وزیر صحت نشانت کمار نے پارٹی دفتر کا کیا دورہ ، لیڈران نےشایان شان استقبال کیا

پٹنہ (اے بی این)وزیر صحت نشانت کمار نے ہفتہ کو پارٹی دفتر کا دورہ کیا۔ اس موقع پر انہوں نے پارٹی کے سینئر رہنماؤں اور کارکنوں سے ملاقاتیں کیں اور ان کی خیریت دریافت کی۔ وزیر سے ملاقات کے لیے پارٹی کے کارکنان کی بڑی تعداد پارٹی دفتر میں موجود تھی۔ حاضرین نے نشانت کمار کو پھولوں کا گلدستہ پیش کیا اور انہیں دل کی گہرائیوں سے مبارکباد پیش کی اور ان کی نئی ذمہ داریوں کے لئے نیک خواہشات کا اظہار کیا۔ اس موقع پر معزز رکن قانون ساز کونسل سنجے کمار سنگھ عرف گاندھی جی سمیت کئی لیڈران موجود تھے۔دوسری جانب بھوجپوری فلموں کی اداکارہ اکشرا سنگھ نے وزیر صحت بننے کے بعد ہفتہ کو نتیش کمار کے بیٹے نشانت کمارسے ملاقات کی۔ نشانت نے خود ان کی ملاقات کی تصاویر سوشل میڈیا پر شیئر کی ہیں۔ انہوں نے لکھاکہ آج میں نے بہار کی بیٹی اور بھوجپوری سنیما کی معروف اداکارہ اکشرا سنگھ سے اپنی رہائش گاہ پر ملاقات کی۔ ہم سب بہار کی ترقی چاہتے ہیں۔ ہم نے بہاری زبانوں میں فلموں کی تیاری سمیت کئی موضوعات پر ان کے ساتھ بامعنی بات چیت کی۔ذرائع ابلاغ کے نمائندوں سے بات کرتے ہوئے اکشرا سنگھ نے کہا کہ انہوں نے نشانت سے ملاقات کی، انہیں وزیر بننے پر مبارکباد دی اور بہار پر تبادلہ خیال کیا۔ انہوں نے مزید کہا کہ مغربی بنگال میں بی جے پی طویل عرصے کے بعد جیتی ہے۔ اس کے لیے بی جے پی کو مبارکباد۔ اکشرا نے نشانت کے ساتھ اپنی ملاقات پر بہت خوشی کا اظہار کیا،ساتھ ہی بہار کو لے کر نشانت سے جو امید یں اسے پورا ہونے کی یقین ظاہر کی۔قابل ذکر ہے کہ نشانت وزیر صحت کا عہدہ سنبھالنے کے بعد سے پوری طرح سے کام کر رہے ہیں۔ چھٹی ہونے کے باوجود انہوں نے ہفتہ کو مسلسل دوسرے دن اپنے محکمہ کا معائنہ کیا اور عہدیداروں سے میٹنگ کی۔ نشانت نے محکمہ صحت کے افسران کے ساتھ مل کر پٹنہ میڈیکل کالج اور بہار کے تمام بڑے اسپتالوں کے بارے میں تفصیلی معلومات حاصل کیں۔ انہوں نےاسپتالوں میں علاج معالجے کی سہولیات کے بارے میں دریافت کیا۔ نشانت نے افسران کو ہدایت کی کہ وہ غریبوں کے لیے ہر سطح پر مناسب طبی خدمات کو یقینی بنائیں۔محکمہ کا معائنہ کرنے کے بعد انہوں نے کہا کہ جو ذمہ داری مجھے سونپی گئی ہے اسے ایمانداری کے ساتھ نبھانے کی کوشش کر رہا ہوں۔ میں محکمہ صحت کو بہتر بنانے کی کوشش کروں گا، اس بات کو یقینی بناؤں گا کہ ہر شخص خواہ امیر ہو یا غریب، خواہ وہ کسی ذات سے تعلق رکھتا ہو، صحت کی بہتر سہولیات تک رسائی حاصل کر سکے۔ انہوں نے کہا کہ وہ ہر جگہ بہتر صحت کی خدمات فراہم کرنے کی کوشش کریں گے۔