سمستی پور، چھپرا میڈیکل کالج میں ایم بی بی ایس کی 50، 50 نشستیں منظور

پٹنہ: (اے بی این)بہار میں طبی تعلیم کے فروغ کی سمت ایک اہم پیش رفت ہوئی ہے۔ نیشنل میڈیکل کمیشن (NMC) نے تعلیمی سیشن 2026-27 سے شری رام جانکی میڈیکل کالج و اسپتال، سمستی پور اور راجکیہ میڈیکل کالج، چھپرا (سارن) میں ایم بی بی ایس کورس شروع کرنے کی اجازت دے دی ہے۔ دونوں کالجوں میں 50، 50 نشستوں پر داخلہ ہوگا۔
NMC کے میڈیکل اسیسمنٹ اینڈ ریٹنگ بورڈ (MARB) نے دونوں اداروں کو لیٹر آف پرمیشن جاری کیا ہے۔ اس منظوری سے ریاست میں طبی تعلیم کے مواقع میں اضافہ ہوگا اور مستقبل میں بڑی تعداد میں تربیت یافتہ ڈاکٹر دستیاب ہوں گے۔
محکمہ صحت کے مطابق نئے میڈیکل کالجوں سے نہ صرف طلبہ کو اپنے علاقے میں طبی تعلیم حاصل کرنے کا موقع ملے گا بلکہ متعلقہ اسپتالوں میں ماہر ڈاکٹروں کی خدمات اور جدید علاج کی سہولیات بھی مضبوط ہوں گی۔وزیر صحت نشانت نے مرکزی حکومت کا شکریہ ادا کرتے ہوئے کہا کہ سمستی پور اور سارن میں ایم بی بی ایس کی نشستوں کی منظوری بہار کے لیے اہم کامیابی ہے۔ انہوں نے کہا کہ ریاست کے میڈیکل کالجوں میں تعلیم کے لیے ضروری اساتذہ اور وسائل کی کوئی کمی نہیں ہونے دی جائے گی۔
انہوں نے کہا کہ حکومت کا مقصد عوام کو ان کے علاقے میں ہی معیاری اور ماہر طبی خدمات فراہم کرنا ہے۔ نئے میڈیکل کالجوں اور ایم بی بی ایس نشستوں میں اضافہ اس مقصد کی جانب اہم قدم ہے۔ اس سے بہار میں طبی تعلیم کے ساتھ صحت خدمات کے بنیادی ڈھانچے کو بھی مزید تقویت ملے گی۔