مدھوبنی، 9 اگست (سالم آزاد) بہار کے مدھوبنی ضلع کے بینی پٹی تھانہ علاقے میں اتوار کی صبح تیز رفتار نامعلوم گاڑی کی زد میں آنے سے تین خواتین کی موت ہوگئی۔پولیس ذرائع نے بتایا کہ اریر تھانہ علاقے کے ہنومان چوک نوتولی کی کچھ خواتین روزانہ کی طرح اتوار کی صبح بھی سیر کے لیے نکلی تھیں۔ سیر کے بعد تین خواتین جگدمبا پٹرول پمپ کے سامنے اینٹ بھٹے کے قریب سڑک کنارے بیٹھی ہوئی تھیں۔ اسی دوران رہیکا کی جانب سے تیز رفتاری سے آنے والی ایک چار پہیہ گاڑی نے سڑک سے تقریباً تین سے چار فٹ دور بیٹھی تینوں خواتین کو کچل دیا اور ڈرائیور گاڑی سمیت فرار ہوگیا۔حادثے میں تینوں خواتین کی موقع پر ہی موت ہوگئی، جبکہ وہاں موجود تین دیگر خواتین بال بال بچ گئیں۔ واقعے کی اطلاع ملتے ہی موقع پر لوگوں کی بھیڑ جمع ہوگئی۔ مشتعل لوگوں نے حادثے کے بعد فرار گاڑی کی شناخت اور ڈرائیور کی گرفتاری کا مطالبہ کرتے ہوئے سڑک جام کردی، جس سے آمدورفت متاثر ہوئی۔ذرائع نے بتایا کہ واقعے کی اطلاع ملنے پر بینی پٹی کے تھانیدار و پولیس انسپکٹر انوپ کمار اور اریر کے تھانیدار آنند شنکر گورو پولیس افسران کے ساتھ موقع پر پہنچے اور صورتحال کا جائزہ لیا۔ پولیس انتظامیہ سڑک جام کرنے والے لوگوں کو سمجھانے کی کوشش کر رہی ہے۔مرنے والی خواتین کی شناخت سابقہ ارون جھا کی 72 سالہ اہلیہ پھول دائی دیوی، راجو مہتو کی 42 سالہ اہلیہ کرن دیوی اور پچو ساہ کی 55 سالہ اہلیہ ریتا دیوی کے طور پر ہوئی ہے۔دو متوفی خواتین کے اہل خانہ لاشیں آخری رسومات کے لیے اپنے ساتھ لے گئے ہیں، جبکہ ریتا دیوی کی لاش فی الحال سڑک پر رکھی ہوئی ہے۔ پولیس فرار گاڑی کی شناخت کرنے کی کوشش کر رہی ہے۔
