اننت سنگھ کی بیٹی کی شادی کی تقریبات کا آغاز، 25 نومبر کو ہوگی شاہانہ تقریب

پٹنہ:(اے بی این) مکامہ کے رکن اسمبلی اننت سنگھ کی بیٹی شیوانگی سنگھ کی شادی کی تقریبات کا آغاز روایتی مذہبی رسومات کے ساتھ ہوگیا ہے۔ اننت سنگھ کی اہلیہ اور مکہما کی سابق رکن اسمبلی نیلم دیوی نے پیر کو اپنی کل دیوی ماں برہمنی کے چرنوں میں بیٹی کی شادی کا پہلا دعوت نامہ پیش کیا۔ اس کے ساتھ ہی 25 نومبر کو ہونے والی شادی کی تقریبات کا باقاعدہ آغاز ہوگیا ہے۔ اس شادی کو لے کر علاقے میں ابھی سے خاصی گہماگہمی ہے۔نیلم دیوی نے اپنے سوشل میڈیا اکاؤنٹ پر ایک ویڈیو شیئر کرکے اس رسم کی اطلاع دی۔ ویڈیو میں وہ بیٹی کی شادی کا دعوت نامہ کل دیوی کو پیش کرتی نظر آرہی ہیں۔ انہوں نے دیوی ماں سے دعا کی کہ بیٹی کی شادی خوشی و مسرت کے ساتھ اور بغیر کسی رکاوٹ کے مکمل ہو۔

اننت سنگھ نے بیٹی کی شادی کے موقع پر اپنے آبائی گاؤں ندوٰاں، واقع سیلاب زدہ علاقے باڑھ، میں گھڑ دوڑ مقابلے کا بھی اہتمام کیا ہے۔ 25 نومبر کو دوپہر 2 بجے سے شام 4 بجے تک ہونے والے اس مقابلے میں ملک بھر کے نامور گھوڑوں اور گھڑ سواروں کی شرکت متوقع بتائی جارہی ہے۔مقابلے کے فاتحین کے لیے خصوصی انعامات رکھے گئے ہیں۔ پہلی پوزیشن حاصل کرنے والے کو تھار گاڑی، دوسرے نمبر پر آنے والے کو موٹر سائیکل اور تیسرے مقام پر رہنے والے کو اسکوٹی دی جائے گی۔ اننت سنگھ کو گھڑ سواری کا شوق ہے اور ان کے پاس بھی گھوڑے ہیں۔ اسی شوق کے تحت انہوں نے شادی کی تقریب کو مزید دلچسپ بنانے کے لیے اس مقابلے کا اہتمام کیا ہے۔

اننت سنگھ کی بیٹی شیوانگی سنگھ کی شادی رِشیکیش کمار سے طے ہوئی ہے، جو امریکہ میں مقیم ہیں اور وہیں سے ایم بی اے کی تعلیم حاصل کی ہے۔ ان کا خاندان پٹنہ ضلع کے بہٹا کا رہنے والا ہے۔ رِشیکیش کے والد رنوَجے سنگھ سی آر پی ایف میں کمانڈنٹ ہیں۔ ان کا گھر بہٹا کے کرشن نگر میں ہے، جبکہ وہ بنیادی طور پر گھوڑا ٹاپ گاؤں کے رہنے والے ہیں۔اننت سنگھ اپنی بیٹی کی شادی اپنے آبائی گاؤں ندوٰاں میں کریں گے۔ گاؤں میں ایک وسیع پنڈال کی تعمیر کا کام شروع ہوچکا ہے۔ مقامی لوگوں کے مطابق تقریباً 10 بیگھہ زمین پر ٹینٹ لگائے جارہے ہیں۔ اس کے لیے اترپردیش کے مئو سے ٹینٹ کے کاریگروں کو بلایا گیا ہے۔شادی میں اننت سنگھ کے رشتہ داروں، دوستوں، واقف کاروں اور حامیوں کو دعوت نامے بھیجے جارہے ہیں۔ مقامی لوگوں کی جانب سے اس تقریب میں پانچ سے دس لاکھ افراد کی شرکت کا دعویٰ کیا جارہا ہے، تاہم مہمانوں کی اصل تعداد کا اندازہ تقریب کے وقت ہی ہوسکے گا۔