بی جے پی کا وزیر اعلیٰ بنتے ہی مجرم بے لگام: سی پی آئی

پٹنہ، 29 اپریل(اے بی این) کمیونسٹ پارٹی آف انڈیا (سی پی آئی) کے ریاستی سکریٹری رام نریش پانڈے نے بدھ کو الزام لگایا ہے کہ بہار میں بھارتیہ جنتا پارٹی کا وزیر اعلیٰ بنتے ہی مجرم بے لگام ہو گئے ہیں اور ریاست میں امن و امان کی صورتحال مسلسل ابتر ہوتی جا رہی ہے۔
سی پی آئی کے ریاستی سکریٹری نے آج ایک بیان جاری کرتے ہوئے کہا کہ بہار میں قتل اور جرائم کے واقعات میں بے پناہ اضافے سے ریاست میں خوف و ہراس کا ماحول پایا جاتا ہے۔ مجرم اس قدر نڈر ہو گئے ہیں کہ دن دہاڑے قتل کی وارداتیں ہو رہی ہیں۔ انہوں نے بھاگلپور، مظفر پور اور پٹنہ سمیت مختلف اضلاع میں حالیہ مجرمانہ واقعات کا حوالہ دیتے ہوئے کہا کہ اس سے واضح ہوتا ہے کہ قانون کا خوف ختم ہو چکا ہے۔ مسٹر پانڈے نے نیشنل کرائم ریکارڈ بیورو کے اعداد و شمار کا حوالہ دیتے ہوئے کہا کہ قتل اور جرائم کے معاملات میں بہار ملک کی ٹاپ پانچ ریاستوں میں شامل ہے اور شرح جرم میں دوسرے نمبر پر ہے۔ انہوں نے دعویٰ کیا کہ بہار میں جرائم کی تعداد میں 80 فیصد اضافہ ہوا ہے۔ این سی آر بی کے اعداد و شمار کے مطابق سال 2005 سے اب تک عصمت دری کے واقعات میں 47.8 فیصد اضافہ درج کیا گیا ہے۔ ریاست کی جو تصویر سامنے آ رہی ہے اس کے مطابق آئے دن تاجر، سیاسی کارکن، وکلاء، اساتذہ اور عام آدمی جرائم کا شکار ہو رہے ہیں۔ راجدھانی پٹنہ آرمز ایکٹ کے تحت درج مقدمات میں بہار کا سرکردہ ضلع بن گیا ہے۔ سی پی آئی کے ریاستی سکریٹری نے الزام لگایا کہ ریاست کی قومی جمہوری اتحاد (این ڈی اے) حکومت امن و امان برقرار رکھنے میں ناکام ثابت ہو رہی ہے۔ انہوں نے بڑھتے ہوئے جرائم پر گہری تشویش کا اظہار کرتے ہوئے حکومت کو اس کا ذمہ دار ٹھہرایا اور عوام سے اپیل کی کہ وہ بگڑتی ہوئی امن و امان کی صورتحال کے خلاف جدوجہد کے لیے آگے آئیں۔