گرین فیلڈ سیٹلائٹ ٹاؤن شپ کی ترقی کے لیے ہڈکو کے ساتھ ایم او یو تاریخی قدم : سمراٹ چودھری

پٹنہ، 3 جولائی (اے بی این) وزیر اعلیٰ سمراٹ چودھری نے جمعہ کو کہا کہ بہار میں گرین فیلڈ سیٹلائٹ ٹاؤن شپ کی ترقی کے لیے ایک لاکھ کروڑ روپے کی طویل مدتی فنڈنگ کے لیے محکمہ شہری ترقی و ہاؤسنگ اور ہاؤسنگ اینڈ اربن ڈیولپمنٹ کارپوریشن لمیٹڈ (ہڈکو) کے درمیان میمورنڈم آف انڈرسٹینڈنگ (ایم او یو) ایک تاریخی قدم ہے۔
وزیر اعلیٰ مسٹر چودھری کی موجودگی میں آج لوک سیوک آواس پر واقع 'سنکلپ سبھاگار میں حکومت بہار کے محکمہ شہری ترقی و ہاؤسنگ اور ہاؤسنگ اینڈ اربن ڈیولپمنٹ کارپوریشن لمیٹڈ (ہڈکو) کے درمیان ریاست میں 12 گرین فیلڈ سیٹلائٹ ٹاؤن شپ کی ترقی کے لیے ایک لاکھ کروڑ روپے کی طویل مدتی فنڈنگ کے لیے ایک اہم ایم او یو پر دستخط کیے گئے۔
وزیر اعلیٰ کے سامنے محکمہ شہری ترقی و ہاؤسنگ کے پرنسپل سکریٹری ونئے کمار اور ہڈکو کے چیئرمین اور منیجنگ ڈائریکٹر سنجے کلشریشتھا نے ایم او یو کی دستاویزات کا تبادلہ کیا۔ اس موقع پر منعقدہ پروگرام سے خطاب کرتے ہوئے وزیر اعلیٰ مسٹر چودھری نے کہا کہ یہ معاہدہ بہار کی شہری ترقی کی تاریخ میں ایک سنگ میل ثابت ہو گا۔انہوں نے کہا کہ ریاست میں جدید، منظم اور مستقبل کی ضروریات کے مطابق سیٹلائٹ ٹاؤن شپ تیار کیے جائیں گے، جس سے لوگوں کو بہتر رہائش، اعلیٰ درجے کی شہری سہولیات اور معیاری زندگی میسر آئے گی۔ انہوں نے کہا کہ تقریباً تین لاکھ ایکڑ سے زیادہ رقبے پر ٹاؤن شپ تیار کیے جائیں گے۔ کسانوں کو بھی لینڈ پولنگ کے ذریعے اس میں حصہ دار بنایا جائے گا۔ انہوں نے کہا کہ جو بھی کسان معاوضے کے لیے درخواست دیں گے انہیں 30 دن کے اندر ادائیگی کر دی جائے گی۔ حکومت بہار 12 نئے ٹاؤن شپ کے سلسلے میں ہڈکو کے ذریعے 1 لاکھ کروڑ روپے کی سرمایہ کاری کر رہی ہے۔ اس کے علاوہ 06 لاکھ کروڑ روپے کی سرمایہ کاری باہر سے کی جائے گی۔
وزیر اعلیٰ مسٹر چودھری نے کہا کہ اس اہم پہل سے بہار کی اقتصادی ترقی کو نئی رفتار ملے گی۔ بڑے پیمانے پر نجی اور ادارہ جاتی سرمایہ کاری راغب ہو گی، تعمیراتی سرگرمیوں کو فروغ ملے گا اور براہ راست اور بالواسطہ طور پر لاکھوں روزگار اور سیلف ایمپلائمنٹ کے مواقع پیدا ہوں گے۔ انہوں نے کہا کہ ان گرین فیلڈ سیٹلائٹ ٹاؤن شپس میں جدید سڑکوں کا نیٹ ورک، پینے کا پانی، سیوریج، بجلی، گرین ایریا، تعلیم، صحت، تجارتی اور سماجی انفراسٹرکچر جیسی تمام ضروری سہولیات تیار کی جائیں گی، تاکہ لوگوں کو عالمی معیار کی شہری زندگی فراہم کی جا سکے۔ وزیر اعلیٰ نے کہا کہ حکومت بہار منصوبہ بند، متوازن اور ہمہ جہت شہر کاری کے لیے پرعزم ہے۔
انہوں نے کہا کہ ہڈکو کے ساتھ ہونے والا یہ معاہدہ ریاست کی ترقی کو نئی بلندیوں تک لے جانے اور بہار کو جدید شہری ترقی کے میدان میں سرکردہ ریاستوں کی صف میں کھڑا کرنے کی سمت میں ایک اہم قدم ہے۔ اس سے بہار کے عوام کا خواب پورا ہو گا۔ انہوں نے کہا کہ ریاستی حکومت شہر کاری کے 35 فیصد کے ہدف کو حاصل کرنے کے لیے مسلسل کوشاں ہے۔