ترقیاتی کاموں کی قومی سطح پر مؤثر برانڈنگ کی جائے: وزیر اعلیٰ

پٹنہ، 18 اپریل (اے بی این) وزیر اعلیٰ سمراٹ چودھری نے ہفتہ کے روز محکمہ اطلاعات و تعلقات عامہ، سول ایوی ایشن محکمہ اور محکمہ شہری ترقی و ہاؤسنگ کے کاموں کا جائزہ لیا اور ضروری ہدایات جاری کیں۔ جائزہ میٹنگ کے دوران محکمہ اطلاعات و تعلقات عامہ کے سکریٹری انوپم کمار نے ریاستی حکومت کی ترجیحات سے متعلق تفصیلی بریفنگ دی اور بتایا کہ عوامی فلاحی اسکیموں اور مثبت تبدیلیوں کے بارے میں عوام کو باخبر کرنے کے لیے الیکٹرانک، سوشل، ویب اور ڈیجیٹل میڈیا سمیت مختلف ذرائع استعمال کیے جا رہے ہیں، جبکہ 'برانڈ بہار کے فروغ کے ساتھ فن و ثقافت، آثارِ قدیمہ اور دیگر ورثے کی تشہیر بھی کی جا رہی ہے اور مصنوعی ذہانت کا استعمال بھی بڑھایا جا رہا ہے۔
وزیر اعلیٰ نے ہدایت دی کہ ضلع سطح پر ثقافتی ورثے کی نشاندہی کی جائے اور سیاحوں تک اس کی معلومات آسان انداز میں پہنچانے کے انتظامات مضبوط کیے جائیں، ساتھ ہی ریاست میں ہونے والے ترقیاتی کاموں کی قومی سطح پر مؤثر برانڈنگ کی جائے۔ انہوں نے مصنوعی ذہانت کو ریئل ٹائم مانیٹرنگ اور سرکاری کاموں میں بہتر طریقے سے استعمال کرنے پر زور دیا اور شہری ترقی و ہاؤسنگ اور پنچایتی راج محکموں کو اس سمت میں خصوصی اقدامات کرنے کی ہدایت دی۔ انہوں نے سرکاری زمین کی نشاندہی کر کے اسے اشتہارات کے لیے استعمال کرنے اور آمدنی بڑھانے پر بھی زور دیا۔
اجلاس میں سول ایوی ایشن محکمہ کے سکریٹری نلیش رام چندر دیورے نے پریزنٹیشن کے ذریعے ریاست میں فضائی ڈھانچے کی ترقی اور بین الاقوامی رابطہ بڑھانے کے اقدامات سے آگاہ کیا۔ بتایا گیا کہ ہوائی اڈوں کی ترقی، ایوی ایشن ٹریننگ، آفات کے انتظام اور وی آئی پی پروازوں کی خدمات کو ترجیحی بنیاد پر آگے بڑھایا جا رہا ہے، جبکہ پٹنہ اور گیا سے بین الاقوامی پروازوں کے آغاز کے لیے بھی عملی اقدامات کیے جا رہے ہیں۔
وزیر اعلیٰ سمراٹ چودھری نے کہا کہ ریاست میں ایروسٹی کے فروغ کے لیے ٹھوس اقدامات کیے جا رہے ہیں، جن کے تحت بڑے ہوائی اڈوں کے اطراف کمرشل، مہمان نوازی، لاجسٹکس اور سیاحت پر مبنی بنیادی ڈھانچے کی ترقی کا منصوبہ ہے، جب کہ چھوٹے اور علاقائی ہوائی اڈوں کی ترقی پر بھی خصوصی توجہ دی جا رہی ہے۔ انہوں نے ہدایت دی کہ تمام اضلاع میں ہوائی اڈوں کی ترقی کے لیے جامع منصوبہ تیار کیا جائے اور سیفٹی و کوالٹی کو یقینی بنایا جائے۔ انہوں نے کہا کہ اڑان اسکیم کے تحت رن وے کی توسیع، ٹرمینل تعمیر اور دیگر سہولیات پر تیزی سے کام ہو رہا ہے، جس سے دور دراز علاقوں کو بہتر فضائی رابطہ ملے گا اور متوازن علاقائی ترقی کو فروغ حاصل ہوگا، ساتھ ہی حکومت سیاحت اور سرمایہ کاری کے فروغ کے لیے بھی پرعزم ہے۔
جائزہ میٹنگ کے دوران محکمہ شہری ترقی و رہائش کے پرنسپل سکریٹری ونے کمار نے 11 سیٹلائٹ/گرین فیلڈ ٹاؤن شپ کے روڈ میپ پر تفصیلی پریزنٹیشن دی اور بتایا کہ ان منصوبوں میں توسیع کے لیے مناسب زمین مختص کی جا رہی ہے، جبکہ سڑکوں اور ڈرینج جیسے بنیادی ڈھانچے میں حکومت سرمایہ کاری کرے گی اور نجی سرمایہ کاری کے ذریعے شہر کی ترقی کو ماسٹر پلان کے مطابق آگے بڑھایا جائے گا، جس کے تحت کم از کم 55 فی صد زمین مالکان کو واپس دی جائے گی۔ وزیر اعلیٰ نے شہری علاقوں کی تیز رفتار ترقی، طویل مدتی منصوبہ بندی، صفائی، ٹریفک نظام اور شہری توسیع کے لیے ڈیجیٹل نقشہ بندی پر زور دیتے ہوئے کہا کہ حکومت عوام کی زندگی آسان بنانے کے لیے مسلسل اقدامات کر رہی ہے۔