بانکی پور ضمنی انتخاب: نامزدگی کے بعد بی جے پی نے اچانک بدلا امیدوار، اب نیرج کمار سنہا میدان میں

پٹنہ (اے بی این‘ بانکی پور اسمبلی نشست پر ہونے والے ضمنی انتخاب میں بی جے پی نے ایک غیر متوقع فیصلہ کرتے ہوئے اپنے پہلے سے نامزد امیدوار ابھیشیک کمار ’بنٹی‘ کی جگہ نیرج کمار سنہا کو پارٹی کا نیا امیدوار مقرر کر دیا ہے۔ یہ فیصلہ اس وقت سامنے آیا جب ابھیشیک کمار بنٹی اپنا پرچۂ نامزدگی داخل کر چکے تھے، جس کے بعد سیاسی حلقوں میں اس تبدیلی پر مختلف قیاس آرائیاں کی جانے لگیں۔خیال رہے کہ ابھیشیک کمار بنٹی کو بی جے پی کے قومی صدر نتن نوین کا قریبی ساتھی مانا جاتا ہے۔ پارٹی نے چند روز قبل انہیں بانکی پور ضمنی انتخاب کے لیے امیدوار بنایا تھا اور انہوں نے جمعرات کو پارٹی کے سینئر رہنماؤں کی موجودگی میں نامزدگی بھی داخل کی تھی۔
تاہم جمعہ کو انہوں نے اچانک انتخاب نہ لڑنے کا اعلان کرتے ہوئے اسے ذاتی اور خاندانی وجوہات کا نتیجہ قرار دیا۔ انہوں نے بی جے پی کے ریاستی صدر سنجے سراوگی کو خط دے کر اپنی امیدواری واپس لینے کی اطلاع دی اور بعد ازاں صحافیوں سے گفتگو میں بھی یہی مؤقف دہرایا۔اس کے فوراً بعد بی جے پی نے نیرج کمار سنہا کو بانکی پور سے اپنا باضابطہ امیدوار نامزد کر دیا۔ نیرج کمار سنہا میٹھاپور کے رہائشی ہیں اور آرٹ میں گریجویشن تک تعلیم حاصل کر چکے ہیں۔ وہ طویل عرصے سے بی جے پی کی تنظیمی سرگرمیوں سے وابستہ رہے ہیں۔ پارٹی کے مطابق انہوں نے 2006 میں ابتدائی رکنیت حاصل کی تھی، جس کے بعد بوتھ صدر، منڈل جنرل سیکریٹری، بھارتیہ جنتا یووا مورچہ کے ضلع نائب صدر اور دو مرتبہ منڈل صدر سمیت مختلف تنظیمی ذمہ داریاں نبھائیں۔ اس وقت بھی وہ نریندر بھارتی منڈل کے صدر ہیں۔بانکی پور اسمبلی نشست بی جے پی کے قومی صدر اور سابق وزیر نتن نوین کے استعفے کے بعد خالی ہوئی تھی، جس کے باعث یہاں ضمنی انتخاب کرایا جا رہا ہے۔ پارٹی کی جانب سے پہلے نتن نوین کے قریبی ساتھی ابھیشیک کمار بنٹی کو امیدوار بنایا گیا تھا، لیکن نامزدگی داخل ہونے کے بعد ان کے اچانک دستبردار ہونے اور امیدوار تبدیل کیے جانے سے سیاسی سرگرمیاں مزید تیز ہو گئی ہیں۔
اس ضمنی انتخاب کو خاص اہمیت اس لیے بھی حاصل ہے کہ جن سوراج پارٹی کے بانی اور انتخابی حکمت عملی ساز پرشانت کشور بھی اسی نشست سے میدان میں ہیں۔ وہ مسلسل حلقے میں عوامی رابطہ مہم چلا رہے ہیں اور ووٹروں سے ملاقاتیں کر رہے ہیں۔ دوسری جانب راشٹریہ جنتا دل نے ریکھا گپتا کو امیدوار بنایا ہے، جو گزشتہ اسمبلی انتخاب میں بھی نتن نوین کے مقابلے میں امیدوار تھیں۔انتخابی پروگرام کے مطابق بانکی پور اسمبلی نشست پر 30 جولائی کو ووٹنگ ہوگی، جبکہ ووٹوں کی گنتی 3 اگست کو کی جائے گی۔ پرچۂ نامزدگی داخل کرنے کی آخری تاریخ 13 جولائی مقرر کی گئی ہے۔ بی جے پی کی جانب سے آخری وقت میں امیدوار کی تبدیلی نے اس ضمنی انتخاب کو مزید دلچسپ بنا دیا ہے اور اب تمام نظریں انتخابی مہم کے آئندہ مرحلے پر مرکوز ہیں۔