گھر گھر پہنچے گا غذائیت کا پیغام، جیویكا دیدیاں میدان میں

پٹنہ۔ بہار میں قومی دیہی روزگار مشن اور وزارتِ دیہی ترقی، حکومتِ ہند کی ہدایت پر 9 ستمبر سے 8 اکتوبر 2026 تک نویں قومی پوشن ماہ کا انعقاد کیا جا رہا ہے۔ اس سال مہم کا موضوع ’’ہماری آنگن باڑی، ہماری ذمہ داری‘‘ رکھا گیا ہے، جس کا مقصد غذائی قلت کے خلاف عوامی تحریک کو مضبوط بنانا اور لوگوں میں صحت و غذائیت کے حوالے سے مثبت رویّے پیدا کرنا ہے۔

گزشتہ آٹھ برس سے جاری اس مہم میں جیویكا دیدیاں اہم کردار ادا کر رہی ہیں۔ اس کے نتیجے میں صحت و غذائیت کے بارے میں بیداری، ادارہ جاتی اور محفوظ زچگی میں اضافہ اور شیر خوار بچوں کی شرحِ اموات میں کمی جیسے نتائج سامنے آئے ہیں۔

پوشن ماہ کے تحت حاملہ و دودھ پلانے والی خواتین اور 7 سے 23 ماہ کے بچوں کی صحت و غذائیت پر خصوصی توجہ دی جا رہی ہے۔ جیویكا کے 11.88 لاکھ خود امدادی گروپوں، 73 ہزار سے زائد گاؤں تنظیموں اور 1684 کلسٹر سطحی فیڈریشنوں کے ذریعے مہم کو منظم انداز میں آگے بڑھایا جا رہا ہے۔

خود امدادی گروپوں کی ہفتہ وار میٹنگ میں متوازن غذا، موٹے اناج کے استعمال، خون کی کمی سے بچاؤ، ماں کے دودھ کی اہمیت، بچوں کی نگہداشت، اضافی غذا، کچن گارڈن اور صفائی جیسے موضوعات پر گفتگو کی جا رہی ہے۔ گاؤں تنظیموں کی جانب سے ریلیاں، بیداری مہم، آنگن باڑی مراکز کے ساتھ اجلاس اور نوعمر لڑکیوں کے لیے ماہواری کی صفائی و خون کی کمی کی جانچ کے کیمپ بھی منعقد کیے جا رہے ہیں۔

کلسٹر سطح پر جیویكا کی تنظیمیں ضلع و بلاک انتظامیہ، آئی سی ڈی ایس اور محکمہ صحت کے تعاون سے غذائیت کی نمائش اور دیگر سرگرمیاں منعقد کر رہی ہیں۔ تربیت یافتہ ماسٹر ریسورس پرسن، کمیونٹی نیوٹریشن ریسورس سیوی اور جیویكا متروں کے ذریعے گھر گھر پہنچ کر خواتین اور بچوں کو غذائیت، ٹیکہ کاری، بچوں کی نشوونما اور ادارہ جاتی زچگی کے حوالے سے بیدار کیا جا رہا ہے۔

محکمہ کے مطابق مہم کی ضلع، بلاک اور پنچایت سطح پر مسلسل نگرانی کی جا رہی ہے۔ مقصد ہے کہ غذائی قلت کے خلاف جاری کوششوں کو عوامی تحریک میں تبدیل کرتے ہوئے صحت مند اور غذائیت سے بھرپور بہار کی تعمیر کو مزید رفتار دی جائے۔