جادوپور یونیورسٹی پر تبصرے سے متعلق تنازعہ مین شدت، ممتا بنرجی کا وزیر اعظم پر جوابی حملہ

مغربی بنگال کی وزیر اعلیٰ ممتا بنرجی نے جادوپور یونیورسٹی کے طلبہ پر کیے گئے ایک تبصرہ کے حوالے سے وزیر اعظم نریندر مودی پر سخت حملہ کرتے ہوئے کہا کہ یہ ایک تعلیمی ادارے اور ذہین طلبہ کی توہین ہے۔ترنمول کانگریس کی سربراہ نے جمعہ کے روز اپنے واٹس ایپ چینل پر جاری ایک پیغام میں وزیر اعظم کی شائستگی اور آداب پر سوال اٹھاتے ہوئے کہا کہ جادوپور یونیورسٹی جیسے ممتاز ادارے کے طلبہ کے بارے میں اس طرح کی بات کہنا نامناسب ہے۔ممتا بنرجی نے کہا، یہ پوچھتے ہوئے افسوس ہو رہا ہے کہ کیا آپ کے نزدیک جادوپور یونیورسٹی کے باصلاحیت طلبہ کو بیان کرنے کا یہی طریقہ ہے؟ کیا آپ اس بہترین تعلیمی مرکز کی توہین تک جا سکتے ہیں؟ کیا آپ اتنی نچلی سطح تک گر چکے ہیں؟
یہ ردعمل اس وقت سامنے آیا جب وزیر اعظم نے جادوپور میں ایک انتخابی جلسے سے خطاب کرتے ہوئے یونیورسٹی کیمپس میں ملک مخالف نعرے لکھے جانے کا الزام لگایا تھا اور ریاستی حکومت پر ادارے کی وقار کے تحفظ میں ناکام رہنے کا دعویٰ کیا تھا۔ممتا بنرجی نے یونیورسٹی کی تعلیمی کامیابیوں کا ذکر کرتے ہوئے کہا کہ جادوپور یونیورسٹی مسلسل قومی سطح کی درجہ بندی میں اعلیٰ مقام حاصل کرتی رہی ہے۔ انہوں نے کہا کہ سوال کرنا اور تنقیدی سوچ تعلیم کا حصہ ہے، نہ کہ بد نظمی۔انہوں نے کہا کہ طلبہ کا احتجاج جمہوریت کا فطری اظہار ہے اور اسے جمہوری نظام کا حصہ سمجھا جانا چاہیے۔انہوں نے مزید کہا کہ حقیقی بد نظمی اختیارات کے غلط استعمال اور جوابدہی کی کمی سے پیدا ہوتی ہے۔ کسانوں کے مسائل، منی پور کی صورتحال اور دیگر امور کا حوالہ دیتے ہوئے انہوں نے مرکزی حکومت پر تنقید کی۔
ممتا بنرجی نے کہا، بد نظمی کا مطلب یہ ہے کہ انصاف کے بجائے بلڈوزر کو اقتدار کے ہتھیار کے طور پر استعمال کیا جائے۔ بد نظمی تب ہوتی ہے جب کسان مر رہے ہوں اور ان کی آواز کو دبایا جائے۔ بد نظمی کا مطلب یہ بھی ہے کہ میڈیا کا سامنا کرنے سے انکار کیا جائے، جوابدہی سے بچا جائے اور سوالوں کے جواب نہ دیے جائیں۔
انہوں نے سری اربندو گھوش کی روایت کا حوالہ دیتے ہوئے وزیر اعظم سے اپیل کی کہ ریاست اور تعلیمی اداروں کی شبیہ کو نقصان نہ پہنچایا جائے۔