اتر پردیش اسمبلی کا مانسون اجلاس ہنگامہ خیز ہونے کا اندیشہ

اتر پردیش اسمبلی کا مانسون اجلاس پیر سے شروع ہوگا۔ اجلاس کے دوران مختلف مسائل پر حکمراں جماعت اور حزب اختلاف کے درمیان تلخ نوک جھونک اور ہنگامے کے امکانات ہیں۔بھارتیہ جنتا پارٹی جہاں اپنی حکومت کے گزشتہ 10 برس کی کامیابیاں ایوان میں پیش کرے گی، وہیں سماج وادی پارٹی اور کانگریس رام مندر کے چڑھاوے کی چوری، امن و قانون کی صورت حال اور عوامی مفاد سے متعلق دیگر مسائل پر حکومت کو گھیرنے کی تیاری کر رہی ہیں۔
حزب اختلاف کے رہنما اور سماج وادی پارٹی کے سینئر رہنما ماتا پرساد پانڈے نے کہا کہ حزب اختلاف پوری طرح تیار ہے اور رام مندر کے چڑھاوے کی چوری کا معاملہ ایوان میں نمایاں طور پر اٹھایا جائے گا۔ انہوں نے الزام لگایا کہ حکومت اجلاس کی مدت مختصر رکھ کر اپنی ذمہ داریوں سے بچنا چاہتی ہے۔ساون کے مہینے اور کانوڑ یاترا کے پیش نظر حکومت کی جانب سے مجوزہ انتظامات اور ہدایات کو لے کر بھی حزب اختلاف کے حکومت کو گھیرنے کا امکان ظاہر کیا جا رہا ہے۔اسمبلی کے ممکنہ پروگرام کے مطابق پہلے دن مرحوم ارکان کو خراجِ عقیدت پیش کیا جا سکتا ہے۔ 04 اگست کو ضمنی بجٹ پیش کیے جانے کا امکان ہے۔
05 اگست کو قانون سازی سے متعلق امور اور دیگر سرکاری کام انجام دیے جائیں گے، جبکہ 06 اگست کو ضمنی بجٹ پر بحث کے بعد اجلاس کی کارروائی مکمل ہونے کا امکان ہے۔
کانگریس قانون ساز پارٹی کی رہنما آرادھنا مشرا نے بھی کہا کہ رام مندر کے چڑھاوے کی چوری کا معاملہ سنگین ہے اور حکومت کو اس پر جواب دینا ہوگا۔ انہوں نے کہا کہ اس کے علاوہ بھی عوامی مفاد سے متعلق کئی مسائل ایوان میں اٹھائے جائیں گے۔اجلاس شروع ہونے سے ایک روز قبل اتوار کو قانون ساز عمارت میں منعقدہ کل جماعتی اجلاس میں وزیر اعلیٰ یوگی آدتیہ ناتھ نے تمام جماعتوں سے ایوان کی کارروائی خوش اسلوبی سے چلانے اور عوامی مفاد کے مسائل پر صحت مند اور بامقصد بحث کرنے کی اپیل کی۔وہیں اسمبلی اسپیکر ستیش مہانا نے بھی تمام جماعتوں سے ایوان کا وقار برقرار رکھنے میں تعاون کرنے کی درخواست کی۔دریں اثنا اجلاس کے آغاز سے قبل کل جماعتی اجلاس سے خطاب کرتے ہوئے وزیر اعلیٰ نے کہا کہ 03 اگست سے شروع ہونے والے اسمبلی کے مانسون اجلاس میں عام لوگوں سے متعلق موضوعات پر مثبت بحث ہونی چاہیے۔انہوں نے کہا کہ جمہوری نظام میں ایوان عوام کے مسائل کے حل کا سب سے مؤثر پلیٹ فارم ہے اور عوامی نمائندوں کی ذمہ داری ہے کہ وہ عوام کے مفاد سے متعلق ہر مسئلے کو سنجیدگی سے ایوان میں پیش کریں۔اس دوران مانسون اجلاس کے پیش نظر دارالحکومت لکھنؤ میں وسیع حفاظتی انتظامات کیے گئے ہیں۔ اسمبلی اور اس کے آس پاس کے علاقوں میں ٹریفک کا نظام رواں رکھنے کے لیے خصوصی ٹریفک منصوبہ نافذ کیا گیا ہے۔ تاہم ایمبولینس اور اسکولی گاڑیوں کو ممنوعہ راستوں سے بھی گزرنے کی اجازت ہوگی۔
وزیر اعلیٰ یوگی آدتیہ ناتھ نے اتوار کو حکمراں جماعت اور حزب اختلاف کے عوامی نمائندوں سے اپیل کی کہ عوامی مفاد سے متعلق تمام مسائل کو ایوان میں سنجیدگی سے اٹھایا جائے اور ریاست کی ترقی کے لیے صحت مند اور بامقصد بحث کی جائے۔قانون ساز عمارت میں اسمبلی اسپیکر ستیش مہانا کی صدارت میں منعقدہ کل جماعتی اجلاس سے خطاب کرتے ہوئے وزیر اعلیٰ نے کہا کہ 03 اگست سے شروع ہونے والے اسمبلی کے مانسون اجلاس میں عام لوگوں سے متعلق موضوعات پر مثبت بحث ہونی چاہیے۔انہوں نے کہا کہ جمہوری نظام میں ایوان عوام کے مسائل کے حل کا سب سے مؤثر پلیٹ فارم ہے ۔
اور عوامی نمائندوں کی ذمہ داری ہے کہ وہ عوام کے مفاد سے جڑے ہر مسئلے کو سنجیدگی سے ایوان میں پیش کریں۔

وزیر اعلیٰ نے تمام سیاسی جماعتوں سے اپیل کرتے ہوئے کہا کہ ایوان کی کارروائی پُرامن اور خوش اسلوبی سے چلانے کے لیے تمام ارکان کا تعاون ضروری ہے۔

انہوں نے کہا کہ صحت مند بحث اور تعمیری مکالمے سے ریاست کی ترقی کو نئی رفتار ملے گی اور عوامی مفاد کے کاموں کو مؤثر انداز میں آگے بڑھایا جا سکے گا۔

اجلاس میں اسمبلی اسپیکر ستیش مہانا نے بھی تمام جماعتوں کے رہنماؤں اور ارکان سے ایوان کا وقار برقرار رکھنے اور کارروائی کو خوش اسلوبی سے چلانے میں تعاون کرنے کی اپیل کی۔

کل جماعتی اجلاس میں نائب وزیر اعلیٰ کیشو پرساد موریہ، وزیر خزانہ و پارلیمانی امور سریش کھنہ، قائد حزب اختلاف ماتا پرساد پانڈے، کابینہ وزیر ڈاکٹر سنجے نشاد اور اوم پرکاش راج بھر، کانگریس قانون ساز پارٹی کی رہنما آرادھنا مشرا، جن ستّا دل (جمہوری) کے رہنما رگھوراج پرتاپ سنگھ 'راجا بھیا'، نشاد پارٹی کے رمیش سنگھ، اپنا دل (ایس) کے آر کے پٹیل اور راشٹریہ لوک دل کے راج پال بالیان سمیت مختلف سیاسی جماعتوں کے نمائندے موجود تھے۔