تعلیمی افسر روبی کماری کے ٹھکانوں پر ای او یو کا چھاپہ، 2.80 لاکھ نقد اور 220 گرام سونا برآمد

کٹہار، 4 نومبر: بہار کے کشن گنج میں تعینات محکمہ تعلیم کی ضلع پروگرام افسر روبی کماری کے ٹھکانوں پر منگل کو اقتصادی جرائم یونٹ (ای او یو) کی چھاپہ ماری میں کئی اہم انکشافات ہوئے ہیں۔ آمدنی سے زائد اثاثے جمع کرنے کے معاملے میں کی گئی اس کارروائی کے دوران تقریباً 2 لاکھ 80 ہزار روپے نقد، 220 گرام سونے کے زیورات، دیگر قیمتی زیورات، 11 زمینوں کے کاغذات اور مختلف بینک کھاتوں سے متعلق دستاویزات برآمد کی گئی ہیں۔ ابتدائی اندازے کے مطابق سونے کے زیورات کی قیمت 60 لاکھ روپے سے زیادہ بتائی جارہی ہے۔

روبی کماری پہلے کٹہار ضلع میں محکمہ تعلیم کی ضلع پروگرام افسر کے عہدے پر تعینات تھیں، جبکہ فی الحال ان کی پوسٹنگ کشن گنج میں ہے۔ ای او یو نے ان کے اور ان کے شوہر گورو کمار گپتا کے خلاف آمدنی سے زائد اثاثے جمع کرنے کے الزامات میں درج مقدمے کی بنیاد پر یہ کارروائی کی۔

صبح ساڑھے آٹھ بجے شروع ہوئی چھاپہ ماری

ای او یو کے ڈی ایس پی متھیلیش کمار جیسوال کے مطابق، قابل اعتماد ذرائع سے حاصل معلومات کی بنیاد پر روبی کماری کے خلاف اقتصادی جرائم کا مقدمہ درج کیا گیا تھا۔ اس کے بعد پٹنہ کی خصوصی عدالتِ نگرانی سے تلاشی کا وارنٹ حاصل کرکے منگل کو کٹہار اور کشن گنج میں بیک وقت چھاپہ ماری کی گئی۔

کٹہار کے اسسٹنٹ تھانہ علاقے کی آفیسرز کالونی میں واقع ان کے دو الگ الگ ٹھکانوں پر صبح تقریباً 8:30 بجے تلاشی شروع ہوئی، جو شام 4:10 بجے تک جاری رہی۔ کٹہار میں آٹھ رکنی ٹیم کے ساتھ مجسٹریٹ، مقامی پولیس افسران اور ای او یو کے اہلکار موجود تھے۔ پوری کارروائی کے لیے پانچ ٹیمیں تشکیل دی گئی تھیں۔

الماری کا تالا توڑنے کے لیے بلانا پڑا مزدور

تلاشی کے دوران گھر میں رکھے گودریج کی الماری میں موجود سامان تک پہنچنے کے لیے باہر سے ایک مزدور کو بلانا پڑا، جس نے تالا توڑ کر ٹیم کو سامان کی جانچ میں مدد دی۔ دوسری جانب برآمد سونے اور دیگر دھاتوں کے زیورات کی قیمت کا اندازہ لگانے کے لیے مرچائی باڑی سے زیورات کے تاجروں کو بلایا گیا۔ انہوں نے موقع پر پہنچ کر زیورات کی جانچ اور قیمت کے تعین میں تعاون کیا۔

11 زمینوں کے کاغذات، بینک کھاتوں کی بھی جانچ

چھاپہ ماری میں 11 مختلف زمینوں کے دستاویزات ملنے کو اہم برآمدگی قرار دیا جارہا ہے۔ اس کے علاوہ مختلف بینکوں کے کھاتوں سے متعلق کاغذات اور الگ الگ قسطوں میں رقم جمع کرانے کی رسیدیں بھی برآمد ہوئی ہیں۔ تاہم ان زمینوں کی مجموعی قیمت اور ان سے وابستہ اثاثوں کی مالیت کا حتمی تعین ابھی نہیں ہوا ہے۔

ڈی ایس پی متھیلیش کمار جیسوال کے مطابق زمینوں کے دستاویزات اور دیگر اثاثوں کی محکمہ جاتی سطح پر جانچ اور قیمت کا تعین کیا جارہا ہے۔ یہ عمل مکمل ہونے کے بعد ای او یو کی جانب سے تفصیلی پریس ریلیز جاری کی جائے گی۔

آمدنی سے 87.49 فیصد زائد اثاثے جمع کرنے کا ابتدائی اندازہ

اقتصادی جرائم یونٹ کی جانب سے جاری پریس ریلیز کے مطابق ابتدائی جانچ میں روبی کماری اور ان کے شوہر گورو کمار گپتا کے پاس معلوم اور جائز ذرائع آمدنی سے 2 کروڑ 45 لاکھ 84 ہزار روپے زائد کے اثاثے جمع کرنے کے ابتدائی شواہد ملے ہیں۔ یہ رقم ان کی معلوم آمدنی سے تقریباً 87.49 فیصد زیادہ بتائی گئی ہے۔

اسی بنیاد پر انسدادِ بدعنوانی قانون 1988 (ترمیم شدہ) کی دفعہ 13(1)(بی) اور 13(2) کے تحت مقدمہ درج کیا گیا ہے۔ خصوصی عدالتِ نگرانی، پٹنہ سے تلاشی کی اجازت ملنے کے بعد یہ کارروائی عمل میں آئی۔

اثاثوں کی حتمی مالیت کا انتظار

فی الحال ای او یو کی ٹیم برآمد نقد رقم، سونے چاندی سمیت دیگر دھاتوں کے زیورات، زمینوں کے کاغذات اور بینک کھاتوں کی تفصیلی جانچ کررہی ہے۔ خاص طور پر 11 زمینوں کی قیمت کا تعین ہونا باقی ہے۔ محکمہ جاتی جائزے اور دستاویزات کی جانچ مکمل ہونے کے بعد ہی یہ واضح ہوسکے گا کہ ان اثاثوں کی مجموعی مالیت کتنی ہے اور آمدنی سے زائد اثاثوں کے معاملے میں ان کا کتنا حصہ ہے۔