نتیش کمار کا ضلع بھوجپور کے لیے 466 کروڑ روپے کے منصوبوں کا تحفہ

وزیر اعلیٰ نتیش کمار نے بدھ کے روز اپنی 'سمردھی یاترا کے دوران ضلع بھوجپور کو 466 کروڑ روپے کے ترقیاتی منصوبوں کی سوغات دی۔ وزیر اعلیٰ نتیش کمار نے آج سمردھی یاترا کے سلسلے میں ضلع بھوجپور میں ریموٹ کے ذریعے سنگ بنیاد کی نقاب کشائی کر کے 197 کروڑ روپے کی لاگت والے 494 منصوبوں کا افتتاح اور 269 کروڑ روپے کی لاگت والے 227 منصوبوں کا سنگ بنیاد رکھا۔ مسٹر کمار نے بھوجپور ضلع میں مختلف ترقیاتی منصوبوں کا جائزہ لیا۔ اس دوران انہوں نے افسران سے 'پرگتی یاترا کے دوران کیے گئے اعلانات پر عمل درآمد کے بارے میں معلومات حاصل کیں اور کام کو تیزی سے مکمل کرنے کی ہدایت دی۔
وزیر اعلیٰ نتیش کمار نے ضلع بھوجپور کے تحت گورنمنٹ میڈیکل کالج اور اسپتال کے احاطے میں 100 بستروں والے سی سی بی (کریٹیکل کیئر بلاک) کی تعمیراتی کام (لاگت 4,450 لاکھ روپے) کا سنگ بنیاد رکھا۔ انہوں نے گورنمنٹ میڈیکل کالج اور اسپتال، بھوجپور کی تعلیمی عمارت کا معائنہ بھی کیا۔ انہوں نے اسپتال کی عمارت، ڈاکٹروں اور ملازمین کی رہائش گاہوں وغیرہ کی تعمیراتی کام کے بارے میں معلومات لیں اور افسران کو کام جلد مکمل کرنے کی ہدایت جاری کی۔
مسٹر کمار نے مختلف محکموں کی جانب سے لگائے گئے اسٹالز کا معائنہ کیا۔ اس دوران انہوں نے جیویکا دیدیوں سے روزگار سے متعلق مختلف سرگرمیوں اور مصنوعات کے بارے میں معلومات حاصل کیں۔ انہوں نے 29,112 جیویکا سیلف ہیلپ گروپس کی دیدیوں کو 236 کروڑ روپے کا علامتی چیک بھی فراہم کیا۔
وزیر اعلیٰ نتیش کمار نے وزیر اعلیٰ اُدیمی اسکیم کے 78 مستفیدین کو 3 کروڑ 90 لاکھ روپے کے علامتی چیک فراہم کیے۔ اس کے علاوہ مکھیہ منتری تالاب ماہی پروری ترقی اسکیم، بین برادری شادی اسکیم، وزیر اعلیٰ کنیا اُتھان اسکیم سمیت دیگر محکموں کی اسکیموں کے مستفیدین کو بھی علامتی چیک دیے گئے۔ انہوں نے محکمہ تعلیم، صحت، شہری ترقی و رہائش، سماجی بہبود، ڈیری، ماہی پروری و حیوانات، زراعت اور صنعت کے اسٹالز کا معائنہ کیا اور ترقیاتی کاموں کی ستائش کی۔ وزیر اعلیٰ نے بھوجپور ضلع میں مختلف بڑے انفراسٹرکچر منصوبوں کا جائزہ لیا، جن میں زیرو مائل سے آشمی فلائی اوور (این ایچ-30) تک سڑک کی توسیع، آرا شہر کے لیے رنگ روڈ کی تعمیر، آرا-بکسر (این ایچ-922) سے چھپرا روڈ کو چار لین سے چھ لین میں تبدیل کرنے کا کام، ریلوے اسٹیشن سے کتیرا روڈ اور دیگر اہم راستوں کی توسیع و بہتری، چندوا سے دھرهرا تک حفاظتی بند کی مضبوطی، نہر کے کنارے سڑک کی تعمیر اور دیو سوریہ مندر کے احاطے کی ترقی و خوبصورتی شامل ہیں۔ انہوں نے افسران کو ہدایت دی کہ تمام منصوبے تیزی سے مکمل کیے جائیں۔
اس کے بعد وزیر اعلیٰ آرا میں زرعی پیداوار مارکیٹ کمیٹی پہنچے، جہاں انہوں نے 5785.50 لاکھ روپے کی لاگت سے مارکیٹ کمیٹی کے احاطے کی مرمت و تعمیر کا افتتاح کیا اور وہاں کی سہولیات کا جائزہ لیا۔ اس دوران انہوں نے زرعی مصنوعات اور پھلوں کا معائنہ کرتے ہوئے ان کے معیار اور پیداوار کے بارے میں معلومات حاصل کیں۔
مزید برآں، انہوں نے مارکیٹ کمیٹی احاطے میں "جیویکا مارٹ-کم-ٹریننگ سنٹر" (لاگت 29.99 لاکھ روپے) کا افتتاح کیا اور اس کی کارکردگی کا جائزہ لیا۔ اسی طرح "سوادیکا کیفے" (لاگت 20.75 لاکھ روپے) کا بھی افتتاح کیا اور وہاں دستیاب سہولیات کے بارے میں معلومات حاصل کیں۔