ٹرمپ نے کینیڈا پر یکم جنوری سے نئی 50 فیصد آٹو ٹیرف عائد کرنے کا اعلان کر دیا

امریکی صدر ڈونلڈ ٹرمپ نے کہا ہے کہ وہ کینیڈا سے درآمد ہونے والی گاڑیوں اور ٹرکوں پر محصولات دگنا کریں گے جبکہ 2027 میں آٹو پارٹس پر بھی محصولات عائد کیے جائیں گے۔ یہ اقدام گزشتہ ہفتے دونوں ممالک کے درمیان تجارتی مذاکرات ناکام ہونے کے بعد اوٹاوا پر دباؤ بڑھانے کی تازہ کوشش ہے۔ٹرمپ نے پیر کو کہا کہ کینیڈین گاڑیوں اور اسٹیل پر محصولات یکم جنوری سے بڑھا کر 50 فیصد کر دیے جائیں گے۔ یہ ہفتے کے روز عائد کیے گئے 50 فیصد محصولات کے علاوہ ہوں گے، جو دونوں ممالک کے درمیان تجارتی مذاکرات ناکام ہونے کے بعد لگائے گئے تھے۔چونکہ اسٹیل پر پہلے ہی 50 فیصد محصول عائد ہے، اس لیے یہ واضح نہیں کہ ٹرمپ کی مراد کیا تھی۔ انہوں نے آٹو پارٹس پر بھی 50 فیصد محصولات عائد کرنے کا اعلان کیا، جن پر اس سے قبل کوئی محصول نہیں تھا۔ٹرمپ نے اپنے سوشل میڈیا پلیٹ فارم 'ٹروتھ سوشل پر لکھا،امریکہ میں تیار کریں اور کوئی محصول نہیں ہوگا۔ کینیڈا کے ساتھ اب کسی ریاست کی طرح سلوک نہیں کیا جائے گا!انہوں نے مزید کہا، تجارت اور دیگر معاملات میں بھی کینیڈا دنیا کے بدترین ممالک میں شامل ہے جن سے معاملات طے کرنا مشکل ہے۔ وہ خود کو اس کا حق دار سمجھتے ہیں، حالانکہ ہمیں کینیڈا کی ضرورت نہیں، انہیں ہماری ضرورت ہے!امریکی وزیر خزانہ اسکاٹ بیسنٹ نے پیر کو صحافیوں سے گفتگو کرتے ہوئے کہا کہ ٹرمپ چاہتے ہیں کہ کینیڈا مذاکرات کی میز پر آئے اور نیک نیتی کے ساتھ بات چیت کرے۔کینیڈا کے وزیراعظم مارک کارنی نے پیر کو کیوبیک میں ایک پریس کانفرنس کے دوران کہا کہ امریکہ کے ساتھ باہمی طور پر فائدہ مند معاہدہ ممکن ہے، لیکن اس کے لیے ضروری ہے کہ امریکی کینیڈا کی خودمختاری کا احترام کریں۔کارنی نے چھ نئے کینیڈین آئس بریکر بحری جہازوں میں سرمایہ کاری کے اعلان کے موقع پر کہا، جب امریکی ہماری صنعت کے بارے میں درست رویے اور حقیقی شراکت داری کے جذبے کے ساتھ مذاکرات کی میز پر آئیں گے تو یقیناً ہم بھی مذاکرات کی میز پر آئیں گے۔
اونٹاریو کے وزیرِاعلیٰ ڈگ فورڈ، جس صوبے میں کینیڈا کی آٹو صنعت کا بڑا حصہ موجود ہے، نے ایسوسی ایٹڈ پریس کو بتایا کہ ٹرمپ نے اپنے قریبی دوست اور اتحادی کے خلاف جنگ، اقتصادی جنگ، کا اعلان کر دیا ہے۔فورڈ نے سابق امریکی صدر رونالڈ ریگن کا حوالہ دیتے ہوئے کہا کہ ریگن محصولات کی مخالفت کرتے تھے اور ٹرمپ اپنی میز کے قریب آنجہانی صدر کی تصویر رکھتے ہیں۔انہوں نے کہا کہ اگر ریگن کو موجودہ صورتحال کا علم ہوتا تو وہ اس تصویر سے ٹرمپ پر قے کر رہے ہوتے اور قبر میں کروٹیں بدل رہے ہوتے۔ فورڈ نے مزید کہا کہ ٹرمپ کو شاید ریگن کی تصویر دیوار سے اتار کر کہیں اور رکھ دینی چاہیے کیونکہ رونالڈ ریگن صدر ٹرمپ سے بیزار ہوتے۔فورڈ نے خبردار کیا کہ اگر تنازع مزید شدت اختیار کرتا ہے تو سب کچھ زیرِ غور ہے، جس میں اونٹاریو سے امریکہ کو بجلی اور اہم معدنیات کی فراہمی روکنا بھی شامل ہے۔ انہوں نے کینیڈا سے مطالبہ کیا کہ وہ تیل اور پوٹاش کو بھی دباؤ کے لیے استعمال کرنے پر غور کرے۔فورڈ نے اہم معدنیات کے حوالے سے کہا، میں انہیں روک دوں گا۔ آپ کو اونٹاریو سے ریت کا ایک ذرہ بھی نہیں ملے گا۔
