پٹنہ، 12 اگست 2026: وزیراعلیٰ جناب سمراٹ چودھری نے کہا ہے کہ بہار کے نوجوانوں میں صلاحیت کی کوئی کمی نہیں ہے، ضرورت اس بات کی ہے کہ انہیں معیاری تعلیم، جدید ہنر اور عالمی سطح کے مواقع فراہم کیے جائیں۔ ’گنگا ٹو گلوبل‘ تصور کے تحت للت نارائن مشرا انسٹی ٹیوٹ آف اکنامک ڈیولپمنٹ اینڈ سوشل چینج (LNMI) کے طلبہ کو ملک اور بیرون ملک کے ممتاز اداروں کے کام کرنے کے طریقوں، جدید علم اور تجربات سے روشناس کرایا جائے گا۔ ہر سمسٹر میں تقریباً 100 طلبہ کو ایک ماہ کے لیے بیرون ملک ایکسپوژر وزٹ پر بھیجنے کی پہل کی جا رہی ہے۔ وزیراعلیٰ نے یہ بات آج ایل این ایم آئی میں منعقدہ طلبہ کے انڈکشن اینڈ اورینٹیشن پروگرام ’آغاز-2026‘ کے افتتاح کے موقع پر کہی۔ انہوں نے شمع روشن کرکے پروگرام کا افتتاح کیا اور 2026 میں پاس آؤٹ ہونے والے چھ گولڈ میڈلسٹ طلبہ کو اعزاز سے نوازا۔ ساتھ ہی نئے تعلیمی سیشن میں داخلہ لینے والے طلبہ و طالبات کو مبارکباد پیش کرتے ہوئے ان کے روشن مستقبل کے لیے نیک خواہشات کا اظہار کیا۔ وزیراعلیٰ نے کہا کہ للت نارائن مشرا انسٹی ٹیوٹ بہار کے اہم تعلیمی ورثے کا حصہ ہے۔ اس وقت ادارے میں تقریباً 1600 طلبہ زیر تعلیم ہیں، جن کی تعداد بڑھا کر 3000 کرنے کی سمت میں کام کیا جائے گا۔ ادارے میں داخلہ CAT اور MAT جیسے مسابقتی امتحانات میں طلبہ کی کارکردگی کی بنیاد پر ہوتا ہے۔انہوں نے کہا کہ ’گنگا ٹو گلوبل‘ کے تحت بہار کے طلبہ کو ملک و بیرون ملک کے ممتاز تعلیمی اداروں میں سیکھنے اور وہاں کے جدید تعلیمی و تحقیقی طریقۂ کار کو سمجھنے کا موقع فراہم کیا جائے گا۔ ہر سمسٹر میں تقریباً 100 طلبہ کو ایک ماہ کا بیرون ملک ایکسپوژر دیا جائے گا، تاکہ وہ عالمی سطح کے اداروں کے تجربات سے استفادہ کر سکیں۔ ایل این ایم آئی کے لیے 10 ایکڑ اراضی وزیراعلیٰ نے اعلان کیا کہ پٹنہ میں بننے والی نئی ٹاؤن شپ کے ترقیاتی عمل میں ایل این ایم آئی کو سیٹلائٹ کیمپس کے قیام کے لیے 10 ایکڑ اراضی فراہم کی جائے گی۔ اس کے علاوہ ادارے میں طلبہ کے لیے اے آئی سنٹر آف ایکسی لینس، سنٹر فار اربن پالیسی اینڈ گورننس اور کوانٹم کمپیوٹر سنٹر قائم کیا جائے گا۔انہوں نے کہا کہ ان مراکز کے قیام کا مقصد طلبہ کو جدید ٹیکنالوجی، پالیسی سازی، شہری ترقی، انتظامیہ اور گورننس کے شعبوں میں مطالعہ، تحقیق اور عملی تجربات کے بہتر مواقع فراہم کرنا ہے۔ تعلیم کے شعبے میں حکومت کے متعدد اقدامات
وزیراعلیٰ نے کہا کہ ریاستی حکومت تعلیم کے شعبے میں مسلسل اہم اقدامات کر رہی ہے۔ تمام بلاکوں میں ڈگری کالج قائم کیے گئے ہیں۔ 15 جولائی کو شروع کیے گئے 211 ڈگری کالجوں میں 10 اگست سے اساتذہ کی تعیناتی کے ساتھ تدریسی سرگرمیاں شروع ہو چکی ہیں۔ ریاست میں 551 ماڈل اسکول بھی شروع کیے گئے ہیں۔
