ریونیو کاموں میں سستی پر سخت کارروائی ہوگی: ڈاکٹر دلیپ کمار جیسوال

پٹنہ، 6 اگست: بہار کے محکمۂ ریونیو و اراضی اصلاحات کے وزیر ڈاکٹر دلیپ کمار جیسوال نے افسران کو سخت انتباہ دیتے ہوئے کہا ہے کہ ریونیو سے متعلق کاموں میں کسی بھی قسم کی لاپروائی، تاخیر یا ضابطوں کی خلاف ورزی ہرگز برداشت نہیں کی جائے گی۔ انہوں نے واضح کیا کہ سرکاری خدمات مکمل طور پر آن لائن ہیں، اس لیے اگر کسی بھی سطح پر آف لائن طریقے سے کام انجام دینے کی شکایت ملی تو متعلقہ افسر کے خلاف سخت محکمانہ کارروائی کی جائے گی۔جمعرات کو ویڈیو کانفرنسنگ کے ذریعے ریاست کے تمام ایڈیشنل کلکٹروں، ڈی سی ایل آر اور سرکل افسران کے ساتھ جائزہ اجلاس کی صدارت کرتے ہوئے وزیر نے آن لائن داخل خارج، پریمارجن پلس، ای-ماپی، ابھیان بسیرا-2، ریونیو مہا ابھیان، عوامی شکایات اور آر سی ایم ایس کے تحت زیر سماعت مقدمات کی پیش رفت کا تفصیلی جائزہ لیا۔ انہوں نے ہدف سے پیچھے رہنے والے اضلاع کو مقررہ مدت کے اندر تمام زیر التوا معاملات نمٹانے کی ہدایت دی۔ڈاکٹر جیسوال نے کہا کہ تمام مقدمات کا تصفیہ "فرسٹ اِن، فرسٹ آؤٹ (FIFO)" اصول کے مطابق یقینی بنایا جائے اور ڈی سی ایل آر سطح پر آخری مرحلے میں زیر التوا تمام مقدمات ایک ہفتے کے اندر نمٹائے جائیں۔ انہوں نے افسران کو ہدایت دی کہ درخواستوں کی جانچ (ڈفیکٹ چیک) کے عمل میں بھی تیزی لائی جائے تاکہ عوام کو بروقت خدمات فراہم کی جا سکیں۔وزیر نے بتایا کہ ابھیان بسیرا-2 کے تحت 15 اگست تک 30 ہزار بے زمین خاندانوں کو رہائشی زمین کی بندوبستی اسناد فراہم کرنے کا ہدف مقرر کیا گیا ہے۔ انہوں نے تمام اضلاع کو باہمی تال میل کے ساتھ اس ہدف کی بروقت تکمیل یقینی بنانے کی ہدایت دی۔انہوں نے اعلان کیا کہ محکمہ کی کارکردگی کا دوبارہ جائزہ 15 دن بعد لیا جائے گا اور اس وقت تک تمام اضلاع کو زیر التوا مقدمات میں نمایاں کمی لاکر ڈسپوزل ریٹ بہتر بنانا ہوگا۔اجلاس میں محکمہ کے اعلیٰ افسران، سیکریٹری سیما ترپاٹھی، سیکریٹری جے سنگھ، ایڈیشنل سیکریٹری ڈاکٹر مہندر پال، آجیو وتس راج، جوائنٹ سیکریٹری گردھاری لال سمیت دیگر افسران شریک تھے۔