ہندی ہمارے لیے محض روزگار کی زبان نہیں بلکہ زندگی کا حصہ ہے: پنکج ترپاٹھی

پٹنہ، 28 ستمبر:(اے بی این) معروف فلم اداکار پنکج ترپاٹھی نے نوجوانوں کو اپنی جڑوں اور شناخت سے جڑے رہنے کا پیغام دیتے ہوئے کہا کہ ’’اپنی اصلیت کو کبھی نہیں چھوڑنا چاہیے، کیونکہ جتنے لوکل بنو گے، اتنے ہی گلوبل ہوگے۔‘‘ انہوں نے کہا کہ نہ احساسِ برتری میں مبتلا ہونا چاہیے اور نہ احساسِ کمتری کا شکار، کیونکہ دونوں رویے انسان کی شخصیت کو متاثر کرتے ہیں۔ شکایت کی ذہنیت بھی ترقی کی راہ میں رکاوٹ بنتی ہے۔وہ پیر کو خدا بخش اورینٹل پبلک لائبریری، پٹنہ میں ہندی پکھواڑا کے تحت منعقدہ خصوصی تقریب سے خطاب کر رہے تھے۔ تقریب میں پنکج ترپاٹھی کے علاوہ آریہ بھٹ نالج یونیورسٹی کے ڈین پروفیسر گیان دیو منی ترپاٹھی اور ایس سی ای آر ٹی، پٹنہ کے ڈائریکٹر شری یتیندر کمار پال، آئی اے ایس سمیت متعدد اہم شخصیات موجود تھیں۔
پنکج ترپاٹھی نے اپنی بھوجپوری شناخت کا ذکر کرتے ہوئے کہا کہ ان کی گفتگو میں بھوجپوری کی جو خوشبو ہے، وہی ان کی شناخت اور وقار کا حصہ ہے۔ انہوں نے کہا کہ ان کی ہمیشہ خواہش رہتی ہے کہ ’’جس کمرے میں میں داخل ہوں، مجھ سے پہلے بہار داخل ہو جائے۔‘‘ انہوں نے کہا کہ فلمی دنیا سے وابستہ ہونے کے باوجود کتابوں اور لوک فنون سے ان کا گہرا تعلق ہے اور انہیں ایسی جگہوں پر جانا پسند ہے جہاں کتابیں موجود ہوں یا لوک فنون کی محفلیں سجتی ہوں۔ہندی کے حوالے سے انہوں نے کہا کہ اداکاری کی بنیاد کتابوں سے جڑی ہوئی ہے۔ فلموں میں عام طور پر اسکرپٹ رومن رسم الخط میں دیا جاتا ہے، لیکن ہندی کو رومن میں پڑھنے سے وہ جذبہ پیدا نہیں ہوتا جو دیوناگری میں پڑھنے سے ابھرتا ہے۔ اسی لیے وہ اپنا اسکرپٹ دیوناگری رسم الخط میں لینا پسند کرتے ہیں۔ ان کے بقول، ہندی ان کے لیے صرف روزگار کی زبان نہیں بلکہ ان کی زندگی کا حصہ اور جذبات کے اظہار کا ذریعہ ہے۔بہار کی شناخت پر گفتگو کرتے ہوئے پنکج ترپاٹھی نے کہا کہ ریاست کی شرح خواندگی کم ہونے کے باوجود ملک میں بڑی تعداد میں آئی اے ایس اور آئی پی ایس افسر بہار سے آتے ہیں۔ ایسے میں بہار کی شناخت صرف مزدوروں کی ریاست کے طور پر کیوں ہو، یہ سوال غور طلب ہے۔ انہوں نے کہا کہ سب کو مل کر بہار پر لگے اس ٹیگ کو بدلنے کی کوشش کرنی چاہیے۔
اس موقع پر خدا بخش لائبریری کے ڈائریکٹر پروفیسر محمد زاہد الحق نے مہمانوں کا خیرمقدم کرتے ہوئے کہا کہ ہندی پکھواڑا منانے کا بنیادی مقصد سرکاری دفاتر اور عوامی سطح پر آسان اور عام فہم ہندی کے استعمال کو فروغ دینا ہے۔ انہوں نے کہا کہ ہندی کو مقبول بنانے کے لیے مشکل الفاظ کے بجائے آسان زبان کا استعمال ضروری ہے۔ خدا بخش لائبریری کا ایک اہم مقصد ہندی کے قارئین کو اردو اور اردو کے قارئین کو ہندی سے قریب لانا بھی ہے۔
تقریب سے پروفیسر گیان دیو منی ترپاٹھی، شری یتیندر کمار پال اور پروفیسر صفدر امام قادری نے بھی خطاب کیا۔ مقررین نے ہندی کو عام فہم بنانے پر زور دیتے ہوئے کہا کہ زبان میں غیر ضروری طور پر مشکل سنسکرت الفاظ کے استعمال سے گریز کیا جانا چاہیے۔ اسی طرح اردو کو بھی عام فہم بنانے کے لیے ثقیل عربی و فارسی الفاظ کے غیر ضروری استعمال سے بچنے کی ضرورت ہے۔ انہوں نے کہا کہ دو زبانوں کے امتزاج سے اگر کوئی آسان اور بامعنی لفظ وجود میں آتا ہے تو اسے قبول کرنے میں کوئی قباحت نہیں۔
تقریب میں پنکج ترپاٹھی کو سننے کے لیے لائبریری کا ہال کھچا کھچ بھرا ہوا تھا۔ نوجوان اپنے پسندیدہ اداکار کو سننے کے لیے خاصے پُرجوش نظر آئے اور ان کی گفتگو کا استقبال بار بار تالیوں کی گونج سے کیا گیا۔ اختتام پر حاضرین نے پُرجوش تالیوں کے ساتھ انہیں الوداع کہا۔ نظامت کے فرائض ڈاکٹر محمد ذاکر حسین نے انجام دیے۔