انہوں نے کہا کہ 15 اگست سے طلبہ رات 11 بجے کے بعد بھی آن لائن تعلیم حاصل کر سکیں گے، اساتذہ سے سوال پوچھ سکیں گے اور امتحانات کی بہتر تیاری کر سکیں گے۔ مگدھ کے تاریخی ورثے کو عالمی شناخت دلانے میں نوجوانوں کا کردار جناب سمراٹ چودھری نے کہا کہ بہار کی شاندار مگدھ تاریخ اور عظیم ثقافتی ورثے کو دوبارہ عالمی سطح پر شناخت دلانے میں طلبہ اور نوجوان اہم کردار ادا کریں گے۔ بہار کے نوجوان دنیا کے کسی بھی حصے میں رہیں، انہیں اپنی مٹی اور اپنے وطن سے جڑے رہنا چاہیے اور ریاست کی ترقی و خوشحالی میں اپنا کردار ادا کرنا چاہیے۔انہوں نے کہا کہ دنیا تیزی سے تبدیل ہو رہی ہے اور ہر شعبے میں ٹیکنالوجی کا کردار بڑھ رہا ہے۔ مصنوعی ذہانت کا استعمال بھی تیزی سے بڑھ رہا ہے، اس لیے طلبہ کو مستقبل کی ٹیکنالوجی اور بدلتی ہوئی ضروریات کے مطابق تیار کرنا وقت کی اہم ضرورت ہے۔ واٹر مینجمنٹ اور بنیادی ڈھانچے پر زور وزیراعلیٰ نے کہا کہ بہار میں سیلاب مینجمنٹ کے شعبے میں بہتر کام کیا گیا ہے۔ سابق وزیراعظم اٹل بہاری واجپائی کی قیادت میں دریاؤں کو جوڑنے کا منصوبہ شروع کیا گیا تھا۔ ریاست میں کوسی، نارائنی اور گنگا ندی بیسن کو بہتر بنانے پر توجہ دی جا رہی ہے، تاکہ پانی کا مؤثر انتظام یقینی بنایا جا سکے۔انہوں نے کہا کہ بہتر واٹر مینجمنٹ کے نتیجے میں اس وقت بہار میں تقریباً 44 لاکھ ہیکٹر زمین سیراب ہو رہی ہے۔ تقریباً 200 کلومیٹر طویل میرین ڈرائیو کو 2030 تک پی پی پی موڈ میں تعمیر کرنے کا منصوبہ ہے، جس پر تقریباً ایک لاکھ کروڑ روپے کی سرمایہ کاری کی جا رہی ہے۔وزیراعلیٰ نے کہا کہ بہار کی خوشحالی کے لیے صنعتی ترقی ضروری ہے۔ نوجوان اگر زندگی میں آگے بڑھنا چاہتے ہیں تو انہیں معیاری تعلیم حاصل کرنے کے ساتھ اپنے خوابوں کی تکمیل کے لیے مسلسل محنت کرنی ہوگی۔ عہدیداروں اور طلبہ کی شرکت پروگرام میں منصوبہ و ترقی محکمہ کی ایڈیشنل چیف سکریٹری اور للت نارائن مشرا انسٹی ٹیوٹ فار اکنامک ڈیولپمنٹ اینڈ سوشل چینج کی ڈائریکٹر ڈاکٹر این وجے لکشمی نے وزیراعلیٰ کو شال اور مومینٹو پیش کرکے ان کا خیرمقدم کیا۔ اس موقع پر ادارے پر مبنی ایک مختصر فلم بھی دکھائی گئی۔پروگرام سے شہری ترقیات و رہائش کم انفارمیشن ٹیکنالوجی کے وزیر جناب نتیش مشرا، منصوبہ و ترقی محکمہ کی ایڈیشنل چیف سکریٹری و ادارے کی ڈائریکٹر ڈاکٹر این وجے لکشمی اور آریہ بھٹہ نالج یونیورسٹی کے وائس چانسلر پروفیسر شرد کمار یادو نے بھی خطاب کیا۔ 2026 بیچ کے تین طلبہ نے بھی اپنے خیالات کا اظہار کیا۔اس موقع پر وزیراعلیٰ کے سکریٹری جناب سنجے کمار سنگھ، ہائر ایجوکیشن محکمہ کے سکریٹری جناب راجیو روشن سمیت دیگر سینئر افسران، اساتذہ اور ایل این ایم آئی کے طلبہ موجود تھے۔
