باپو ٹاور میں تین روزہ’گاندھی فلم فیسٹیول‘ کا آغاز

پٹنہ، 9 ستمبر (اے بی این) باپو ٹاور میں بدھ کے روز تین روزہ 'گاندھی فلم فیسٹیول کا آغاز کیا گیا۔ پروگرام کا افتتاح مہمان خصوصی محکمہ تعمیرات کے سکریٹری پرنَو کمار اور دیگر مہمانوں نے روایتی طور پر چراغ روشن کرکے کیا۔ اس کے بعد باپو ٹاور کی جانب سے اسٹیج پر موجود مہمانوں کو گلدستے، یادگاری تحائف، شال اور کتاب پیش کرکے ان کا استقبال کیا گیا۔ اس موقع پر پہلے اجلاس میں 'گاندھی اور فلم موضوع پر خصوصی لیکچر کا بھی انعقاد کیا گیا۔ استقبالیہ خطاب اور موضوع کا تعارف پیش کرتے ہوئے باپو ٹاور کے ڈائریکٹر ونے کمار نے باپو ٹاور کے مقاصد اور گاندھی وادی نظریات کو فلموں کے ذریعے نئی نسل تک پہنچانے کی اہمیت کو اجاگر کیا۔مہمان خصوصی پرنَو کمار نے اپنے خطاب میں کہا کہ مہاتما گاندھی کے طرزِ زندگی اور ان کے پیغامات کو عام لوگوں تک پہنچانے میں سنیما کا خصوصی تعاون رہا ہے۔ انہوں نے کہا کہ گاندھی جی کا اثر شروع ہی سے فلموں پر رہا ہے۔ جدید دور میں ان کے خیالات پر مرکوز فلمیں بن رہی ہیں۔
اس کے بعد آئی سی سی آر پٹنہ کی علاقائی ڈائریکٹر محترمہ سوادھا رضوی اور سنی سوسائٹی کے صدر آر۔ این۔ داس نے مہمان خصوصی کی حیثیت سے اپنے خیالات پیش کیے۔پروگرام کے اہم مقرر اور معروف فلم نقاد ونود انوپم نے 'گاندھی اور فلم‘ موضوع پر اپنا تفصیلی خطاب پیش کیا۔ انہوں نے کہا کہ گاندھی جی کی زندگی اپنے آپ میں ایک سنیما کے کینوس کی طرح ہے، جس نے دنیا بھر کے فلم سازوں کو متاثر کیا ہے۔تقریب کی صدارت کر رہے گاندھی میوزیم کے سکریٹری رضی احمد نے اپنے صدارتی خطاب میں گاندھی وادی اقدار کی معنویت پر روشنی ڈالی۔گاندھی فلم فیسٹیول کے پہلے دن صبح 11 بجے مشہور رچرڈ ایٹن بَرو کی آسکر ایوارڈ یافتہ فلم 'گاندھی (1982) دکھائی گئی۔ وہیں دوپہر 3 بجے 'گاندھی - 20ویں صدی کے پیغمبر (1940) کی نمائش کی گئی۔فلم فیسٹیول کے دوسرے دن 10 ستمبر کو دو فلمیں دکھائی جائیں گی۔ صبح کے سیشن میں 'مہاتما گاندھی ٹاکس (1931) دکھائی جائے گی۔ دوپہر کے سیشن میں 'اے باؤنڈ لیس آئیڈیا (1970) کی نمائش ہوگی، جو گاندھی وادی فلسفے پر مبنی ہے۔
فیسٹیول کے تیسرے اور آخری دن 11 ستمبر کو تین فلموں کی نمائش رکھی گئی ہے۔ اس میں صبح 11 بجے 'میں نے گاندھی کو نہیں مارا (2005) دکھائی جائے گی، جو جدید تناظر میں گاندھی کے خیالات کی معنویت پر مبنی ہے۔ اس کے بعد 'نوآکھلی ایکسٹریکٹس (1946) اور 'ساؤتھ انڈیا ٹور آف مہاتما گاندھی (1946) جیسی تاریخی فوٹیج والی فلمیں دکھائی جائیں گی۔پروگرام کی نظامت باپو ٹاور کے اوِر سکریٹری ارون کمار پاٹھک نے بخوبی انجام دی، جبکہ شکریہ کی تحریک باپو ٹاور کے ڈپٹی ڈائریکٹر للت کمار سنگھ نے کی۔ اس موقع پر بڑی تعداد میں اسکولی بچے، ناظرین اور معزز افراد موجود تھے۔