ملک کے نوجوان جمہوریت کے مضبوط سفیرہیں: گیانیشور کمار

پٹنہ: 17 اگست: (اے بی این ) بہار میں انتخابی بیداری کی مہم کو نئی سمت دینے کے لیے الیکشن کمیشن نے ایک اہم پہل کا آغاز کیا ہے۔ چیف الیکشن کمشنر گیانیش کمار نے پٹنہ کے گیان بھون میں Electoral Literacy Club (ELC) 2.0 کا افتتاح کرتے ہوئے نوجوانوں کو جمہوری نظام کا سب سے اہم ستون اور مستقبل کا مضبوط سفیر قرار دیا۔ انہوں نے کہا کہ جمہوریت کی مضبوطی صرف انتخابات کرانے سے نہیں بلکہ ووٹروں کو انتخابی عمل کی درست اور مستند معلومات فراہم کرنے، غلط اطلاعات سے محفوظ رکھنے اور انہیں اپنے حقِ رائے دہی کے مؤثر استعمال کے لیے باخبر بنانے سے ممکن ہے۔ اس موقع پر انہوں نے نالندہ میں بوتھ لیول افسران (BLOs) سے بھی مکالمہ کیا اور شفاف، مؤثر اور زیادہ سے زیادہ عوامی شرکت والے انتخابی نظام کے لیے زمینی سطح پر کام کرنے پر زور دیا۔
پروگرام سے خطاب کرتے ہوئے چیف الیکشن کمشنر گیانیش کمار نے Electoral Literacy Club کی اہمیت پر تفصیل سے روشنی ڈالی۔ انہوں نے کہا کہ انتخابی عمل کے تئیں بیداری جمہوری نظام کو مضبوط بنانے کے لیے انتہائی ضروری ہے۔ ELC 2.0 کے ذریعے متعلقہ افراد اور اداروں کو انتخابی عمل سے متعلق مستند اور قابلِ اعتماد معلومات فراہم کرنے کے ساتھ ساتھ غلط اور گمراہ کن معلومات سے بچانے کا بھی کام کیا جائے گا۔انہوں نے کہا کہ یہ پہل نوجوانوں کو انتخابی بیداری کے مضبوط سفیر کے طور پر تیار کرے گی، تاکہ وہ اپنے معاشرے میں انتخابی خواندگی کو فروغ دے سکیں۔ باہمی گفتگو، مباحثوں، عملی مظاہروں اور ٹیکنالوجی کے مؤثر استعمال کے ذریعے تعلیمی اداروں کو جمہوری شراکت داری کے اہم مراکز بنانے کی کوشش کی جائے گی۔
چیف الیکشن کمشنر نے پروگرام میں موجود طلبہ و طالبات سے خطاب کرتے ہوئے انہیں بہار اور بھارت کا مستقبل اور جمہوریت کا ہیرو قرار دیا۔ انہوں نے بہار کی تاریخی، ثقافتی اور جمہوری وراثت کا ذکر کرتے ہوئے سیتا ماتا کے ظہور کی سرزمین، متھلانچل کی فنونِ لطیفہ، ویشالی کے قدیم جمہوری نظام، نالندہ یونیورسٹی اور بہار کے عظیم ثقافتی ورثے کا ذکر کیا۔انہوں نے کہا کہ بھارت دنیا کی سب سے بڑی جمہوریت ہے اور ملک میں تقریباً 95 کروڑ ووٹر ہیں۔ یہ تعداد کئی ترقی یافتہ ممالک کے مجموعی ووٹروں سے بھی زیادہ ہے۔ انہوں نے بتایا کہ لوک سبھا کے عام انتخابات میں تقریباً ایک کروڑ 80 لاکھ اہلکار انتخابی عمل میں مصروف ہوتے ہیں، جو دنیا میں انتخابی عمل سے وابستہ سب سے بڑی انسانی قوت میں شمار ہوتے ہیں۔چیف الیکشن کمشنر نے بتایا کہ اب تک تقریباً 11 کروڑ صارفین ECINet ڈاؤن لوڈ کر چکے ہیں، جبکہ موجودہ کیلنڈر سال میں اسے 30 کروڑ ڈاؤن لوڈ تک پہنچانے کا ہدف مقرر کیا گیا ہے۔
