ہندی اوراردوہندوستانی تہذیب کی امین ، ہر ہندی داں کو یہ زبان سیکھنی چاہئے:کھگیش چندرجھا

پٹنہ16ستمبر(پریس ریلیز) اردو زبان سیل پٹنہ کلکٹریٹ کے زیر اہتمام اور اردوڈائریکٹوریٹ،محکمہ کابینہ سکریٹریٹ حکومت بہارکے حسب ہدایت، اردوداں طلبہ حوصلہ افزائی ریاستی اسکیم کے تحت کامیاب طلباکے درمیان تقسیم توصیفی اسنادتقریب کاانعقادکلکٹریٹ پٹنہ کےمرکزی اجلاس ہال میں عمل میں آیا۔مؤرخہ8اگست کومنعقدہونے والے تقریری مسابقے میں نمایاں کارکردگی پر ضلع پٹنہ کے طلبہ وطالبات کوآج ایڈیشنل کلکٹر جناب کھگیش چندر جھا (بی اے ایس)، ایڈیشنل کلکٹر جناب رویندرکماردواکر(بی اے ایس) اور ایڈیشنل کلکٹر جناب اشوک کمارمنڈل(بی اے ایس) کے ہاتھوں توصیفی اسناد سے سرفراز کیا گیا۔ گریجویشن ومساوی، انٹر ومساوی اور میٹرک ومساوی زمرے کے آٹھ آٹھ طلبہ وطالبات اورمجموعی طورپر24طلبہ وطالبات توصیفی اسنادسے نوازے گئے۔اس درمیان جناب محمدشہبازاحمد،ترجمہ افسربشمول انچارج آفیسرضلع اردوزبان سیل ،پٹنہ ،جناب پھول حسن ،درجہ بالامحررمامورضلع اقلیتی فلاح پٹنہ ،جناب اعجازحسین رضوی درجہ بالامحررضلع اردوزبان سیل،جناب منظورعالم معاون اردومترجم ضلع اردوزبان سیل اورڈاکٹرشاہدوصی معاون اردومترجم ضلع اردوزبان سیل پٹنہ کے ذریعے معززافسران کااستقبال کیا گیا۔ اجلاس کی صدارت معززضلع مجسٹریٹ کے حسب حکم محترم کھگیش چندر جھا، اے ڈی ایم پٹنہ کلکٹریٹ نے کی۔
جناب کھگیش چندرجھانے اپنے صدارتی خطاب میں ضلع اردوسیل کی کارکردگی کوسراہا۔انہو ںنے طلبہ وطالبات اور سرپرستوں کومخاطب کرتے ہوئے کہاکہ جتنی زبانیں سیکھیں گے ،تہذیب و ثقافت کے اتنے درواہوں گے۔ ہرطبقے کے افراد اردو زبان سیکھیں۔ تعلیم کا مقصد تربیت ہے۔ ذہن میں وسعت تبھی ہوگی جب آپ کا مطالعہ وسیع ہوگا۔ خوش قسمت ہیں کہ آپ ہندی اور اردو دونوں تہذیب وثقافت کے امین ہیں۔ دونوں کاادب نہایت وسیع ہے۔ ہندی اور اردو دونوں ایک ہی ہیں ،بس لباس الگ ہیں۔ انہوں نے ضلع کے مختلف دفاترسے شرکت کرنے والے اردومترجمین اورمعاون اردومترجمین سے بھی توقع کی کہ سال میں کم ازکم پانچ غیر اردوداں افراد کو اردو زبان سکھائیں۔ یہ آپ کے فرائض منصبی میں شامل ہے ۔ اس موقع پر جناب اشوک کمارمنڈل اے ڈی ایم نے اپنےخطاب میں کہاکہ ہندی اوراردوکے درمیان گہراتعلق ہے ۔زبان لوگوں کو جوڑنے کی کڑی ہوتی ہے، 8اگست کے پروگرام میں جن طلبہ وطالبات نے حصہ لیا،وہ سبھی لائق مبارک بادہیں۔ان میں سے آپ24طلبہ کاانتخاب عمل میں آیاہے،جومنتخب نہیں ہوئے ہیں،وہ مایوس نہ ہوں،جنہوں نے نمایاں کارکردگی پیش کی وہ مزید بہتر کرنے اور بڑے مقابلے میں شرکت کی کوشش کریں۔زندگی میں کامیاب ہونے کے لیے محنت واحد راستہ ہے۔انہوں نے سبھی کامیاب طلبہ وطالبات کوبہتر مستقبل کی دعاؤں سے نوازا۔