انہوں نے کہا، ہم امریکہ میں 15 لاکھ گھروں اور کاروباری اداروں کو بجلی فراہم کرتے ہیں۔ سب کچھ زیرِ غور ہے۔ میں جو کچھ بھی کرنا پڑا، کروں گا۔فورڈ نے کہا کہ اگر ٹرمپ کینیڈا کی صنعتی پیداوار کو ختم کرنے کی کوشش جاری رکھتے ہیں تو انہیں بیٹریوں کا ایک پیکٹ ساتھ رکھنا بہتر ہوگا۔ٹرمپ نے 'ٹروتھ سوشل پر فورڈ کے بیان کا جواب دیتے ہوئے کہا کہ ڈگ فورڈ کی جانب سے بہت شور شرابا کیا جا رہا ہے اور کینیڈا کو یاد رکھنا چاہیے کہ کینیڈا کو ملنے والی بجلی، تیل اور گیس کا بڑا حصہ امریکہ کے راستے منتقل ہوتا ہے۔ انہوں نے مزید کہا کہ کسی کو ان مذاق بن جانے والوں کوصف میں آنے پر مجبور کرنا چاہیے، ورنہ کینیڈا کے لیے نتائج کہیں زیادہ سنگین ہوں گے۔کینیڈا مسلسل امریکہ کے دو بڑے تجارتی شراکت داروں میں شامل رہا ہے۔ گزشتہ سال دونوں ممالک کے درمیان اشیا اور خدمات کی تجارت کا مجموعی حجم 872.3 ارب ڈالر رہا، جو گزشتہ سال کے مقابلے میں 4.6 فیصد کم تھا۔کینیڈا اپنی مجموعی برآمدات میں سے تین چوتھائی سے زیادہ امریکہ کو بھیجتا ہے، جبکہ وہ اپنی تقریباً نصف درآمدات امریکہ سے حاصل کرتا ہے۔امریکہ کی آٹو صنعت کینیڈا اور میکسیکو کے ساتھ گہرے طور پر مربوط ہے، اس لیے نئے محصولات امریکی پیداوار پر شدید اثرات مرتب کر سکتے ہیں۔کینیڈا کی آٹوموٹیو پارٹس مینوفیکچررز ایسوسی ایشن کے صدر فلاویو وولپے نے کہا، کینیڈین آٹو پارٹس پر عائد کیا جانے والا امریکی محصول امریکی کار اسمبلی صنعت ادا کرے گی۔ ان مخصوص پارٹس کے بغیر پورے امریکہ میں گاڑیوں کی اسمبلی رک جائے گی۔وائٹ ہاؤس نے فوری طور پر مجوزہ محصولات کی مزید تفصیلات جاننے کے لیے بھیجی گئی درخواست کا جواب نہیں دیا۔ کینیڈین حکومت کے نمائندوں نے بھی فوری طور پر تبصرے کی درخواست کا جواب نہیں دیا۔دونوں ممالک جمعہ کی رات تجارتی معاہدے تک پہنچنے میں ناکام رہے اور دونوں نے اس ناکامی کا ذمہ دار ایک دوسرے کو قرار دیا۔ کینیڈا نے ٹرمپ کی جانب سے دیگر کینیڈین مصنوعات پر عائد 50 فیصد محصولات کے جواب میں بعض امریکی اشیا پر جوابی محصولات کی تیاری کی۔
کینیڈا نے کہا ہے کہ وہ 20 ارب ڈالر مالیت کی کینیڈین مصنوعات پر ٹرمپ کی جانب سے عائد 50 فیصد محصولات کے جواب میں 8 ستمبر سے بعض امریکی اشیا پر محصولات عائد کرے گا۔جب کارنی سے پوچھا گیا کہ آیا کینیڈا امریکہ کے ساتھ تجارتی جنگ میں داخل ہو چکا ہے تو انہوں نے ہفتے کے روز کہا، جب آپ پر حملہ کیا جائے تو آپ جنگ میں ہوتے ہیں۔ ہم پر حملہ کیا گیا ہے۔انگس ریڈ انسٹی ٹیوٹ کے اتوار کو جاری کردہ رائے عامہ کے جائزے کے مطابق، چار میں سے تین کینیڈین شہریوں نے جمعہ کی رات امریکہ کے ساتھ تجارتی مذاکرات سے دستبردار ہونے کے کارنی کے فیصلے کی حمایت کی۔محصولات کے اعلان کے بعد آٹو کمپنیوں کے حصص میں بھی کمی دیکھی گئی۔ پیر کو فورڈ اور اسٹیلنٹس کے حصص بالترتیب 3.2 فیصد اور 4.7 فیصد گر گئے، جبکہ جنرل موٹرز کے حصص میں 1.1 فیصد کمی ہوئی۔ نیویارک میں ٹویوٹا کے حصص 1.5 فیصد اور ہونڈا کے حصص 2.1 فیصد نیچے رہے۔