گیانیش کمار نے کہا کہ الیکشن کمیشن کا ہر کام بھارت کے آئین، انتخابی قوانین اور وقتاً فوقتاً جاری تحریری ہدایات کے مطابق پوری شفافیت کے ساتھ انجام دیا جاتا ہے۔ انہوں نے سوشل میڈیا پر پھیلائی جانے والی غلط اور گمراہ کن معلومات کے سلسلے میں خبردار کرتے ہوئے افسران سے ایسی معلومات کے پھیلاؤ کو روکنے کے لیے فعال کردار ادا کرنے کی اپیل کی۔انہوں نے کہا کہ حالیہ اسمبلی انتخابات میں ووٹروں کی اب تک کی سب سے زیادہ شرکت اس بات کا ثبوت ہے کہ بھارتی ووٹروں کو ملک کے جمہوری نظام پر مکمل اعتماد ہے۔
پروگرام سے خطاب کرتے ہوئے بہار کے چیف سکریٹری جناب پرتیہ امرت نے کہا کہ بہار ملک کی پہلی ریاست ہے جس نے چیف الیکشن کمشنر کی رہنمائی میں SIR کے عمل کو کامیابی کے ساتھ نافذ کیا۔انہوں نے کہا کہ یہ بہار کے لیے باعثِ فخر ہے کہ ELC 2.0 کے آغاز کے لیے بہار کا انتخاب کیا گیا ہے۔ انہوں نے یقین دلایا کہ بہار اس پروگرام کو بھی کامیابی کے ساتھ نافذ کرے گا۔چیف سکریٹری نے بتایا کہ بہار کی آبادی میں تقریباً 58 فیصد افراد 25 سال سے کم عمر کے نوجوان ہیں۔ ایسی صورت میں نوجوانوں کو ووٹ کے حق کی اہمیت اور جمہوری نظام میں ان کے کردار سے آگاہ کرنا انتہائی ضروری ہے۔انہوں نے کہا کہ جمہوریت میں انتخابات ایک تہوار کی مانند ہیں، جس میں ہر شہری کو اپنی آئینی اور جمہوری ذمہ داری پوری کرنی چاہیے۔ انہوں نے حالیہ اسمبلی انتخابات میں آزادی کے بعد اب تک کا سب سے زیادہ ووٹنگ فیصد ریکارڈ ہونے کو باعثِ فخر قرار دیا۔ انہوں نے خاص طور پر خواتین کی نمایاں شرکت کا ذکر کرتے ہوئے کہا کہ خواتین نے ووٹنگ میں قیادت کرتے ہوئے سب سے زیادہ شرحِ رائے دہی درج کرائی۔انہوں نے یہ بھی بتایا کہ گزشتہ اسمبلی انتخابات بغیر کسی دوبارہ پولنگ کے پرامن اور کامیابی کے ساتھ مکمل ہوئے۔
بہار کے چیف الیکٹورل آفیسر جناب ونود سنگھ گنجیال نے ریاست کے تمام تعلیمی اداروں میں Electoral Literacy Club قائم کرنے کی اپیل کی۔ انہوں نے اداروں کے نوٹس بورڈ پر ECINet کا QR Code نمایاں کرنے کی ضرورت پر بھی زور دیا۔انہوں نے کہا کہ مستقبل قریب میں انتخابی خواندگی سے متعلق سرگرمیوں کو تعلیمی کیلنڈر میں شامل کیا جانا چاہیے، تاکہ طلبہ کو باقاعدگی سے جمہوری عمل سے جوڑا جا سکے۔
اس سے قبل نالندہ میں منعقد پروگرام کے دوران چیف الیکشن کمشنر نے بوتھ لیول افسران (BLOs) سے براہِ راست گفتگو کی۔ انہوں نے BLOs کے کام سے متعلق تجربات، مشکلات اور تجاویز سنیں اور کہا کہ انتخابی عمل کو مزید مؤثر، شفاف اور شراکت داری پر مبنی بنانے میں ان کی آرا انتہائی اہم ہیں۔انہوں نے BLOs کو ووٹروں کے ساتھ بہتر رابطہ قائم کرنے، ووٹر لسٹ کی درستگی برقرار رکھنے اور جمہوری عمل میں زیادہ سے زیادہ ووٹروں کی شرکت یقینی بنانے کے لیے مسلسل کام کرنے کی ترغیب دی۔
گیان بھون میں منعقد مرکزی پروگرام کے بعد میڈیا سے گفتگو کرتے ہوئے چیف الیکشن کمشنر جناب گیانیش کمار نے ELC 2.0 کے مؤثر نفاذ پر روشنی ڈالی۔ انہوں نے اس پروگرام کو کامیاب بنانے کے لیے زیادہ سے زیادہ افراد، خصوصاً نوجوانوں اور تعلیمی اداروں کی شرکت یقینی بنانے کی اپیل کی۔ELC 2.0 کے ذریعے انتخابی خواندگی کو تعلیمی اداروں سے جوڑنے کی یہ پہل بہار میں جمہوری بیداری کو نئی رفتار دینے کی سمت ایک اہم قدم قرار دی جا رہی ہے۔