پٹنہ :(اے بی این) بہار 10ویں بورڈ کے نتائج کا انتظار کرنے والے طلبہ کے لیے خوشخبری ہے۔ بہار اسکول ایگزامینیشن بورڈ (بی ایس ای بی) نے بہار 10ویں بورڈ یعنی میٹرک امتحان 2026 کا رزلٹ جاری کر دیا ہے۔ وزیر تعلیم سنیل کمار اور بورڈ کے چیئرمین نے 10ویں بورڈ کے نتائج کا اعلان کیا ہے۔ اس بار بہار بورڈ 10ویں میں 81.79 فیصد طلبہ کامیاب ہوئے ہیں۔ بی ایس ای بی نے نتائج کے ساتھ ہی 10ویں بورڈ امتحان کے ٹاپرس کی فہرست بھی جاری کر دی ہے۔ اس سال جموئی کی پشپانجلی کماری اور ویشالی کی صبرین پروین نے مشترکہ طور پر ٹاپ کیا ہے۔ دونوں نے 500 میں سے 492 نمبر حاصل کیے ہیں۔ جبکہ 12ویں بورڈ کے نتائج کی طرح، لڑکوں کے مقابلے لڑکیوں کے پاس ہونے کا تناسب زیادہ رہا ہے۔ واضح رہے کہ اس بار سب سے زیادہ طلبہ سیکنڈ ڈویژن میں کامیاب ہوئے ہیں۔ بہار بورڈ کی جانب سے فراہم کردہ معلومات کے مطابق اس بار 15,10,928 طلبہ نے 10ویں بورڈ کے امتحان دیے تھے۔ ان میں 7,26,057 لڑکے اور 7,84,871 لڑکیاں شامل تھیں۔ بورڈ نے بتایا ہے کہ ان میں سے کل 12,35,743 طلبہ کامیاب ہوئے ہیں، جن میں 6,34,353 لڑکیاں اور 6,01,390 لڑکے پاس ہوئے ہیں۔ مجموعی شرحِ کامیابی کی بات کی جائے تو لڑکیوں کے پاس ہونے کا تناسب زیادہ رہا ہے۔ بہار 10ویں بورڈ کے نتائج میں سیکنڈ ڈویژن میں کامیاب ہونے والے لڑکوں کی تعداد زیادہ ہے۔ کامیاب ہونے والے کل 12,35,743 طلبہ میں سے 4,43,723 طلبہ فرسٹ ڈویژن میں پاس ہوئے ہیں۔ جبکہ سیکنڈ ڈویژن میں 4,75,511 طلبہ کامیاب ہوئے ہیں اور تھرڈ ڈویژن میں پاس ہونے والے طلبہ کی تعداد 3,03,103 ہے، جبکہ 13,406 طلبہ صرف پاس ڈویژن میں کامیاب ہوئے ہیں۔ بورڈ نے نتائج کے ساتھ ٹاپرس کی فہرست بھی جاری کر دی ہے۔ اس بار بہار 10ویں بورڈ کے ٹاپ 10 پوزیشن حاصل کرنے والوں میں 139 طلبہ نے جگہ بنائی ہے۔ ان میں 82 لڑکے شامل ہیں۔ یعنی بہار بورڈ 10ویں کے نتائج میں ٹاپ 10 میں جگہ بنانے والے 139 طلبہ میں 82 لڑکے اور 57 لڑکیاں ہیں۔ گزشتہ سال یعنی 2025 میں ٹاپ 10 میں 123 طلبہ نے جگہ بنائی تھی، جن میں 60 لڑکیاں اور 63 لڑکے شامل تھے۔ قابل ذکر ہے کہ بہار بورڈ 10ویں کا امتحان 17 فروری سے 25 فروری 2026 کے درمیان منعقد کیا گیا تھا۔ امتحان کے بعد 2 مارچ سے 13 مارچ تک کاپیوں کی جانچ کی گئی، جس کے بعد آج نتائج جاری کر دیے گئے ہیں۔ گزشتہ سال یعنی 2025 میں بھی بہار 10ویں بورڈ کا رزلٹ 29 مارچ کو ہی جاری کیا گیا تھا۔ بہار بورڈ 12ویں کے نتائج بھی پہلے ہی جاری کیے جا چکے ہیں۔ جموئی کے لیے یہ فخر کا لمحہ ہے، کیونکہ سملتلا رہائشی اسکول کے طلبہ نے ایک بار پھر اپنی برتری ثابت کر دی ہے۔ اسی سلسلے میں اسکول کے طالب علم ابھینو کمار نے 485 نمبر لا کر ریاست میں چھٹی پوزیشن اور سوربھی کماری نے 481 نمبروں کے ساتھ دسویں پوزیشن حاصل کی ہے۔ وہیں، برہٹ بلاک کے گوگول ڈیہہ ہائر سیکنڈری اسکول کے طالب علم شبھم کمار تانتی نے 483 نمبر حاصل کر کے ریاست میں آٹھویں پوزیشن حاصل کی اور ضلع کی کامیابی کو مزید نمایاں کر دیا۔ واضح رہے کہ سیملتلا رہائشی اسکول کے طلبہ سال 2015 سے ہی میٹرک کے امتحانات میں مسلسل شاندار کارکردگی کا مظاہرہ کر رہے ہیں اور ہر سال ٹاپ 10 میں اپنی مضبوط موجودگی درج کراتے رہے ہیں۔ تقریباً سات سال بعد سیملتلا رہائشی اسکول کو دوبارہ اسٹیٹ ٹاپ ملا ہے۔ سال 2019 کے بعد یہ پہلا موقع ہے جب اس اسکول کا کوئی طالب علم ریاست میں پہلی پوزیشن پر پہنچا ہے۔ واضح رہے کہ پشپانجلی کماری بانکا ضلع کے رجون کی رہنے والی ہیں۔
