مودی تین ملکوں کے دورے کے پہلے مرحلے میں اردن پہنچے

عمان، 15 دسمبر یو این آئی) وزیر اعظم نریندر مودی اپنے تین ملکوں کے دورے کے پہلے مرحلے میں پیر کو اردن کی راجدھانی عمان پہنچے۔ ایئرپورٹ پر اردن کے وزیراعظم جعفر حسن نے ان کا پرتپاک استقبال کیا۔ مسٹر مودی کے اعزاز میں گارڈ آف آنر بھی پیش کیا گیا۔ وزیر اعظم مودی آج صبح نئی دہلی سے تین ملکوں اردن، ایتھوپیا اور عمان کے چار روزہ دورے پر روانہ ہوئے۔ اپنے روانگی کے وقت بیان میں، انہوں نے کہا کہ ہندوستان کے تینوں ممالک کے ساتھ قدیم تہذیبی اور وسیع عصری دو طرفہ تعلقات ہیں اور ان کے تاریخی دورے سے دونوں ممالک کے درمیان سفارتی تعلقات کے قیام کے 75 سال مکمل ہوں گے۔ وزیراعظم یہاں اردن کے شاہ عبداللہ دوم ابن الحسین کی دعوت پر آئے ہیں۔ وہ ان کے اور مسٹر حسن کے ساتھ وسیع بات چیت کریں گے اور توقع ہے کہ وہ ولی عہد الحسین بن عبداللہ دوم سے بھی ملاقات کریں گے۔ مسٹر مودی اردن میں ہندوستانی کمیونٹی کے ارکان سے بھی ملاقات کریں گے۔ مسٹر مودی کل ایتھوپیا کے اپنے پہلے دورے پر روانہ ہوں گے۔ وہ ایتھوپیا کے وزیر اعظم کی دعوت پر وہاں کا سفر کر رہے ہیں۔ ایتھوپیا کا دارالحکومت عدیس ابابا افریقی یونین کا صدر دفتر بھی ہے۔ 2023 میں، ہندوستان کی جی 20 صدارت کے دوران، افریقی یونین کو جی20 کے مستقل رکن کے طور پر داخل کیا تھا۔ عدیس ابابا میں وہ وزیر اعظم ڈاکٹر ابی احمد علی کے ساتھ بات چیت کریں گے اور وہاں مقیم ہندوستانیوں سے ملاقات کریں گے۔ مسٹر مودی ایتھوپیا کی پارلیمنٹ کے مشترکہ اجلاس سے بھی خطاب کریں گے۔ اپنے دورے کے آخری مرحلے میں مسٹر مودی عمان جائیں گے۔ یہ دورہ دونوں ملکوں کے درمیان سفارتی تعلقات کے قیام کی 70ویں سالگرہ کے موقع پر ہوگا۔ وہ عمان کے سلطان کے ساتھ اسٹریٹجک اور اقتصادی شراکت داری کو مضبوط بنانے کے طریقوں پر تبادلہ خیال کریں گے۔ وہ عمان میں ہندوستانی برادری سے بھی خطاب کریں گے۔