نوجوانوں کو استاد بسم اللہ خان کی زندگی سے تحریک حاصل کرنی چاہیے: شرون کمار
Awaz E Bihar••42 ویوز•3 منٹ پڑھیں
دیہی ترقی کے وزیر شراون کمارکی بھارت رتن استاد بسم اللہ خان کی برسی پر منعقد پروگرام میں شرکت پٹنہ، 23 اگست (اے بی این )بہار بدھ، مہاویر، چانکیہ، آریہ بھٹ، گرو گوبند سنگھ، ودیا پتی، اور بہت سی دوسری عظیم شخصیات کی سرزمین ہے۔ اس شاندار روایت میں استاد بسم اللہ خان کا نام بھی سنہری حروف میں لکھا ہوا ہے۔ ہماری ریاست کے نوجوانوں کو استاد بسم اللہ خان کی زندگی سے تحریک حاصل کرنی چاہیے۔ آج نوجوانوں کے پاس بے شمار مواقع ہیں۔ اگر وہ اپنی صلاحیتوں کو پہچانیں اور نظم و ضبط اور محنت کے ساتھ آگے بڑھیں تو بہار بہت سے باصلاحیت افراد، عظیم فنکار اور ملک کے لیے ثقافتی سفیر پیدا کر سکتا ہے۔ ان خیالات کا اظہار دیہی ترقیات اور اطلاعات و رابطہ عامہ کے وزیر اور جے ڈی یو قانون ساز پارٹی کے لیڈر عزت مآب جناب شرون کمار نے بھارت رتن استاد بسم اللہ خان کی برسی پر منعقدہ یادگاری تقریب میں کیا۔ اس کا اہتمام انتہائی پسماندہ مسلم تنظیم نے اتوار کو پٹنہ کے جگ جیون رام ریسرچ انسٹی ٹیوٹ میں کیا تھا۔ عزت مآب وزیر نے کہا کہ بہار کے سابق وزیر اعلیٰ جناب نتیش کمار کی خصوصی کوششوں سے بہار کی تاریخی، ثقافتی اور فنی شناخت نئی بلندیوں پر پہنچی ہے۔ استاد بسم اللہ خان کی شہنائی کی دھنوں نے نہ صرف ہندوستان کی موسیقی کی روایت کو تقویت بخشی بلکہ پوری دنیا میں ہندوستانی ثقافت اور گنگا جمنی تہذیب کی شناخت کو بھی مضبوط کیا۔ وہ ہندوستانی ثقافت کی زندہ علامت تھے۔ ان کی زندگی ہمیں سماجی ہم آہنگی کا پیغام بھی دیتی ہے۔ ان کے عظیم کارناموں کو آنے والی نسلیں مدتوں یاد رکھیں گی۔ وزیر نے مزید کہا کہ خان صاحب نے قومی تہواروں اور کئی تاریخی مواقع پر اپنی شہنائی سے ملک کا سر فخر سے بلند کیا۔ ان کی شہنائی کی دھنیں آزاد ہندوستان کے ثقافتی سفر میں ایک خاص مقام رکھتی ہیں۔ ان کی شہنائی کی آواز ملکی سرحدوں سے نکل کر پوری دنیا تک پہنچ چکی ہے۔ پروگرام کے منتظمین میں ڈاکٹر نورحسن آزاد، شاہد حلاخور، سابق وزیر محمد اسرائیل منصوری، قانون ساز کونسل کے رکن ڈاکٹر خالد انور، اقلیتی کمیشن کے رکن شمشاد سائی، جے ڈی یو کے سابق ریاستی سکریٹری محمد محمود بکھو، غلام سرور آزاد، سابق پسماندہ طبقے کمیشن کی سابق رکن اسما حال خور، سلیم رامپوری حواری،قمرالدین فاروقی، انورنٹ، روی راج نٹ، سابق وارڈ کونسل سومن ، مہا دل، کمیشن کے سابق رکن راجندر پرساد نٹ وغیرہ موجودتھے۔
