دیوالی پر وکست بہار بنانے کی سمراٹ چودھری کی اپیل

وزیر اعلیٰ سمراٹ چودھری نے دیوالی کے موقع پر ریاست کے عوام کو دلی مبارک باد دیتے ہوئے سبھی کی زندگی میں خوشی، امن، خوشحالی اور نئی امیدوں کی روشنی پھیلنے کی پرارتھنا کی ہے۔

وزیر اعلیٰ نے ایودھیا میں چراغوں کی جگمگاتی قطاروں کا ذکر کرتے ہوئے بھگوان شری رام کے اصولوں کو اپنی زندگی میں اپنانے اور ترقی یافتہ، خوشحال اور روشن مستقبل کی تعمیر کا عزم کرنے کی اپیل کی ہے۔

مسٹر چودھری نے اتوار کو سوشل میڈیا پلیٹ فارم 'ایکس' پر جاری اپنے پیغام میں کہا کہ چراغوں کی قطاروں سے ایودھیا شہر جگمگا رہا ہے اور بھگوان شری رام کے اصولوں سے وہاں کے لوگوں کی زندگی روشن ہو رہی ہے۔ انہوں نے اپنشد کے پیغام 'اسَتو ما سَدگَمَئے' کے جذبے کے مطابق 'مجھے اندھیرے سے روشنی کی طرف لے چلو' کا ذکر کرتے ہوئے دیوالی کو زندگی میں مثبت سوچ اور نئی امیدیں پیدا کرنے والا تہوار قرار دیا۔

وزیر اعلیٰ نے کہا کہ یہ دیوالی سبھی کی زندگی میں خوشیاں، امن، خوشحالی اور نئی امیدیں لے کر آئے۔ انہوں نے لوگوں سے اس مقدس تہوار پر خوشی اور مسرت کے چراغ جلانے کے ساتھ ساتھ ترقی یافتہ، خوشحال اور روشن مستقبل کی تعمیر کا عزم کرنے کی اپیل کی۔ انہوں نے ریاست کے عوام کو دیوالی کی دلی مبارک باد بھی دی۔

واضح رہے کہ دیوالی ہندو مذہب کا ایک اہم روشنی کا تہوار ہے۔ مذہبی عقائد کے مطابق، بھگوان شری رام 14 سال کا بن باس مکمل کرنے اور راون پر فتح حاصل کرنے کے بعد ماتا سیتا اور بھائی لکشمن کے ساتھ ایودھیا واپس آئے تھے۔ ان کی آمد کی خوشی میں ایودھیا کے لوگوں نے چراغ جلا کر جشن منایا تھا۔ یہ تہوار اندھیرے پر روشنی، جھوٹ پر سچائی اور برائی پر اچھائی کی فتح کی علامت سمجھا جاتا ہے۔