بھگونت مان حکومت کے اچھے کاموں کو روکنے کے لیے بی جے پی کا آپریشن لوٹس شروع: آپ

عام آدمی پارٹی (آپ) نے پنجاب سے پارٹی کے سات راجیہ سبھا ممبران پارلیمنٹ کے بھارتیہ جنتا پارٹی (بی جے پی) میں شامل ہونے پر سخت ردعمل ظاہر کرتے ہوئے کہا کہ بی جے پی نے ریاست میں بھگونت مان حکومت کے اچھے کاموں کو روکنے کے لیے آپریشن لوٹس شروع کر دیا ہے۔آپ کے سینئر لیڈر اور راجیہ سبھا رکن پارلیمنٹ سنجے سنگھ نے جمعہ کو پریس کانفرنس میں کہا کہ بی جے پی کا آپریشن لوٹس، گھٹیا سیاست کا کھیل اور پنجاب کی بھگونت مان حکومت کے اچھے کاموں کو روکنے کی سازش بڑے پیمانے پر شروع ہو گئی ہے۔ پنجاب میں وزیر اعلیٰ بھگونت مان کی قیادت والی "آپ" حکومت 300 یونٹ بجلی مفت دیتی ہے اور وہاں کے بچوں کو اچھی تعلیم دے رہی ہے۔ پنجاب حکومت 30 سال سے سوکھی پڑی نہروں میں پانی پہنچانے کا کام کرتی ہے، دلت اور آدیواسی سماج سے آنے والی خواتین کو 1500 روپے اور ماؤں بہنوں کے کھاتے میں ہر ماہ 1000 روپے پہنچانے کا کام کرتی ہے، پنجاب کے کسی بھی شخص کو سنگین سے سنگین بیماری ہو جانے پر 10 لاکھ روپے تک کا مفت علاج کرانے کا کام کرتی ہے۔مسٹر سنگھ نے کہا کہ ایسا بہترین کام کرنے والی بھگونت مان اور عام آدمی پارٹی کی حکومت کو بی جے پی، نریندر مودی اور امت شاہ نے روکنے، توڑنے اور ان کے کام میں رکاوٹ ڈالنے کا کام کیا ہے۔ انہوں نے پنجاب کی عوام کو دھوکہ دیا ہے۔ آج انہوں نے عام آدمی پارٹی کے راجیہ سبھا کے سات ارکان پارلیمنٹ کو توڑ کر بی جے پی میں شامل کیا۔ یہ ساتوں نام پنجاب کی عوام کو یاد رکھنے چاہئیں۔ پنجاب کے ساتھ غداری کرنے والے ان لوگوں کو پنجاب کی عوام کبھی معاف نہیں کریں گے۔
انہوں نے کہا کہ راگھو چڈھا کو پارٹی نے ایم ایل اے بنایا، رکن پارلیمنٹ بنایا، کیا کچھ نہیں دیا؟ پنجاب کی عوام نے انہیں اتنا پیار دیا اور راجیہ سبھا میں پہنچایا، لیکن وہ بی جے پی کی گود میں پہنچ گئے۔ سندیپ پاٹھک کو پنجاب کی عوام کے پیار اور آشیرواد سے راجیہ سبھا پہنچنے کا موقع ملا اور پارٹی نے انہیں بڑی بڑی ذمہ داریاں دیں۔ راجیندر گپتا کو بھی پارٹی نے کہاں سے کہاں تک پہنچایا اور راجیہ سبھا بھیجا۔ مسٹر سنگھ نے بتایا کہ وکرم جیت سنگھ ساہنی، یونیورسٹی چلانے والے اشوک متل اور سواتی مالیوال؛ ان سبھی کو عام آدمی پارٹی اور پنجاب کی عوام نے زمین سے اٹھا کر ملک کی پارلیمنٹ میں پہنچانے کا کام کیا۔ اسی طرح ہربھجن سنگھ کو پنجاب کے لوگوں نے پیار اور آشیرواد دے کر پارلیمنٹ کے اندر پہنچایا۔ لیکن ان ساتوں لوگوں نے پنجاب کے عوام کی پیٹھ میں چھرا مارنے کا کام کیا ہے۔ انہوں نے پنجاب کے ساتھ غداری اور لوگوں کو دھوکہ دینے کا کام کیا ہے۔ ان لوگوں نے پنجاب کی ایک اچھی حکومت، جو عوام کے لیے کام کر رہی تھی، اسے روکنے اور اس میں رکاوٹ ڈالنے کا کام کیا ہے۔ پنجاب کے لوگ انہیں کبھی معاف نہیں کریں گے۔
آپ لیڈر نے کہا کہ پنجاب میں ایک اچھی حکومت چل رہی ہے، وزیر اعلیٰ بھگونت مان وہاں کے لوگوں کے لیے تعلیم، صحت، بجلی، پانی اور سرکاری ملازمتوں پر اتنا اچھا کام کر رہے ہیں، لیکن آج اس حکومت کے خلاف آپریشن لوٹس کا کھیل کھیلا جا رہا ہے۔ ہمارے ارکان پارلیمنٹ کو توڑا جا رہا ہے اور انہیں اپنی پارٹی میں شامل کیا جا رہا ہے۔ اس کے لیے ای ڈی اور سی بی آئی کا استعمال کیا جا رہا ہے۔