بابا سدھیشور ناتھ دھام، برابر میں شروانی میلہ کا شاندار افتتاح

پٹنہ 30 جولائی (اے بی این): بہار کے معروف مذہبی اور تاریخی مقام بابا سدھیشور ناتھ دھام، برابر میں شروانی میلہ 2026 کا باوقار اور شاندار افتتاح جمعرات کو بہار حکومت کے اقلیتی بہبود کے وزیر اور ضلع کے وزیرِ انچارج محمد زماں خان اور کان کنی، ارضیات، فنون، ثقافت و امورِ نوجوانان کے وزیر ڈاکٹر پرمود کمار نے مشترکہ طور پر کیا۔ اس موقع پر عوامی نمائندوں، اعلیٰ انتظامی افسران اور ہزاروں عقیدت مندوں کی موجودگی نے تقریب کو یادگار بنا دیا۔
افتتاحی تقریب کا آغاز معزز مہمانوں کے استقبال اور شمع روشن کرنے کی رسم سے ہوا۔ اس کے بعد امرپالی ٹریننگ سینٹر کی طالبات نے استقبالیہ نغمہ پیش کیا، جبکہ ’’شیو تانڈو‘‘ پر مبنی دلکش ثقافتی پروگرام نے حاضرین کو مسحور کر دیا۔ بھگوان شیو کی عظمت اور روحانیت کی عکاسی کرتی اس پیش کش کو شرکاء نے بھرپور داد دی۔ثقافتی پروگرام کے بعد وزیرِ انچارج محمد زماں خان، وزیر ڈاکٹر پرمود کمار، ضلع مجسٹریٹ، پولیس سپرنٹنڈنٹ اور دیگر معززین نے بابا سدھیشور ناتھ مندر میں خصوصی پوجا کی اور ریاست و ملک میں امن، خوشحالی اور عوامی فلاح کے لیے دعائیں کیں۔ بعد ازاں امرپالی ٹریننگ سینٹر کی طالبات کو ان کی بہترین ثقافتی پیش کش پر اعزازات سے نوازا گیا۔تقریب کا اختتام ریاستی ترانہ ’’بہار گیت‘‘ کی اجتماعی پیش کش اور ربن کاٹ کر شروانی میلہ 2026 کے باضابطہ افتتاح کے ساتھ ہوا۔
اس موقع پر مقررین نے بابا سدھیشور ناتھ دھام کی مذہبی، تاریخی اور ثقافتی اہمیت پر روشنی ڈالتے ہوئے کہا کہ برابر صدیوں سے عقیدت مندوں کے ایمان اور عقیدت کا مرکز رہا ہے۔ انہوں نے اس مقام کو مذہبی سیاحت کے فروغ کے لیے نہایت اہم قرار دیتے ہوئے کہا کہ حکومت اس کی ترقی اور بنیادی سہولیات کی توسیع کے لیے مسلسل اقدامات کر رہی ہے۔
وزیرِ انچارج محمد جما خان نے کہا کہ شروانی میلہ صرف مذہبی اجتماع نہیں بلکہ بہار کی مشترکہ تہذیب، ثقافت اور عوامی ہم آہنگی کی علامت ہے۔ انہوں نے ضلعی انتظامیہ کی تیاریوں کو قابلِ ستائش قرار دیتے ہوئے یقین ظاہر کیا کہ اس سال لاکھوں عقیدت مند بغیر کسی دشواری کے عبادت اور درشن سے مستفید ہوں گے۔وزیر ڈاکٹر پرمود کمار نے کہا کہ بابا سدھیشور ناتھ دھام بہار کے عظیم مذہبی ورثے کا اہم حصہ ہے اور حکومت یہاں بنیادی ڈھانچے کو مزید مضبوط بنانے کے لیے سنجیدہ ہے تاکہ عقیدت مندوں کو عالمی معیار کی سہولیات فراہم کی جا سکیں۔
ضلع مجسٹریٹ چھیرنگ وائی بھوٹیا نے بتایا کہ میلہ کے دوران زائرین کی سہولت اور سلامتی کے پیش نظر پینے کے صاف پانی، طبی مراکز، ایمبولینس، صفائی، روشنی، پارکنگ، کنٹرول روم، سی سی ٹی وی نگرانی، ٹریفک مینجمنٹ، خواتین کی سہولت، عوامی اعلانات اور سکیورٹی کے جامع انتظامات کیے گئے ہیں۔ انہوں نے کہا کہ تمام محکمے باہمی تال میل کے ساتھ خدمات انجام دے رہے ہیں تاکہ عقیدت مندوں کو کسی قسم کی پریشانی کا سامنا نہ کرنا پڑے۔
پولیس سپرنٹنڈنٹ کوٹا کرن کمار نے کہا کہ میلہ کے پورے علاقے میں سکیورٹی کے سخت انتظامات کیے گئے ہیں اور پولیس فورس مسلسل نگرانی کر رہی ہے تاکہ عقیدت مند محفوظ ماحول میں اپنی مذہبی رسومات ادا کر سکیں۔تقریب میں رکن قانون ساز کونسل انیل کمار، ڈپٹی ڈیولپمنٹ کمشنر آدتیہ کمار پیوش، ایڈیشنل کلکٹر، ضلع کے مختلف محکموں کے افسران، عوامی نمائندے اور بڑی تعداد میں عقیدت مند موجود تھے۔آخر میں ضلعی انتظامیہ نے بہار سمیت ملک بھر کے عقیدت مندوں سے اپیل کی کہ وہ بابا سدھیشور ناتھ دھام، برابر پہنچ کر شروانی میلہ میں شرکت کریں۔ انتظامیہ نے یقین دلایا کہ میلہ کے دوران سلامتی، سہولت، ہموار درشن، ٹریفک نظم و نسق اور بنیادی خدمات کو یقینی بنانے کے لیے تمام انتظامات مکمل کر لیے گئے ہیں اور پورا انتظامی عملہ چوبیس گھنٹے خدمات انجام دے رہا ہے۔