لیے لیبارٹری بھیجے گئے۔
پستہ ہاؤس سے 15 کلو خشک چیری، 42 کلو خشک انناس، 32 کلو خشک ادرک اور 7.5 کلو ڈیٹس پیسٹ ضبط کیا گیا، جس کی تخمینی قیمت 56,400 روپے بتائی گئی ہے۔ ڈیٹس پیسٹ کی برانڈنگ میں بے ضابطگی اور درآمد شدہ غذائی اشیا پر ضروری تفصیلات درج نہ ہونے کی خامیاں بھی سامنے آئیں۔اس کے علاوہ ایم ڈی ایچ تندوری مصالحے کے 66 اور گرم مصالحے کے 51 ایکسپائر پیکٹ تلف کیے گئے، جن کی مجموعی قیمت 12,027 روپے بتائی گئی ہے۔ معائنے میں سبزی اور گوشت کی اشیا ایک ساتھ رکھنے، فریزر میں مناسب روشنی کی کمی، کیڑے مکوڑوں پر قابو پانے کے انتظامات اور پانی کی جانچ رپورٹ دستیاب نہ ہونے جیسی خامیاں بھی پائی گئیں۔
پائریٹس آف گرل سے پانچ کلو لال مرچ پاؤڈر، پانچ کلو دھنیا پاؤڈر اور سونٹھ پاؤڈر کے تین پیکٹ ضبط کیے گئے۔ دستیاب رپورٹ کے مطابق ان اشیا کی درج شدہ قیمتیں بالترتیب 62,500، 4,500 اور 1,050 روپے ہیں۔ معائنے میں باورچی خانے کی نکاسی آب میں پانی جمع ہونے اور فریزر میں سبزی و گوشت کی اشیا ایک ساتھ رکھنے کی خامیاں سامنے آئیں۔ بل پر ایف ایس ایس اے آئی لائسنس یا رجسٹریشن نمبر درج نہ ہونے کی بات بھی رپورٹ میں شامل ہے۔دلچسپ بات یہ ہے کہ ادارے کی خودکار معائنہ رپورٹ میں 116 میں سے 112 نمبر، یعنی 97 فیصد درج کیے گئے، اس کے باوجود بعض امور میں اصلاح کی ہدایت دی گئی۔
محکمہ کی ٹیم نے بَـرگر سنگھ ہاؤس سمیت دیگر فوڈ اداروں سے بھی معائنے کے دوران ساس، مایونیز، پنیر، بادام، لال مرچ پاؤڈر اور دیگر غذائی اشیا کے نمونے جمع کیے۔ انہیں معیار کی جانچ کے لیے لیبارٹری بھیجنے کی کارروائی کی گئی ہے۔محکمہ غذائی تحفظ کے سکریٹری اور کمشنر کمار روی کی ہدایت پر یہ کارروائی کی گئی۔ متعلقہ اداروں کو صفائی، محفوظ اسٹوریج اور غذائی تحفظ کے ضابطوں پر عمل کرنے کی ہدایت دی گئی ہے۔ ضبط شدہ اشیا کے علاوہ دیگر نمونوں کی لیبارٹری رپورٹ آنے کے بعد ہی ان کے معیار سے متعلق حتمی نتیجہ اخذ کیا جا سکے گا۔