مواد پر جائیں
AWAZ E BIHAR
بہار

بہار میں تین دہائی پہلے بدحالی تھی، آج سرمایہ کاری اور ترقی کی بات ہو رہی ہے: نریندر مودی

Awaz E Bihar6 منٹ کی پڑھائی

مسٹر مودی نے کہا کہ بہار میں سڑکوں کے نیٹ ورک کے ساتھ توانائی اور شہری ترقی کے شعبوں میں بھی تیزی سے تبدیلی آ رہی ہے۔

حاجی پور، 21 نومبر (اے بی این) وزیر اعظم نریندر مودی نے جمہوریت کی ماں ویشالی کی سرزمین سے ہفتہ کو کہا کہ تقریباً تین دہائی پہلے بہار بدحالی اور بدانتظامی کے دور سے گزر رہا تھا، لیکن قومی جمہوری اتحاد (این ڈی اے) کی حکومت میں آج ریاست کی شناخت ترقی، سرمایہ کاری اور بہتر حکمرانی سے ہو رہی ہے۔

مسٹر مودی نے کہا کہ جس بہار میں پہلے گھپلوں اور جرائم کی باتیں ہوتی تھیں، وہاں آج سرمایہ کاری کے اعداد و شمار اور مجرموں کے خلاف کارروائیوں کا ذکر ہو رہا ہے۔ ڈبل انجن کی حکومت بہار کو مضبوط، خوشحال اور خود کفیل بنانے کے عزم کے ساتھ آگے بڑھ رہی ہے۔

وزیر اعظم نے آج ویشالی میں منعقدہ تقریب سے خطاب کرتے ہوئے کہا کہ بہار کے ترقیاتی سفر میں سب کا ساتھ، سب کا وکاس کے منتر کو بنیاد بنایا گیا ہے۔ جمہوریت کی طاقت کو عوامی فلاح و بہبود کا ذریعہ بنایا گیا ہے۔ انہوں نے کہا کہ حکومت کے ایک سال مکمل ہو چکے ہیں اور اس اہم تقریب کے لیے جمہوریت کی عظیم سرزمین ویشالی کا انتخاب کیا گیا ہے۔ انہوں نے ویشالی اور بہار کی مٹی کو سلام پیش کرتے ہوئے این ڈی اے کی تمام اتحادی جماعتوں، لاکھوں کارکنوں اور بہار کے عوام کو مبارک باد دی۔

وزیر اعظم نے وزیر اعلیٰ نتیش کمار کے طویل دور اقتدار کی ستائش کرتے ہوئے کہا کہ انہوں نے برسوں تک وزیر اعلیٰ کی حیثیت سے بہار کی خدمت کی اور ریاست میں بہتر حکمرانی کا ایک نیا اعتماد پیدا کیا۔ اب ان کی سرپرستی میں وزیر اعلیٰ سمراٹ چودھری اور ان کی پوری ٹیم ترقی کے اس مشن کو آگے بڑھا رہی ہے۔

مسٹر مودی نے کہا کہ بہار میں گزشتہ ایک سال کے دوران دو لاکھ کروڑ روپے سے زیادہ کی سرمایہ کاری کے معاہدے کیے گئے ہیں۔ گیا میں چھ ہزار کروڑ روپے کے اسٹیل پروجیکٹ پر کام شروع ہو رہا ہے۔ موتیہاری سمیت بند پڑی چینی ملوں کو دوبارہ شروع کرنے کے لیے نئی گنا ترغیبی پالیسی متعارف کرائی گئی ہے۔ کسانوں کے مفاد میں ہر کھیت تک آبپاشی کے لیے 12 گھنٹے بجلی فراہم کرنے کا تاریخی فیصلہ کیا گیا ہے۔ اس دوران 200 سے زیادہ نئے ڈگری کالج شروع کیے گئے ہیں اور طالبات کے لیے ماں سیتا مہیلا یونیورسٹی کے قیام کو منظوری دی گئی ہے۔

وزیر اعظم نے کہا کہ بہار کی ترقیاتی فہرست اتنی طویل ہے کہ کسی ایک پلیٹ فارم سے اس کے تمام منصوبوں کا ذکر کرنا ممکن نہیں ہے۔ ریاست کی ترقی کو یہاں آکر ہی محسوس کیا جا سکتا ہے۔ شمالی بہار سے لے کر نالندہ، گیا، شاہ آباد، کیمور اور راجدھانی پٹنہ تک ترقی کی نئی داستان لکھی جا رہی ہے۔

انہوں نے کہا کہ ویشالی میں دریائے گنگا پر تعمیر کچا درگاہ-بیدوپور چھ لین کیبل پل عوام کے نام وقف کیا گیا ہے۔ سابق وزیر اعلیٰ نتیش کمار کے اعزاز میں اس پل کا نام رکھا گیا ہے۔ اس سے پٹنہ اور ویشالی کے درمیان آمد و رفت آسان ہوگی اور کسانوں کی فصلوں، پھلوں، سبزیوں، دودھ اور دہی کو بڑی منڈیوں تک پہنچانے میں سہولت ملے گی۔ طلبہ کی تعلیم اور بزرگوں کے علاج کے لیے بھی آمد و رفت آسان ہو جائے گی۔ اس کے ساتھ ہی اورنگ آباد-جوردار چھ لین شاہراہ کا بھی افتتاح کیا گیا ہے۔

