بہار میں فلم انڈسٹری کو فروغ، مقامی تاجروں کیلئے بڑا موقع

پٹنہ : محکمہ آرٹ اینڈ کلچر اور بہار اسٹیٹ فلم ڈیولپمنٹ اینڈ فائنانس کارپوریشن لمیٹڈ نے بہار میں فلم انڈسٹری کو فروغ دینے اور مقامی کاروباریوں کے لیے ایک خاص آن لائن پورٹل لانچ کیا ہے۔اس خصوصی اقدام سے ریاست کے فنکاروں، تکنیکی ماہرین اور مختلف خدمات فراہم کرنے والوں کے لیے نئے مواقع کے دروازے کھل گیے ہیں۔ اس پورٹل کے ذریعے مقامی فنکار (اداکار، رقاص، گلوکار وغیرہ) کے ساتھ ساتھ فلم پروڈکشن سے وابستہ تکنیکی اور پیشہ ور افراد ھی اپنے آپ کو رجسٹر کروا سکتے ہیں۔ اس میں کیمرہ، لائٹ، ساؤنڈ، ڈرون، ایڈیٹنگ، وی ایف ایکس جیسی تکنیکی خدمات، آرٹ ڈائریکشن، سیٹ ڈیزائن، ملبوسات اور میک اپ جیسی تخلیقی خدمات شامل ہیں۔ مزید برآں، ہوٹل، نقل و حمل، شوٹنگ لوکیشن، کیٹرنگ جیسی لاجسٹک خدمات فراہم کرنے والے کاروباری بھی اس پلیٹ فارم سے جڑ سکتے ہیں۔ میڈیا اور پروموشن سے وابستہ افراد جیسے ڈیجیٹل مارکیٹنگ، سوشل میڈیا اور فوٹو گرافی کے پیشہ ور افراد کے ساتھ ساتھ سیکورٹی، ایونٹ مینجمنٹ اور مقامی کوآرڈینیشن سے وابستہ افراد بھی درخواست دے سکتے ہیں۔اس پورٹل کا سب سے بڑا فائدہ یہ ہے کہ بہار میں ہونے والی فلموں کی شوٹنگ کے دوران مقامی لوگوں کو براہ راست فلم پروڈکشن ہاؤس کے ساتھ کام کرنے کا موقع ملے گا۔ اس سے نہ صرف روزگار کے نئے مواقع پیدا ہوں گے بلکہ مقامی تاجروں کو بھی نئے کلائنٹس ملیں گے اور آمدنی کے ذرائع میں اضافہ ہوگا۔ دلچسپی رکھنے والے افراد آسانی سے ویب سائٹ پر جا کر رجسٹریشن کروا سکتے ہیں۔ یہ عمل مکمل طور پر مفت ہے۔