لال قلعے کی فصیل سے پہلی بار گایا جائے گا وندے ماترم

ملک کے مختلف حصوں میں جاری نوجوانوں اور طلباء کے احتجاجی مظاہروں کے درمیان اس بار یومِ آزادی کی تقریب کی تھیم ’یووا شکتی‘ کو ہی رکھا گیا ہے اور ساتھ ہی لال قلعے کی فصیل سے پہلی بار قومی گیت ’وندے ماترم‘ بھی گایا جائے گا۔
سکریٹری دفاع راجیش کمار سنگھ نے پیر کے روز یہاں ایک پریس کانفرنس میں 80ویں یومِ آزادی کی تقریب کے بارے میں معلومات دیں۔ انہوں نے کہا کہ وکست بھارت 2047 میں نوجوانوں کے تعاون کو اہمیت دیتے ہوئے اس بار کی تقریب کی تھیم 'وکست بھارت 2047 کے لیے یووا شکتی' رکھی گئی ہے۔ انہوں نے کہا کہ تحریکِ آزادی کے دوران لاکھوں لوگوں کوتحریک دینے والے قومی گیت 'وندے ماترم' کے 150 سال پورے ہونے کے پیشِ نظر اس بار لال قلعے کی فصیل سے پہلی بار وندے ماترم گایا جائے گا۔ تقریب کے لیے پانچ ہزار سے زائد خاص مہمانوں کو مدعو کیا گیا ہے جن میں 56ویں بین الاقوامی فزکس اولمپیاڈ میں گولڈ میڈل جیتنے والے طلباء بھی شامل ہیں۔ یومِ آزادی کی تقریب کے دوران مختلف دنوں میں ملک بھر میں 343 مقامات پر تینوں مسلح افواج کے بینڈ اپنی پیشکش دیں گے۔
مسٹر سنگھ نے کہا کہ لال قلعے کی فصیل پر وزیر اعظم نریندر مودی کی آمد کے ساتھ ہی وندے ماترم گایا جائے گا۔ اس کے بعد وزیر اعظم قومی پرچم لہرائیں گے، قومی ترانہ ہوگا اور پھر وزیر اعظم کا خطاب ہوگا۔ سوالوں کے جواب میں سکریٹری دفاع نے کہا کہ تقریب کے لیے یووا شکتی کی تھیم پہلے سے ہی طے تھی اور یہ فیصلہ نوجوانوں اور طلباء کی تحریک سے پہلے ہی کیا گیا تھا۔
تقریب میں پھولوں کی سجاوٹ میں 'وندے ماترم کی جھلک نظر آئے گی۔ اس میں نیشنل کیڈٹ کور کے 2,500 لڑکے اور لڑکیاں نیز 'میرا بھارت (مائی بھارت) کے رضاکار مل کر لال قلعے کی فصیل کے سامنے گیان پتھ پر 'وندے ماترم کی شکل بنائیں گے۔ ہندستانی فضائیہ کا ایم آئی-17 ہیلی کاپٹر 'وندے ماترم کے 150 سال پورے ہونے کی مناسبت سے ایک بینر لے کر اڑے گا اور لال قلعے پر موجود لوگوں پر پھولوں کی بارش کرے گا۔ تقریب میں مختلف شعبوں میں نوجوانوں کی کامیابیوں کی سراہنا کی جائے گی۔ بین الاقوامی فزکس، کیمسٹری، بائیولوجی اور میتھمیٹکس اولمپیاڈ 2026 میں تمغے جیتنے والے 19 طلباء کی کامیابیاں سائنس کے شعبے میں یووا شکتی کی کامیابی کی ایک مثال ہیں۔ انہیں تقریب کے لیے مدعو کیا گیا ہے اور انہیں خاص مہمانوں کے ساتھ بٹھایا جائے گا۔بیک گراؤنڈ میں لگے کٹ آؤٹ ایٹمی اور خلائی ٹیکنالوجی میں ہندوستان کی پیشرفت کو دکھائیں گے، جبکہ سلامی گارڈ والے حصے میں پھولوں کی سجاوٹ 'وکست بھارت 2047' کی طرف ہندوستان کے سفر کی جھلک پیش کرے گی۔ تقریب کے لیے تقریباً 5,000 ممتاز مہمانوں، جنہوں نے زندگی کے مختلف شعبوں میں کامیابیاں حاصل کی ہیں اور ملک کے وکست بھارت سفر کی رہنمائی کر رہے ہیں، کو خصوصی مہمانوں کے طور پر مدعو کیا گیا ہے۔ اس کے علاوہ حکومت کی مختلف اسکیموں کے مستفیدین کو بھی بلایا گیا ہے۔ مختلف ریاستوں اور مرکز کے زیر انتظام علاقوں سے دہلی میں رہنے والے 1,500 سے زیادہ لوگوں کو روایتی لباس میں اس شاندار تقریب کو دیکھنے کے لیے مدعو کیا گیا ہے۔ وہ لال قلعے پر’منی بھارت‘ کی جھلک پیش کریں گے۔