جناب رویندرکماردواکرصاحب اے ڈی ایم نے اپنے اختتامیہ کلمات میں کہاکہ آپ سبھوں نے اردوکے فروغ کی ذمہ داری اپنے سرلی ہے،آپ قابل مبارک بادہیں۔ میں ہمیشہ کوشش کرتاہوں کہ اردوکے پروگراموں میں شرکت کروں۔ اردو محبت کی زبان بن گئی ہے۔آپ نے اس کے الفاظ کوہی اپنی زبان پرنہیں سجایا، بلکہ ہندوستان کی گنگاجمنی تہذیب کوسنبھالا ہے۔ انہوں نے ترنم میں اپنی ایک غزل بھی سنائی۔جبکہ بلاک ترقیاتی آفس داناپور میں مامور نائب اردو مترجم نصر الدین بلخی کی مترنم آواز اور خوبصورت غزل سے سامعین خوب خوب محظوظ ہوئے۔
اخیر میں جناب محمدشہبازاحمد،ترجمہ افسربشمول انچارج آفیسرضلع اردوزبان سیل پٹنہ نے سبھی مہمانوں کاشکریہ اداکرتے ہوئے کہاکہ آج کادن طلبہ وطالبات کے لیے اہم ہے کہ انہیں معززافسران کے ہاتھوں توصیفی اسنادسے سرفرازکیاجارہاہے۔انہوں نے پٹنہ کلکٹریٹ کے سبھی معززافسران کاشکریہ اداکرتے ہوئے امیدکی کہ آئندہ بھی ا س طرح کی تقریبات منعقدہوتی رہیں گی ۔اورآپ طلبہ وطالبات بڑی تعدادمیں اردوڈائریکٹوریٹ کے اس منصوبہ سے مستفیدہوں گے۔انہوں نے اردو ڈائریکٹوریٹ،محکمہ کابینہ سکریٹریٹ ،حکومت بہارکابھی شکریہ اداکیاکہ معززڈائریکٹرصاحب کی سرگرم کوششوں سے ضلعی سطح پرفروغ اردوکی کامیاب کوششیں کی جارہی ہیں،ہم سب کی ذمے داری ہے کہ اس میں سرگرم تعاون کریں۔اجلاس میں پٹنہ ضلع کے مختلف دفاتر میں مامور اردو ملازمین، کامیاب طلبہ وطالبات ،ان کے سرپرست اوراساتذہ شریک رہے۔نظامت کے فرائض ڈاکٹرعارف حسین نے بحسن وخوبی انجام دیے۔گریجویشن ومساوی زمرے میں پٹنہ ویمنس کالج ،مگدھ مہیلاکالج ،مدرسہ اسلامیہ شمس الہدیٰ،مدرسہ سلیمانیہ، اورینٹل کالج،پٹنہ کالج سے پایل کماری ،سعدیہ پروین ،ذکی الاعظم،زہرہ فاطمہ ،محمد شہباز،عائشہ پروین،شبنم پروین،محمدقمرانیس ، انٹرومساوی زمرے میں بی این کالج ،ایو ب اردوگرلس اسکول،مدرسہ اسلامیہ انجمن مفیدالاسلام،معہدام المومنین ،پٹنہ مسلم ہائی اسکول سے مصباح الہدیٰ، مدثر، طوبیٰ رحمن، شگوفہ رحمٰن، آفرین فاطمہ، صبیحہ انجم، صفیہ سیف اللہ ،خوشی پروین جب کہ میٹرک ومساوی زمرے سے پٹنہ مسلم ہائی اسکول ،خادم الاسلام ہائی اسکول، الحرا ٹو ٹوریل شریف کالونی، مدرسہ اسلامیہ انجمن مفیدالاسلام، اوچ مادھمک ودھالیہ نوبت پورسے محمد ارمان، علیشا فاطمہ، سمیہ ،خوشی،عالیہ پروین، عبدالکریم، رافعہ ناز،روشنی پروین کوتوصیفی اسنادسے سرفرازکیاگیا۔تقریب کوکامیاب بنانے میں ضلع اردوزبان سیل پٹنہ کے سبھی ملازمین نے سرگرم تعاون پیش کیا۔