بہار میں رشوت خور انجینئر پر ویجلنس کا بڑا شکنجہ

پٹنہ: بہار کے نگرانی تحقیقاتی بیورو نے سڑک تعمیرات محکمہ کے مدھوبنی روڈ ڈویژن میں تعینات ایگزیکٹیو انجینئر ریتیش چندر سنہا کو مبینہ طور پر پانچ لاکھ روپے رشوت لیتے ہوئے گرفتار کیا ہے۔ کارروائی پٹنہ کے رام نگری، آشیانہ واقع ان کے فلیٹ میں کی گئی۔

نگرانی بیورو کے مطابق یہ کارروائی روہتاس ضلع کے ڈہری آن سون کے ٹھیکیدار ارون کمار سنگھ کی شکایت پر کی گئی۔ شکایت میں الزام لگایا گیا تھا کہ مدھوبنی ڈویژن میں دو سڑکوں کی تعمیر کے بعد بقایا 6.50 کروڑ روپے کی ادائیگی کے عوض انجینئر نے تین فیصد کمیشن کے حساب سے 19.50 لاکھ روپے کا مطالبہ کیا تھا۔ اس میں پانچ لاکھ روپے پیشگی دینے پر اتفاق ہوا تھا۔

بیورو کی ٹیم کے مطابق چھاپے کے دوران ملزم نے رقم کھڑکی سے باہر پھینک دی، جسے ٹیم نے برآمد کرلیا۔ فلیٹ کی تلاشی میں 6 لاکھ 11 ہزار 900 روپے نقد، سونے چاندی کے زیورات، سات بینک کھاتوں کے دستاویزات، شیئرز، ایل آئی سی، زمین اور فلیٹ میں سرمایہ کاری سے متعلق کاغذات اور لاکر کی چابیاں بھی ملیں۔

نگرانی بیورو کے مطابق ملزم سے پوچھ گچھ کے بعد انہیں خصوصی نگرانی عدالت میں پیش کیا جائے گا۔

بیورو کی جاری کردہ رپورٹ کے مطابق سال 2026 میں اب تک رشوت خوری کے 121 ٹریپ کیس درج کیے گئے ہیں اور 120 ملزمان کو رشوت لیتے گرفتار کیا گیا ہے۔

اس کارروائی کے بعد ایک بار پھر سرکاری محکموں میں بدعنوانی کی روک تھام اور ٹھیکوں کی ادائیگی کے نظام میں شفافیت کو یقینی بنانے کا معاملہ اہمیت اختیار کرگیا ہے۔ تاہم، گرفتار انجینئر کے خلاف الزامات کی حتمی حیثیت کا فیصلہ عدالتی کارروائی کے بعد ہوگا۔