پٹنہ (اے بی این) ریاستی حکومت ممکنہ سیلاب کو لے کر پوری طرح چوکس ہے۔ اس تناظر میں نائب وزیر اعلیٰ وجے کمار چودھری کی صدارت میں سیلاب سے نمٹنے کے کاموں پر ایک اعلیٰ سطحی میٹنگ ہوئی۔ جس میں ویڈیو کانفرنسنگ کے ذریعے فلڈ زونس کے چیف انجینئرس کے ساتھ علاقہ وار تیاریوں کا تفصیلی جائزہ لیا ۔جائزہ کے دوران نائب وزیر اعلیٰ نے واضح طور پر کہا کہ ریاست سیلاب کے موسم میں داخل ہو چکی ہے۔ اس لیے کسی بھی ناگہانی صورتحال سے نمٹنے کے لیے تمام تیاریاں بروقت مکمل کرلی جائیں۔ انہوں نے کہا کہ اینٹی ایرویشن کاموں کی منظوری سال کے آغاز میں دی گئی تھی تاکہ سیلاب کا سیزن شروع ہونے سے پہلے تمام کام مکمل ہو جائیں۔ زیادہ تر سائٹس کو مکمل کر لیا گیا ہے، جبکہ باقی رہنے والوں کو کسی بھی قیمت پر ایک ہفتے کے اندر مکمل کرنے کی ہدایت دی گئی ۔انہوں نے افسران کو ہدایت دی کہ وہ پشتوں کی باقاعدہ اور موثر نگرانی کو یقینی بنائیں۔ ہیڈ کوارٹر کی سطح سے محکمہ کے سکرٹری اور سینئرانجینئرس باقاعدگی سے سائٹ کا معائنہ کر موجودہ صورتحال کی نگرانی کر رہے ہیں۔ تمام چیف انجینئرس کو ہفتے میں کم از کم دو بار رات کے وقت اچانک معائنہ کرنا چاہیے تاکہ اس بات کو یقینی بنایا جا سکے کہ متعلقہ انجینئرس اور ورکرز سائٹ پر کیمپ کررہے ہیں، حساس ، انتہائی حساس مقامات پر ہٹ مین کا نظم اور سیلاب کنٹرول کے کاموں کے لیے موثر مقدار میں ضروری اثیاء کا ذخیرہ ہے۔ نائب وزیر اعلیٰ نے ہدایت دی کہ سیلاب کنٹرول کاموں کے لیے ضروری اثیاء کا ذخیرہ ایک ہفتہ کے اندر ہر حال میں یقینی بنایاجائے۔ ندیوں میں زیادہ پانی کا بہاؤ ہونے کا انتظار کرنے کے بجائے ابھی سے سبھی حساس مقامات پر اثیاء کی فراہمی کویقینی بنایاجائے۔ انہوں نے کہا کہ ہیڈ کوارٹر اور ضلعی انتظامیہ کی ٹیمیں تیاریوں اور ذخیرہ اندوزوں کی تصدیق کے لیے ایک ہفتے بعد سائٹس کا دورہ کریں گی، اس لیے متعلقہ افسران تمام ڈیٹا ضلعی انتظامیہ کے ساتھ شیئر کریں۔انہوں نے ہدایت دی کہ حساس اور انتہائی حساس پشتوں پر خصوصی چوکسی برتی جائے، رات کے وقت موثر نگرانی کے لیے خاص طور پر پشتوں کے ساتھ مناسب روشنی کا نظم کرنے اور ناگہانی صورتحال میں اثیاء کی فوری سپلائی کے لیے پہنچ راستوں کو پہلے سے درست رکھنے کو کہا۔ پشتوں پر کسی طرح کا تجاوزات پائے جانے پر فوری طور پر ہیڈ کوارٹر اور ضلعی انتظامیہ کے ساتھ رابطہ قائم کر کارروائی کرنے کو کہا۔ ساتھ ہی سیلاب کے دوران دکھائی نہیں دینے والے ریڈ ہولس اور فاکس ہولس کی مرمت ابھی سے پوری کرنے کی ہدایت دی تاکہ پشتہ مضبوط بنی رہے۔ نائب وزیر اعلیٰ نے کہا کہ یہ ہم سب کے لئے آزمائش کا وقت ہے۔ اگر تمام افسران پوری تندہی اور ذمہ داری کے ساتھ کام کریں تو کسی بھی ممکنہ ناخوشگوار صورتحال سے مؤثر طریقے سے نمٹا جا سکتا ہے۔ انہوں نے واضح کیا کہ نمایاں کارکردگی کا مظاہرہ کرنے والے افسران کو انعامات سے نوازا جائے گا، جبکہ جان بوجھ کر غفلت برتنے والوں کے خلاف سخت کارروائی کی جائے گی۔میٹنگ میں محکمہ کے سکریٹری ڈاکٹر چندر شیکھر سنگھ نے افسران کو موسم کی پیشین گوئی پر مسلسل نظر رکھنے اور کسی بھی حالت میں کسی قسم کی کوتاہی کو یقینی بنانے کی ہدایت دی۔ انہوں نے ان پر زور دیا کہ وہ پانی کی سطح بلند ہونے کا انتظار کرنے کی بجائے ہر وقت پوری طرح چوکس اور تیار رہیں۔تکنیکی مشیر منوج رمن، چیف انجینئر ورون کمار، چیف انجینئر دھرمیندر کمار دیگر افسران میں موجود تھے۔
