چین نے پہلی بار این ویڈیا ایچ 200 چپ کی درآمدات کی منظوری دی

چین نے این ویڈیا کے ایچ 200 مصنوعی ذہانت چِپ کی پہلی کھیپ کی درآمد کی منظوری دے دی ہے، جو اس بات کی نشاندہی کرتی ہے کہ بیجنگ اپنی اے آئی ضروریات اور ملکی ترقی کو فروغ دینے کے درمیان توازن قائم کرنے کی کوشش میں ہے۔
غیر ملکی میڈیا کے مطابق دو ذرائع نے اپنی شناخت خفیہ رکھنے کی شرط پر رائٹرز کو بتایا ہے کہ بائٹ ڈانس، علی بابا اور ٹینسینٹ کو مجموعی طور پر چار لاکھ سے زائد ایچ200 چِپس خریدنے کی منظوری دی گئی ہے، جبکہ دیگر ادارے بھی اگلی منظوریوں کے لیے قطار میں شامل ہو رہے ہیں۔
ذرائع کے مطابق یہ منظوری اس دوران دی گئی جب این ویڈیا کے چیف ایگزیکٹو جینسن ہوانگ اس ہفتے چین کے دورے پر تھے۔
چین کی وزارت برائے صنعت و تجارت اور این ویڈیا دونوں نے اس پر تبصرہ کرنے سے گریز کیا ہے۔ بائٹ ڈانس، علی بابا اور ٹینسینٹ نے بھی اس حوالے سے کوئی اعلان جاری نہیں کیا۔
این ویڈیا کی دوسری سب سے طاقتور اے آئی چِپ ایچ 200 کا معاملہ، امریکہ اور چین کے تعلقات میں کشیدگی کا موجب بنا تھا۔
چینی کمپنیوں کی جانب سے بلند سطح کی مانگ اور برآمدات کے لیے امریکی منظوری کے باوجود، درآمدات کی اجازت دینے میں بیجنگ کی ہچکچاہٹ سب سے بڑی رکاوٹ بنی رہی۔
اس ماہ کے اوائل میں امریکہ نے باضابطہ طور پر این ویڈیا کو ایچ200 چین کو بیچنے کی راہ ہموار کر دی تھی۔ تاہم، حتمی فیصلہ چینی حکام کے ہاتھ میں تھا۔
حالیہ ہفتوں میں یہ واضح نہیں تھا کہ بیجنگ منظوری دے گا یا نہیں، کیونکہ حکومت جدید اے آئی چِپس کی بڑھتی ہوئی مقامی طلب کو پورا کرنے اور ملکی سیمی کنڈکٹر صنعت کے درمیان توازن قائم کرنا چاہتی ہے۔
چینی کسٹم حکام نے ایجنٹس کو کہا کہ ایچ 200 چِپس کو چین میں داخل ہونے کی اجازت نہیں ہے۔
لیکن چینی ٹیکنالوجی کمپنیوں نے دو ملین سے زائد ایچ 200 چِپس کے آرڈر دے رکھے ہیں، جو این ویڈیا کے دستیاب اسٹاک سے کہیں زیادہ ہیں۔
یہ اب بھی غیر یقینی ہے کہ آئندہ کھیپوں میں مزید کتنی کمپنیوں کو منظوری ملے گی یا بیجنگ اہلیت کا تعین کرنے کے لیے کون سے معیار استعمال کر رہا ہے۔
ہوانگ گزشتہ جمعہ کو این ویڈیا کے چین کے ملازمین کے ساتھ روایتی سالانہ تقریبات کے لیے شنگھائی پہنچے اور اس کے بعد انہوں نے بیجنگ اور دیگر شہروں کا سفر کیا۔
ایچ 200 کی منظوریوں سے اشارہ ملتا ہے کہ بیجنگ بڑی چینی انٹرنیٹ کمپنیوں کی ضروریات کو ترجیح دے رہا ہے، جو اے آئی خدمات کو تیار کرنے اور اوپن اے آئی سمیت امریکی حریفوں کے ساتھ مقابلہ کرنے کے لیے ڈیٹا سینٹر بنانے پر اربوں ڈالر خرچ کر رہی ہیں۔
اگرچہ چینی کمپنیاں، جیسے ہواوی، اب ایسی مصنوعات تیار کرتی ہیں جو این ویڈیا کی چِپ کارکردگی کے قریب ہے تا ہم پھر بھی ایچ 200 کے مقابلے میں کافی پیچھے ہیں۔
ایچ 200 این ویڈیا کی ایچ 20 چِپ کے مقابلے میں تقریباً چھ گنا بہتر کارکردگی مہیا کرتی ہے۔ اس کے باوجود، بیجنگ نے غیر ملکی سیمی کنڈکٹرز کی درآمد کی منظوری کے بدلے کمپنیوں سے مقامی چِپس کے ایک مخصوص کوٹے کو خریدنے کا تقاضا کرنے پر بات چیت کی ہے۔