نئی حکومت کو مکمل تعاون اور رہنمائی ، بہاربلندیوں پر جائے گا: نتیش

پٹنہ، 14 اپریل (اے بی این ) وزیر اعلیٰ نیتیش کمار نے منگل کو کہا کہ ریاست کی نئی حکومت کو ان کا مکمل تعاون اور رہنمائی حاصل رہے گی۔ وزیر اعلیٰ مسٹر کمار نے آج لوک بھون میں گورنر لیفٹیننٹ جنرل (ریٹائرڈ) سید عطا حسنین کو اپنا استعفیٰ سونپا۔ مسٹر کمار نے سوشل میڈیا پلیٹ فارم پر وزیر اعلیٰ کے عہدے سے استعفیٰ دینے کی معلومات دیتے ہوئے لکھا کہ 24 نومبر 2005 کو ریاست میں پہلی بار قومی جمہوری اتحاد (این ڈی اے) کی حکومت بنی تھی۔ انہوں نے کہا کہ اس کے بعد سے ریاست میں قانون کی حکمرانی ہے اور این ڈی اے حکومت مسلسل ترقیاتی کاموں میں مصروف ہے۔
مسٹر کمار نے بتایا کہ این ڈی اے حکومت نے شروع سے ہی تمام طبقات کی ترقی کی بات کی ہے۔ انہوں نے کہا کہ چاہے ہندو ہوں، مسلم، اونچی ذات، پسماندہ، انتہائی پسماندہ، دلت یا مہا دلت ہوں، حکومت نے سب کے لیے کام کیا ہے۔ انہوں نے مزید کہا کہ تعلیم، صحت، سڑک، بجلی اور زراعت ہر شعبے میں ترقی کو رفتار دی گئی۔ خواتین اور نوجوانوں کے لیے بھی مواقع تلاش کیے گئے۔
مسٹر کمار نے کہا کہ اگلے پانچ برسوں (2025 سے 2030) کے لیے '7 نشچے-3'تشکیل دیا گیا ہے۔ اس کے ذریعے بہار کافی آگے بڑھے گا۔ انہوں نے کہا کہ بہار کی ترقی میں مرکز کا بھی بھرپور تعاون مل رہا ہے، جس کے لیے وہ وزیر اعظم نریندر مودی کو سلام پیش کرتے ہیں۔انہوں نے امید ظاہر کی کہ بہار بہ سرعت ترقی کرے گا اور ملک کی صف اول کی ریاستوں میں شامل ہو کر ملک کی ترقی میں اہم کردار ادا کرے گا۔
وزیر اعلیٰ مسٹر کمار نے کہا کہ حکومت نے بہار کے لوگوں کی بہتر زندگی کے لیے مسلسل کام کیا ہے۔ انہوں نے بتایا کہ وزیر اعلیٰ کا عہدہ چھوڑنے کے فیصلے کے ساتھ ہی انہوں نے آج کابینہ کے اجلاس کے بعد گورنر سے ملاقات کر کے اپنا استعفیٰ سونپ دیا ہے۔ انہوں نے کہا کہ ریاست کے معاملات اب نئی حکومت دیکھے گی اور اسے ان کا مکمل تعاون اور رہنمائی حاصل رہے گی۔ انہوں نے امید ظاہر کی کہ مستقبل میں بھی ریاست ترقی کی راہ پر گامزن رہے گی۔