مسٹر مودی نے کہا کہ بہار میں سڑکوں کے نیٹ ورک کے ساتھ توانائی اور شہری ترقی کے شعبوں میں بھی تیزی سے تبدیلی آ رہی ہے۔ بکسر تھرمل پاور پلانٹ اور اس کے بجلی ترسیلی نظام سے متعلق منصوبوں کا سنگ بنیاد رکھا گیا ہے۔ پھلواریا ڈیم پر شمسی توانائی پلانٹ جیسے منصوبے بھی ریاست کی توانائی کی صلاحیت میں اضافہ کریں گے۔ انہوں نے کہا کہ ایک وقت تھا جب بہار کے ہزاروں گاؤں بجلی سے محروم تھے، لیکن آج یہی ریاست بجلی کی پیداوار کا ایک بڑا مرکز بنتی جا رہی ہے۔ شہری ٹرانسپورٹ کو بہتر بنانے کے لیے 100 جدید پی ایم ای بسوں کو ہری جھنڈی دکھا کر روانہ کیا گیا ہے۔پردھان منتری آواس یوجنا کے تحت ہزاروں غریب خاندانوں کو پکے مکانات کی چابیاں بھی سونپی گئی ہیں۔

وزیر اعظم نے غریبوں کی فلاح و بہبود کا ذکر کرتے ہوئے کہا کہ مرکزی حکومت نے گزشتہ 12 برسوں میں 50 کروڑ لوگوں کو غربت سے باہر نکالا ہے۔ یہ حکومت کے عزم اور غریبوں کی فلاح و بہبود کے لیے چلائی جانے والی اسکیموں کا نتیجہ ہے۔ 80 کروڑ لوگوں کو مفت اناج فراہم کیا گیا ہے۔ غریب خاندانوں کو پکے مکانات، بیت الخلا، بجلی اور پانی کی سہولیات فراہم کرکے ان کی زندگی کو باوقار بنایا گیا ہے۔ آیوشمان بھارت یوجنا کے ذریعے مہنگے علاج کے اخراجات سے راحت فراہم کی گئی ہے۔

انہوں نے کہا کہ بہار میں ڈبل انجن کی حکومت نے غریبوں کی فلاح و بہبود کے لیے پوری محنت سے کام کیا ہے۔ ریاست میں 43 لاکھ خاندانوں کو پکے مکانات فراہم کیے گئے ہیں اور صرف اگست میں مزید 11 لاکھ مکانات کی منظوری دی گئی ہے۔ بہار کے تقریباً 75 لاکھ کسانوں کے کھاتوں میں پردھان منتری کسان سمان ندھی کے تحت ہزاروں کروڑ روپے منتقل کیے گئے ہیں۔ سیلف ہیلپ گروپس سے وابستہ دیہی خواتین کو ملنے والی مدد کے نتیجے میں ریاست کی 50 لاکھ خواتین لکھ پتی دیدی بن چکی ہیں۔

مسٹر مودی نے کانگریس کو نشانہ بناتے ہوئے کہا کہ کانگریس غریبی ہٹاؤ کا نعرہ دے کر غریبوں کو گمراہ کرتی رہی، جبکہ ان کی حکومت نے غریبوں کی زندگی آسان بنانے اور انہیں بنیادی سہولیات فراہم کرنے کو ترجیح دی ہے۔ اس سے غریبوں میں خود اعتمادی بڑھی ہے اور وہ غربت سے باہر نکل کر آگے بڑھ رہے ہیں۔

وزیر اعظم نے تقریب میں موجود نوجوانوں کے جوش و خروش کی ستائش کرتے ہوئے کہا کہ بہار کے نوجوان ترقی کی اہمیت کو سمجھتے ہیں اور ان کا جوش و جذبہ ریاست کے روشن مستقبل کی علامت ہے۔ انہوں نے کہا کہ اب بہار کو نہ رکنا ہے اور نہ تھکنا ہے۔ این ڈی اے کے تمام اتحادیوں کو مل کر مضبوط، خوشحال اور خود کفیل بہار کی تعمیر کے لیے مسلسل کام کرنا ہوگا۔

اس موقع پر وزیر اعلیٰ سمراٹ چودھری نے کہا کہ بہار وزیر اعظم کے ترقی یافتہ ہندوستان کے عزم کے ساتھ آگے بڑھ رہا ہے اور ریاست کی خوشحالی کے ذریعے ہی اس ہدف کو حاصل کرنا ممکن ہوگا۔ نائب وزیر اعلیٰ وجے چودھری نے بہار کے دریاؤں کو خوشحالی سے جوڑنے اور مرکز و ریاست کے باہمی تعاون سے دریاؤں میں گاد کے انتظام کے حوالے سے بات کی۔ حاجی پور کے مقامی رکن پارلیمنٹ اور مرکزی وزیر چراغ پاسوان نے وزیر اعظم کا اپنے حلقے میں آنے پر شکریہ ادا کیا اور کہا کہ وہ اپنے والد رام ولاس پاسوان کے خوابوں کو آگے بڑھا رہے ہیں۔